Օրերս Շուշի էին այցելել Ադրբեջանում հավատարմագրված 46 երկրների դեսպաններ։ Այդ այցելությանը հրաժարվել էին մասնակցել միայն Ռուսաստանի, Ֆրանսիայի և ԱՄՆ-ի դեսպանները։ Հատկանշական է, որ Շուշի այցելողների թվում էր նաև Հունաստանի դեսպանը։
Ի՞նչ հասկանալ Հունաստանի դիվանագիտական ներկայացուցչի՝ Շուշի կատարած այցի տակ։ Արդյո՞ք դա նշանակում է, որ 44-օրյա պատերազմի ժամանակ մշտապես հայանպաստ հայտարարություններով հանդես եկած պաշտոնական Հունաստանը, որն անգամ իր ԱԳ նախարար Նիկոս Դենդիասին էր պատերազմի օրերին գործուղել ՀՀ, փոխվել է դիրքորոշումը և սկսել է ավելի մեղմ նայել Թուրքիայի ու Ադրբեջանի կատարած բարբարոսությանը հայերի նկատմամբ։
Հարցի մասին Armenia Today-ը զրուցեց Հայաստանում հունական համայնքի ղեկավար Էդուարդ Պոլատովի հետ։
«Թուրքիայի և Հունաստանի միջև դիվանագիտական հարաբերությունները նոր-նոր են վերականգնվել։ Հարաբերությունները հույների ու թուրքերի միջև 44-օրյա պատերազմի ժամանակ պայթյունավտանգ էին՝ գրեթե պատերազմի շեմին»,- ասաց Պոլատովը՝ հավելելով, որ հենց այդ ժամանակ էլ ադրբեջանական կառավարությունը մեղադրեց Հունաստանին այն բանի մեջ, թե իբր հույներն իրենց երկրում պատրաստում են ահաբեկիչների և ուղարկում Ղարաբաղ՝ ռազմաճակատ․ այս պատճառով էլ ընդհատվեցին դիվանագիտական հարաբերությունները Հունաստանի ու Ադրբեջանի միջև։
Պոլատովն Ադրբեջանում Հունաստանի դեսպանի այցը Շուշի մեկնաբանում է այլ կերպ։ Ըստ նրա՝ ո՛չ Հայաստանում, ո՛չ Ադրբեջանում Հունաստանի դեսպանները երբեք չեն եղել Լեռնային Ղարաբաղում։ Գուցե սա հնարավորություն էր, որպեսզի նրանք մեկ անգամ այցելե՞ն, գուցե այցի նպատակը ծանոթագրակա՞ն է։ Չէ՞ որ, Շուշին իր գյուղերով ավերվել է, ռմբակոծվել է Շուշիի Սուրբ Ղազանչեցոց վանքը, ոչնչացվել են հայկական մշակութային կոթողները։ Եվ դա այն դեպքում, երբ Շուշիի մզկիթը վերականգնել էր հենց ԼՂ-ի կառավարությունը։ Հնարավոր է, որ որպես դաշնակից՝ հունական կողմը ցանկանար տեսնել, թե Ադրբեջանի՝ աշխարհին ներկայացրած փաստերին զուգահեռ ի՞նչ կործանարար գործողություններ է արել ԼՂ-ում Ադրբեջանն ի՛նքը։ Հնարավոր է, որ դեսպանը ցանկացել է սեփական աչքերով տեսնել այս պահին Շուշիում տիրող իրավիճակը։
«Հույները չեն կարող լավ հարաբերություններ ստեղծել մի երկրի հետ, որը «մեկ ժողովուրդ՝ երկու պետություն» կարգախոսով կապված է այն պետության հետ, որի հետ իրանց հարաբերությունները պատերազմի նախաշեմին են»,- ասաց Պոլատովը։ Ի վերջո՝ Հունաստանը մեկ դեսպանությամբ չի վերջանում։ Բազմաթիվ են այն քաղաքական գործիչները, որոնք, անտեսելով Ադրբեջանի պատժամիջոցները, ամեն ամիս այցելում էին Լեռնային Ղարաբաղ․ հոգ չէ, որ հետո նրանց ադրբեջանական «սև ցուցակ» էին ներառում։
Պոլատովը հիշեցրեց, որ հույներն ինքնակազմակերպվելով աջակցել են Հայաստանին թե՛ Արցախյան առաջին, թե՛ 2016 թվականի Ապրիլյան, թե՛ 44-օրյա պատերազմի ժամանակ՝ տրամադրելով մեծ օգնություն։ Հունական համայնքի ղեկավարը նաև հիշեցրեց, որ ամեն տարի 12 հայ սպա ավարտում է Հունաստանի զինվորական ակադեմիան։ Այդպիսի ռազմական համագործակցություն է տեղի ունենում միայն Հունաստանի, Ռուսաստանի և ԱՄՆ-ի հետ։
Ի վերջո՝ եվրոպական երկրներից Հունաստանն ու Կիպրոսը միշտ, բոլոր իրավիճակներում եղել են Հայաստանի կողքին։ Պոլատովը նշեց, որ բարեկամական հարաբերությունները երկրների միջև շարունակական են և հեռանկարային։
Արաքսյա Սնխչյան
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#Դեսպանների այցելություն #Էդուարդ Պոլատով #Հայաստանում հունական համայնքի ղեկավար #Շուշի