Եվրամիությունը չի դիտարկում Ադրբեջանի դեմ պատժամիջոցների կիրառման հնարավորությունը՝ կապված Լաչինի միջանցքի շուրջ ստեղծված իրավիճակի հետ։ Այս մասին հայտարարել է ԵՄ դիվանագիտության ղեկավար Ժոսեպ Բորելը` ի պատասխան Եվրախորհրդարանի պատգամավոր Ասսիտա Կանկոյի հարցմանն ի պատասխան։
«Պատժամիջոցները ԵՄ-ի գործիքներից մեկն են ընդհանուր արտաքին և անվտանգության քաղաքականության նպատակներն առաջ տանելու համար և այս դեպքում հաշվի չեն առնվում»,- ասել է Բորելը:
Նրա խոսքով՝ ԵՄ-ի ջանքերն ուղղված են երկխոսության միջոցով լուծումներ գտնելուն, ինչին իրենց հանձնառությունն են հայտնել Հայաստանի և Ադրբեջանի ղեկավարները։
Բորելը նշել է, որ 2022 թվականի դեկտեմբերի սկզբից ԵՄ-ն ուշադիր հետևում է Լաչինի միջանցքի շուրջ տեղի ունեցող իրադարձություններին և դրանց հումանիտար հետևանքներին, դաշինքի ներկայացուցիչները կապի մեջ են կողմերի հետ։ Նա ընդգծել է, որ ԵՄ-ն Ադրբեջանին կոչ է արել իր իրավասության շրջանակներում միջոցներ ձեռնարկել միջանցքով տեղաշարժի ազատությունն ու անվտանգությունն ապահովելու համար՝ 2020 թվականի նոյեմբերի 9-ի եռակողմ հայտարարությամբ ստանձնած պարտավորություններին համապատասխան։
ԵՄ դիվանագիտության ղեկավարը մեկնաբանել է նաև Հայաստանում ԵՄ դիտորդական առաքելության (EUMA) առաջիկա տեղակայումը։
«Առաքելության նպատակն է նպաստել Հայաստանի սահմանամերձ շրջաններում կայունությանը, վստահության ամրապնդմանը և ապահով միջավայրի ստեղծմանը, որը կնպաստի Հայաստանի և Ադրբեջանի միջև հարաբերությունների կարգավորմանն ուղղված ԵՄ-ի կողմից աջակցվող ջանքերին»,- ասել է նա:
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները: Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը, որը բերելու է Արցախում հումանիտար աղետի: