Քաթարում ֆուտբոլի աշխարհի առաջնության խմբային փուլում Բելգիայի հավաքականի նկատմամբ տարած հաղթանակի տոնակատարություններն ավարտվել են Բրյուսելի կենտրոնում ոստիկանության հետ բախումներով և ջարդերով, իրավապահները ջրցան մեքենաներ են կիրառել: Այս մասին ТАСС - ի փոխանցմամբ՝ հայտնել է Բրյուսելի ոստիկանության պաշտոնական ներկայացուցիչ Իլզե վան դե Կեյրեն։
«Տասնյակ մարդիկ, որոնցից մի քանիսը փակ դեմքերով, անկարգություններ և բախումներ են կազմակերպել ոստիկանության հետ, ինչը խաթարել է հասարակական կարգը։ Ցուցարարները պիրոտեխնիկա էին օգտագործում, քարեր ու շշեր էին նետում, մահակներ էին օգտագործում ու աղբամաններ այրում», - հայտնել է նա։
Անկարգությունները շարունակվել են երկու ժամ Միդի և Լեմոնյե բուլվարների շրջանում, այն գոտում, որտեղ մեծ թվով մարդիկ են բնակվում Մերձավոր Արևելքից, այդ թվում՝ Մարոկկոյից: Արդյունքում ջարդվել են մի քանի մեքենաներ, պոկվել են լուսացույցները, բելգիացի լրագրողներից մեկը այրվածքներ է ստացել դեմքին հայտնված հրատեխնիկական հրթիռից։ Ոստիկանությունն արգելափակել է անկարգությունների գոտին, կիրառել ջրցան մեքենաներ և արցունքաբեր գազ։
Ջարդերն անակնկալ չեն եղել Միդի թաղամասի շատ բնակիչների համար։ Մասնավորապես, խանութների սեփականատերերի մեծ մասը նախընտրել է նախապես փակել իրենց հաստատությունները Բելգիայի և Մարոկկոյի թիմերի միջև հանդիպման օրը՝ վախենալով, որ խաղի ցանկացած արդյունք կարող է հանգեցնել անկարգությունների։ Հենց այդ պատճառով էլ տեղի առևտրականների համար բախումներից վնասը աննշան է եղել։
Մարոկկոյի հավաքականը F խմբում վաստակել է չորս միավոր և դուրս եկել առաջին տեղ: Բելգիացիները 3 միավորով զբաղեցնում են երկրորդ տեղը, երրորդ տեղում են խորվաթները, չորրորդում՝ կանադացիները: Եզրափակիչ տուրում Մարոկկոյի հավաքականը կմրցի Կանադայի թիմի հետ, բելգիացիները կմրցեն խորվաթների հետ: Հանդիպումները կկայանան դեկտեմբերի 1-ին։