ՄԱԿ-ի ԱԽ նիստից հետո Հայաստանի համար շահեկան տարբերակ կլիներ ՄԱԿ հայտարարության ընդունումը, սակայն նման հարց օրակարգում չկա։ Այս մասին Armenia Today-ի հետ զրույցում ասաց քաղաքագետ Հրանտ Միքայելյանը։ Նա նշեց, որ ՄԱԿ բանաձև ընդունելու դեպքում այն բնականաբար համապատասխանելու է նիստի տրամաբանությանը։ Քաղաքագետի խոսքով՝ պետք է գործի դնել դիվանագիտական բոլոր գործիքները, օրինակ բանաձևի մի քանի տարբերակ ստեղծել ու փոխանցել Ֆրանսիային, որպեսսզի նա փորձի դա ներկայացնել ՄԱԿ ԱԽ մակարդակով։
Խոսելով Լաչինի միջանցքի հարցի քննարկման մասին, Միքայելյանն ասաց, որ այն հիմանականում դրական է գնահատում, սակայն նրան չի բավարարել Ռուսաստանի ներկայացուցչի ելույթը։
«Ակնհայտ է, որ ադրբեջանական լոբբին ազդել է Ռուսաստանի դիրքորոշման վրա և տեղ է թողնվել, որպեսզի այսպես կոչված «բնապահպանները» զբաղվեն Արցախի ընդերքով։
Հարցին, թե ինչ շահ է հետապնդում Ադրբեջանը, քանի որ ակնհայտ է, որ չի կարող հավերժ փակ պահել միջանցքը, Միքայելյանը պատասխանեց, որ ամեն ինչ հնարավոր է։
«Ադրբեջանը Հայաստանի հետ սահմանը փակել է 1989 թվականի սեպտեմբերի 4-ին, որը մինչև այժմ փակ է։ Այսպիսով՝ Ադրբեջանն ունի ճանապարհներ արգելափակելու լայն պատմություն և ունի դրանց միջոցով ինչ-որ հարցերի լուծման հասնելու»,- ասաց նա։
Քաղաքագետի խոսքով՝ նպատակները, որ հետապնդում է Ադրբեջանը միջանցքը փակելով, մի քանիսն են։
Նախ՝ բնապահպանական բաղադրիչը, որի տակ Բաքուն ցանկանում է տիրել Հայաստանի ընդերքին, այլ կերպ ասած՝ հայերի հաշվին իր տնտեսությունը դիվերսիֆիկացնել։
«Մենք տեսել ենք հանքերի, հէկերի հափշտակման քաղաքականությունը, և հիմա դրա շարունակություն է՝ շատ ավելի բարձր փուլում։ Կաշենի հանքը Ադրբեջանը վաճառել է անգլո-ասիական ընկերությանը, սեպտեմբերին գրավել է Սոթքի հանքի տարածքն ամբողջությամբ, իսկ հիմա փորձում է Դրմբոնի հանքը վերցնել վերահսկողության տակ»,- ասաց մեր զրուցակիցը՝ հստակեցնելով, որ սա նշանակում է ճնշում գործադրել Մարտակերտի շրջանի վրա։
Ըստ Միքայելյանի Բաքվի հեռահար նպատակն է դուրս հանել արցախցիներին Արցախի տարածքից, միջանցք ստանալ Հայաստանի տարածքով, որը ռազմական ճնշման շարունակությունն է։ Սակայն այս եղանակային պայմաններում ռազմական գործողություններ կազմակերպելն անհնարին է, դրա համար էլ փորձում է այս ժամանակահատվածն էլ օգտագործել Հայաստանի դեմ։ Ադրբեջանը նպատակ ունի նաև ապազինել Արցախը, այսինքն լուծարել տալ Պաշտպանության բանակը։ Մյուս նպատակներից է Հայաստանն Արցախին հակադրելը՝ ցույց տալու համար, որ Հայաստանն Արցախին չի կարող ադեկվատ աջակցել, ինչո՞ւ չէ՝ նաև սեպ խրել Հայաստան-Ռուսաստան հարաբերությունների մեջ։ Եվ դա հաջողվում է Ադրբեջանին։
«Գլխավոր պատճառն այն է, որ բացարձակ անպատժելիության մթնոլորտ է ստեղծվել Ադրբեջանի նկատմամբ։ Այսինքն՝ Ադրբեջանը խախտում է բոլոր պարտավորությունները և ոչ մի պատիժ չի կրում դրա համար։
Փորձագետի խոսքով՝ Արցախը դեռ որոշ ժամանակ ունի, սակայն պարզ է, որ այս իրավիճակը չի կարող հավերժ շարունակվել ու որոշ ժամանակ անց ավելի մեծ հումանիտար աղետ կարող է սկսվել, ընդհուպ՝ սով։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները:
Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը, որը բերելու է Արցախում հումանիտար աղետի: