Ամերիկացի պրոդյուսեր Հարվի Վայնշտեյնը, որն արդեն պատիժ է կրում սեռական հանցագործությունների համար, ևս 16 տարվա ազատազրկման է դատապարտվել բռնաբարության գործով։ Այս մասին հայտնում է Variety-ն։
Դատավճիռը կայացվել է փետրվարի 23-ի առավոտյան՝ Լոս Անջելեսում։ Երդվյալ ատենակալները նրան մեղավոր են ճանաչել սեռական հանցագործությունների երեք հոդվածներով:
Բոլոր մեղադրանքներն առնչվում են մոդելի բռնաբարության հետ։ Նա հայտարարել է, որ պրոդյուսերն իրեն բռնաբարել է հյուրանոցում՝ 2013 թվականին կայացած Los Angeles Italia Film Festival փառատոնից հետո։
«Ազատազրկման բավարար ժամանակ չկա, որը կփոխհատուցի այս վնասը: Հուսով եմ, որ նրան կտաք առավելագույն ժամկետ։ Ինձ համար դժվար է այստեղ լինել: Արդեն 10 տարի է անցել, բայց բռնաբարության հետևանքները դեռ թարմ են, և դժվար է այդ մասին խոսել: Նրա եսասիրական, նողկալի արարքները մեծ ազդեցություն ունեցան իմ և իմ կյանքի վրա: Այն, ինչ նա արեց ինձ հետ, սարսափելի էր»,- դատարանում ասել է մոդելը։
Մինչ դատավճիռը կայացնելը, Վայնշտեյնը դիմել է դատավորին։ Նա պնդել է, որ մեղավոր չէ։
«Ամեն ինչ փողի հետ է կապված, նա ինձ է որսում: Խնդրում եմ, ինձ ցմահ բանտարկություն մի տվեք։ Ես սրան արժանի չեմ։ Այս գործի մեջ այնքան սխալ կա: Ոչ մի ապացույց չկա։ Ես զոհ եմ, խնդրում եմ, բարեգութ եղեք իմ նկատմամբ»,- ասել է նա։
Հավելենք, որ Վայնշտեյնն արդեն 23 տարվա ազատազրկում է կրում Նյու Յորքում՝ երկու կանանց նկատմամբ բռնաբարության և սեռական ոտնձգություններ կատարելու մեղադրանքով։