Парти «Иугонд Уæрæсе»-йы регионалон хайады секретарь, Паддзахадон Думæйы депутат Таймазты Артур байхъуыста цæрджыты курдиæттæм. Сæ фарстатимæ æххуысмæ æрбадзырдтой 20 адæймагæй фылдæр. Дзæуджыхъæуы цæрæг æрыгон сылгоймаджы йе ‘нæниздзинадмæ гæсгæ, хъæуы Мæскуыйы академик Кулаковы номыл медицинон-иртасæн центры æххуыс. Беслæны сывæллæтты рæвдауæндоны та нæй хъæугæ компьютерон техникæ.
Ныридæгæн фарстатæй сæ кæцыдæр хай иуварсгонд æрцыдысты. Уымæй уæлдай, адæммæ уыд социалон æххуысы курдиæттæ — цæрæнбынæтты уавæртæ фæхуыздæр кæнын, уæлдæр ахуырадон уагдæттæм бацæуын, фиддонтæ райсын. Таймазты Артур куыд фæнысан кодта, афтæмæй кæд эпидемиологон уавæр хуыздæртæй нæу, уæддæр иу курдиат дæр æнæ æркастæй нæ баззайдзæн.