"Кіраўніцтва МНС Беларусі, аказваецца, вельмі занятае ліквідацыяй уцечак"

Кіраўніцтва МНС Беларусі, аказваецца, вельмі занятае ліквідацыяй уцечак. Што праўда, не столькі небяспечных рэчываў, колькі інфармацыі, якая кампраметуе гэтае кіраўніцтва. З гэтай мэтай нават арганізавалі «маніторынг сацыяльных сетак» супрацоўнікаў.

- Гэта азначае, што ў любога ратавальніка ў любы момант начальства можа запатрабаваць тэлефон і праверыць усю перапіску, – распавёў нам адзін з афіцэраў МНС. – Нават лагіны і паролі ад асабістых акаўнтаў неабходна выдаць – інакш будуць непрыемнасці аж да непрацягнення кантракту.

А яшчэ супрацоўнікаў прымушаюць выпісваць ведамасныя выданні – «Служба спасения» ды «Юный спасатель» (апошняе – наагул дзіцячае). І потым правяраюць справаздачы тэрытарыяльных падраздзяленняў па зводках «Белпошты». Крый божа не супадзе. Сведчанне таму – крыху заляжалы, але ад гэтага не менш актуальны дакумент.