13-æм майы 12 сахатыл телеканал «Осетия-Ирыстон»-ы студийы комкоммæ эфиры уыдзæн Глобалон диктант ирон æвзагæй. Йæ бон дзы архайын уыдзæн, кæй фæнды, уыдонæн. Диктанты трансляци цæудзæн нæ телеканалы комкоммæ эфиры. Мадзал арæзт цæуы Ирон æвзаджы Боны кадæн.
Уæ зæрдыл уын æрлæууын кæндзыстæм, нæ республикæйы ахуырады æмæ наукæйы министрад телеканал «Осетия-Ирыстон»-ы æххуысæй Глобалон диктант аразы дыккаг хатт. Фарон диктант ныффыстой 3 мин адæймагмæ ‘ввахс. Сæ зонындзинæдтæ ирон æвзагæй равдыстой скъоладзаутæ, ахуыргæнджытæ, студенттæ, стæй кæй фæндыди, уыдон. Фыстой йæ фæсарæнты цæрæг ирæттæ дæр. Акци саразджыты хъуыдымæ гæсгæ афæдзæй-афæдзмæ архайджытæ кæнынц фылдæрæй-фылдæр.