Հայաստանը չի մասնակցել ՌԴ-ում երեք երկրների ԱԳ նախարարի հետ հանդիպմանը, քանի որ Լաչինում ճգնաժամ է ստեղծվել և արտաքին քաղաքականության պատասխանատուները զբաղված են այդ ճգնաժամի հանգուցալուծման ուղղությամբ։ Այս մասին «Հանրային» հ/ը եթերում հայտարարել է ԱԽ քարտուղար Արմեն Գրիգորյանը։
Անդրադառանլով Ադրբեջանի նախագահ Իլհամ Ալիևի վերջին հայտարարություններին՝ Գրիգորյանն այն համեմատեց Նացիստական Գերմանիայի առաջնորդ Ադոլֆ Հիտլերի ելույթների հետ։ «Ալիևը ՀՀ սուվերեն տարածքի նկատմամբ նկրտումներ է ներկայացրել։ Պատմական նարատիվներով շարժվող այդպիսի բազմաթիվ լիդերներ են եղել։ Ես վստահ եմ, որ Հիտլերը նույն արգումենտացիայով է հարձակվել հարևան երկրների վրա՝ ասելով, որ պատմականորեն այդ հողերն իրենց են պատկանել և սկսել Երկրորդ համաշխարհային պատերազմը։ Ալիևի հայտարարությունները ամբողջովին նման են սրանց»,-նշեց ԱԽ քարտուղարրը։
Խոսելով Միութենական պետության ստեղծման մասին՝ ՀՀ-ում Բելառուսի դեսպան Ալեքսանդր Կոնյուկի հայտարարության մասին, Գրիգորյանը նշել է, որ մենք պետք է պաշտպանենք մեր սուվերենությունը։ « ՀՀ հանդեպ ճնշումներ նաև Միութենական պետության մասով են գալիս, Հայաստանի ժողովրդավարությունը դիմադրում է և ստանում ռազմական տեսքով ճնշումներ: Միութենական պետությունն ամբողջովին ՀՀ սուվերենության խախտումն է։ Հայաստանի օրակարգում Միութենական պետության մեջ մտնելու օրակարգ չկա։ Հայաստանում ընթացող ժողովրդավարական գործընթացները սահմանափակում են այդ հարցը քննարկելու հնարավորությունը»,-նշել է նա։
Գրիգորյանը հայտնեց նաև, որ ԵՄ դիտորդները, որոնք եկել էին հոկտեմբերին, գնացել են, բայց իրավիճակի գնահատման համար նոր տեխնիկական առաքելություն է ժամանել Հայաստան։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը:
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
Դեկտեմբերի 25-ին Արցախում՝ Ստեփանակերտի Վերածննդի հրապարակում, բազմահազարանոց համաժողովրդական հանրահավաք տեղի ունեցավ: