Սոչիում ուժեղ անձրևների հետևանքով վնասվել է մոտ 30 տուն, սակայն մարդկանց կյանքին վտանգ չի սպառնում . այս մասին տելեգրամյան ալիքում գրել է Կրասնոդարի երկրամասի նահանգապետ Բենիամին Կոնդրատևը՝ Արտակարգ իրավիճակների կանխարգելման և վերացման հանձնաժողովի նիստի ավարտից հետ. հաղորդում է ՌԻԱ Նովոստին:
«Սև ծովի ափին փոթորկի նախազգուշացում կա: Այս պահին ամենաբարդ իրավիճակը Սոչիում է: Գետերը դուրս են եկել ափերից ու ողողել բնակելի շենքերը: <…> Մենք պետք է պատրաստ լինենք իրադարձությունների ցանկացած զարգացման», – գրել է նա:
Կոնդրատևը շեշտել է, որ անցել են աշխատանքի ուժեղացված ռեժիմի, մասնագետները վերականգնում են էլեկտրամատակարարումը:
«Այսօր փոթորկի նախազգուշացման պատճառով շատ լողափեր մնում են փակ: Սա նշանակում է, որ լողալը այժմ շատ վտանգավոր է», – ասել է Կոնդրատևը:
Նշենք, որ նախօրեին Սոչիում ուժեղ քամու և անձրևաջրերի հետևանքով մեկ մարդ մահացել է, երկուսը՝ տուժել:
Խորոտա և Մացեստա գետերի մակարդակները հասել են կրիտիկական մակարդակի: Տեղի բնակիչներին խնդրել են պատրաստել փաստաթղթեր և առաջին անհրաժեշտության իրեր՝ արտակարգ տարհանման համար:
Քաղաքային իշխանությունները հավաստիացնում են, որ կան բավարար սարքավորումներ և փրկարարներ` վատ եղանակի հետևանքներն արագորեն վերացնելու համար, և սպասում են, որ վաղը մաքրելու են լողափերի մեծ մասը:
Շուտով կանխատեսվում է եղանակի բարելավում:
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#ջրհեղեղ #Սոչի