Շվեդիայում գտնվող Ստոկհոլմի խաղաղության հետազոտման միջազգային ինստիտուտը (SIPRI) հրապարակել է զեկույց՝ տարբեր երկրների ռազմական ծախսերի վերաբերյալ։ SIPRI-ի փորձագետների գնահատմամբ՝ 2020-ին Հայաստանը կրճատել է ռազմական ծախսերը 2,6%-ով այն դեպքում, երբ Ադրբեջանն ավելացրել է դրանք 17 %-ով։ Razm.info-ի վերլուծաբան Ռոբերտ Նազարյանն Armenia Today-ի հետ զրույցում անդրադարձել է ներկայացված վերլուծությանը։
«Նախ՝ 2,6 տոկոս նվազման առումով պատկերը դեռ ամբողջական չէ, որովհետև 2020թ․ մեր պետական բյուջեի կատարողականը դեռ հասանելի չէ։ Այսինքն, մենք չենք կարող նայել, թե ընդունված բյուջեից որքանն ենք ծախսել ռազմական բյուջեի վրա։ Միևնույն ժամանակ մենք ունենք նախորդ տարվա փորձը․ իշխանության գալուց հետո այսօրվա իշխանությունը հայտարարում էր, որ ռազմական բյուջեն ավելացնում են, բայց իրականում այդ ավելացումը չնչին թիվ էր։ Իսկ հետո բյուջեի կատարողականով պարզ դարձավ, որ 2019թ․ բյուջեի նախագիծը ներկայացվել է, ընդունվել է, բայց կատարողականով նախատեսվածից ավելի քիչ ենք ծախսել։ Այսինքն, փաստացի, ռազմական բյուջեն չի ավելացել։ Ինչ վերաբերում է Ադրբեջանին, ապա առաջին տարին չէ, որ այդ երկրում ռազմական բյուջեն ավելանում է»,-ասաց Ռ․ Նազարյանը։
Նրա խոսքով, հետաքրքիր են նաև մեր և Ադրբեջանի ռազմական բյուջեի հարաբերակցությունները ունեցած ՀՆԱ-ի հետ։
«Եթե անցած տարի մեր ռազմական բյուջեի ու ՀՆԱ-ի հարաբերակցությունը 4,9 տոկոս էր, իսկ Ադրբեջանում 4 տոկոս, ապա այդ երկրի պարագայում նշված հարաբերակցությունն արդեն դարձել է 5,4 տոկոս, մինչդեռ Հայաստանինը կրկին 4,9 է»,-ասաց նա։
Անդրադառնալով ռազմական ծախսերը չավելացնելու հանգամանքին՝ հատկապես պատերազմող երկրի պարագայում, մեր զրուցակիցը նշեց․ «Պարզ տրամաբանություն կա․ եթե ունես պատերազմող երկիր, և քո ապրելու միակ շանսը պատերազմում չպարտվելն է, ապա պատերազմում չպարտվելու համար քեզ պետք է բանակ, ռազմական բյուջե։ Այդ պարզ տրամաբանությունից բխում է, որ ռազմական բյուջեի կրճատումը ոչնչով չի կարող արդարացվել»։
Հաշվի առնելով նաև 2020թ․ 44-օրյա պատերազմն ու դրա հետևանքները՝ Ռոբերտ Նազարյանը նշեց, որ այսօրվա դրությամբ համալիր միջոցառումների ցանկ է հարկավոր։
«Հարկավոր է նաև վերազինում՝ հաշվի առնելով ժամանակակից պատերազմի պահանջները, ինչպես նաև մեր ուենցած պատերազմի փորձը։ Ես ուզում եմ շեշտել ավելի արդիական տեխնիկաների ձեռքբերման, ինչպես նաև պլանավորման կարևորության մասին, որովհետև, եթե ունես ամեն ինչ, բայց չունես նորմալ պլանավորում, նաև նորմալ պլանավորող, ոչ մի լուրջ հաջողության էլ չես հասնելու։ Պլանավորման խնդիրը մենք տեսանք այս պատերազմում»,-ասաց նա՝ կարևորելով նաև բանակի բարոյահոգեբանական խնդիրների լուծմանն ուղղված անելիքների անհրաժեշտության մասին։
Լրացուցիչ տեղեկությունների համար այցելեք կայք
#Ռոբերտ Նազարյան #ՀՆԱ #SIPRI