Култуура сонуна.
“Көмүс саас “Далбар Хотуна-2022”
“Санаам сабын ситимнэрэ,
Саһарҕалаах кустуктара,
Сардаҥалаах үөрүүлэрэ,
Сандал иэйиим ымыылара
Сахам кэрэ аҥаардара
Сахам Далбар хотуттара”
Николай Чуор.
Чэбдик ыраас салгыннаах, сааскы маҥнайгы бырааһынньыгы Дьахталлар Аан дойдутааҕы күннэрин көрсэ, Саха сиригэр Автономия тэриллибитэ 100 сылынан, Ийэ сылынан, улууспутугар култуура тэриллибитэ 100 сылыгар ананан чаҕыл уоттаах Чаппанда нэһилиэгэр, алта нэһилиэктэн сэттэ кыттааччы кэлэн “Дьоҕур” норуот айымньытын дьиэтигэр “Көмүс саас Далбар Хотун-2022” күрэскэ кэлэн кыттыыны ыллылар. Тыа сиригэр үлэни өрө туппут, чахчы дууһаларынан ыал буолан, оҕо төрөтөн, сүөһү-сылгы ииттэн олорор иэримэ дьиэ иэйиэхситтэрэ, Алаһа дьиэ аанньаллара, дьиэ тутаах хаһаайкалара ыаллар ийэлэрэ, эбэлэрэ бу күнү кэлэн кыттан сэргэхситтилэр, санааны көтөхтүлэр, сааскы үөрүүнү бэлэхтээтилэр. МТ баһылыга Бухолов Краснослав Григорьевич кэлэн иһэр сааскы маҥнайгы бырааһынньыгынан эҕэрдэтин тиэртэ. Күрэскэ кыттыыны ыллылар: күн тахсар Күндээдэ сириттэн Борисова Розалия Васильевна, маанылаах Маар нэһилиэгиттэн: Спиридонова Лидия Николаевна, Лазерева Пелагея Ильинична, өҥ буордаах Өҥөлдьөттөн Филиппова Мария Егоровна, Антоновкаттан Шестакова Валентина Николаевна, ньургун, туйгун дьоннордоох Ньурбачаантан Николаева Елена Григорьевна, чаҕыл уоттаах Чаппандаттан Оппудонова Розалия Дмитриевна. Күрэс биэс түһүмэҕинэн ыытылынна: “бэйэни билиһиннэрии”, “Сөбүлүүр дьарык”, “Саха мааны сандалыта”, Сиэннэрим-симэхтэрим- (сиэннэрдиин дьарык”)видеонан, “Кэрэ көстүү”.Күрэҕи биллэн туран дьүүллүр сүбэ быһаарар, күрэхпит сүрүн уратыта диэн “Дьүүлүүр сүбэ” бу сырыыга барыта эр дьоннор буоллулар; Чаппанда МТ баһылыга Бухолов К.Г., “Сааскылаана” оҕо саадын төрдүс категориялаах, Тарбаахап оскуолатын ааспыт повар Михайлов П.Н., СӨ култууратын туйгуна, Түмүк нэһилиэгин бочуоттаах олохтооҕо, Алгысчыт Попов И.-Саха Уйаан. Биэс түһүмэхтээх күрэх үрдүк тэрээһиннээхтик ааста. Кыттааччылар бары бэлэмнэнэн, кэлбиттэрэ харахха быраҕыллар, бары да талааннаах, дьоҕурдаах эбиттэр. Күрэс түмүгүнэн маннык анал ааттар олохтоннулар: “Намыына саас” Шестакова Валентина Николаевна (Антоновка), “Күбэйэ саас” Лазерева Пелагея Ильинична (Маар), “Талба саас” Николаева Елена Григорьевна, (Ньурбачаан)“Эрчимнээх саас” Оппудонова Розалия Дмитриевна (Чаппанда), “Муударай саас” Филиппова Мария Егоровна (Өҥөлдьө), “Алгыстаах саас” Борисова Розалия Васильевна (Күндээдэ), күрэс кыайыылааҕынан “Дарбар Хотун-2022” үрдүк ааты ылла, Маар нэһилиэгиттэн дьоруой ийэ Спиридонова Лидия Николаевна. Бүгүҥҥү күрэҕи иилээн-саҕалаан ыытта, уус-уран салайааччы Саргылана Семенова, бэйэлэрин сэмэй ырыаларынан киэргэттилэр: Алена Иудина, Мария Оппудонова, Альбина Платонова, “Эйээрэ” дьахталлар ансамбыллара, Камелия Яковлева, Тимофей Шестаков, Таисия Михайлова, Антоновка орто оскуолатын 1 кылааһын үөрэнээччитэ Нюргуяна Егорова. Бары кэлэн кыттыыны ылбыт күрэхпит маанылаах Далбар Хотуттарыгар, күүс-көмө буолбут ырыаһыттарбытыгар, дьүүллүүр сүбэҕэ улахан махталбытын тиэрдэбит. Баҕарабыт уһун дьоллоох олоҕу, чэгиэн доруобуйаны, баҕа санааҕыт туоллун, бу тэтимҥитин ыһыктыбакка куруук маннык актыыбынай буолуҥ, сиэннэргитин кытта үөрүҥ-көтүҥ, олоххо ситиһиилээх буолуҥ.
