Պուտինը Շոյգուին հանձնարարել է Ուկրաինայում հրադադարի ռեժիմ սահմանել 36 ժամով՝ հունվարի 6-ին, ժամը 12:00-ից մինչև հունվարի 7-ի կեսգիշեր: Ավելի վաղ պատրիարք Կիրիլը կոչ էր արել ժամանակավոր «Սուրբծննդյան հրադադար» հայտարարել, գրում է Forbes-ը։
Վլադիմիր Պուտինը պաշտպանության նախարար Սերգեյ Շոյգուին հանձնարարել է Ուկրաինայում 36 ժամով հրադադարի ռեժիմ սահմանել։
«Հաշվի առնելով Պատրիարք Կիրիլի ուղերձը՝ Ռուսաստանի Դաշնության պաշտպանության նախարարին հանձնարարում եմ ընթացիկ տարվա հունվարի 6 - ին՝ ժամը 12:00-ից մինչև ընթացիկ տարվա հունվարի 7-ը՝ ժամը 24:00-ն, հրադադարի ռեժիմ սահմանել Ուկրաինայում կողմերի մարտական շփման գծի ողջ երկայնքով», - ասված է փաստաթղթում, որը մեջբերում է մամուլի ծառայությունը:
Այնտեղ ասվում է նաև, որ Կրեմլը Կիևին կոչ է անում նման որոշում կայացնել։ «Ելնելով այն հանգամանքից, որ մարտական գործողությունների շրջաններում ապրում են ուղղափառություն դավանող մեծ թվով քաղաքացիներ, կոչ ենք անում ուկրաինական կողմին հրադադար հայտարարել և հնարավորություն տալ նրանց Սուրբ Ծննդյան ճրագալույցի, ինչպես նաև Քրիստոսի ծննդյան օրը մասնակցել միջոցառումներին», — նշվում է փաստաթղթում: