Хәүефле миҙгелгә әҙер булырға кәрәк

18 апрелдән Башҡортостан биләмәһендә янғынға ҡаршы махсус режим индереү планлаштырыла, ул ут тоҡандырыу һәм сүп-сар яндырыу буйынса сикләүҙәрҙе күҙ уңында тота. Республика Башлығы Радий Хәбиров уҙғарған аҙналыҡ оператив кәңәшмәлә ошо хаҡта һүҙ барҙы. Төбәктең Ғәҙәттән тыш хәлдәр буйынса дәүләт комитеты рәйесе Кирилл Первов хәбәр итеүенсә, 716 кешенән һәм 130 берәмек техниканан торған ведомство ҡарамағындағы янғын-ҡотҡарыу подразделениелары 2025 йылдың янғын хәүефе осорона тулыһынса әҙер. Тәбиғәт янғындары хәүефен иҫкәртеү өсөн Башҡортостанда 1 500 янғын һүндереүсе ранец һәм 18 күсмә янғын резервуары әҙерләнгән. 2000-дән ашыу ирекмән янғын һүндереү программаһы буйынса уҡытыу үткән. Тәүлек әйләнәһенә дежурҙа КА-32 янғын һүндереү-ҡотҡарыу вертолеты тора. Бынан тыш, янғын һүндереү-ҡотҡарыу көстәрен үҫтереү стратегияһы сиктәрендә 2030 йылға тиклем өс янғын һүндереү автоцистернаһын һәм 11 берәмек тағылма янғын һүндереү техникаһын һатып алыу планлаштырыла. – Ландшафт янғындарын һүндереү өсөн көстәрҙең һәм сараларҙың дөйөм төркөмөндә 7 500 кеше һәм 1 000-дән ашыу берәмек техника иҫәпләнә, - тип йомғаҡ яһаны Кирилл Первов. Республиканың урман фонды биләмәһендә лә өҫтәмә янғын хәүефһеҙлеге сараларын индерергә планлаштыралар. Башҡортостандың урман хужалығы министры Марат Шәрәфетдинов Росгидромет һәм Авиалесоохрананың яҡынса фараздары мәғлүмәттәрен тапшырҙы, уларға ярашлы республиканың айырым райондары биләмәһендә майҙан сентябргә тиклем юғары класлы янғын хәүефе фаразлана. Урмандарҙың янғын хәүефһеҙлеген тәьмин итеү өсөн 2025 йылға 11,5 мең кешене һәм 3,3 мең берәмек техниканы йәлеп итеүҙе күҙ уңында тотҡан йыйылма план раҫланды. – Һауа температураһының күтәрелеүен, эргә-тирәләге биләмәләрҙә ҡоро үләндең янып китеүен һәм термик нөктәләр тураһында йыһан мониторингы мәғлүмәттәрен иҫәпкә алып, 3 апрелдән урмандарҙа янғын хәүефе миҙгелен асабыҙ, ә 1 майҙан республика урмандарында янғынға ҡаршы махсус режим индерергә тәҡдим итәбеҙ, - тип билдәләне Марат Шәрәфетдинов. Урман хужалығы министры муниципаль хакимиәт етәкселәренә 15 апрелгә тиклем урман массивтары эргәһендәге тораҡ пункттар, иҡтисад һәм социаль өлкә объекттары тирәләй ер һөрөргә тәҡдим итте. Шулай уҡ ер биләүселәрҙең һәм эргә-тирәләге участкаларҙың буфер зоналарында ҡоро үлән һәм янар материалдарҙы йыйыу буйынса эштәрҙе башҡарыуын контролдә тотоу йәки минераллаштырылған һыҙаттарҙы төҙөкләндереү мөһим. Был эште 1 майға тиклем тамамларға кәрәк. Башҡортостан Башлығы янғын хәүефһеҙлеге мәсьәләһен контролдә тоторға ҡушты. - Фараздарҙан сығып, беҙҙе эҫе һауа торошо көтә, һәм бының тәүге билдәләре – ҡоро үләндең янып китеүе. Эшкә тотонабыҙ, кәрәкле материалдар, көстәр һәм средстволар әҙерләгеҙ, – тип йомғаҡ яһаны Радий Хәбиров. Фото: Башҡортостан Башлығы сайты.