Тиде кечылаште ик палымем дене капка ончылно тӱрлӧ нерген кутырен шинчылтна. Рвезе годсымат шарналтышна, ончыкылык нергенат ойлышна. Ваштареш пошкудын кудывечыштыже шырчык омарта уло.
Тудо кундемыште чогыматыме йӱк торашке шокта. Ончена, кок шырчык пӧрткайыкым омарта гыч покта. Кӧн шокшо пыжашыжым кудалтен кайымыже шуэш. Пӧрткайыклан садак ик жап гыч омартам кудалташыже вереште. Шырчык кокла гыч иктыже омарташке пурыш, весыже монча ӱмбаке шинчын, ну мура вет, шулдыржо дене, шкенжым пешак мокта: «Кертна вет, кертна вет».
Умбакыже мо лиеш манын ончена.
Теве кашта дене шырчык омарта деке пырысиге кӱза. Кӱзен шумеке, ончыл йолжо дене омарташке пураш тӧча. Вес шырчыкет чоҥештен толын, шулдыржо дене лупшаш тӱҥале. Но налын шуен ыш керт. Вара ала-кушко чоҥештен кайыш. Шукат ыш лий, кугу шемгорак дене дене чоҥештен тольыч. Корак монча леведыш ӱмбак шинчын, чот гына карал шындыш. Пырысиге лӱдмыж дене омарта дечын кораҥе, коракат чоҥештен кайыш. Тидым ужын, пырысиге мӧнгеш пӧртыльӧ. Ончыл йолжо дене эҥертен, омарташке пураш тӧча. Шырчык адак чоҥештен кайыш, кугу варашым ӱжын тольо. Вараш пырысигым сакалтен кайыш, «мяу» веле шоктен кодо. Тудо торашке ыш чоҥеште, пасушко волен возо. Мемнан моткочак пален налме шуын, пеш куржына. Миен шумеке ончена, пырысиге магырен кудал колтыш. Кузе шонеда, вараш дене мо лийын? Пырысиге кайыкын оҥжо гыч кӧргӧ ӱзгаржым удырен луктын улмаш. Пӱртӱсыштӧ теве тыгай томашат лийын кертеш.
КУГУ АЗИ