Թուրքիան կարող է ցամաքային գործողության նախապատրաստվել Սիրիայի հյուսիսում, գրում է Yeni Şafak-ը՝ հղում անելով աղբյուրներին, հաղորդում է «Ռիա Նովոստի»-ն:
«Ճանկ-սուր» գործողության ընթացքում ահաբեկիչների 89 թիրախ, ՔԱԿ-ի մի շարք ահաբեկիչներ (Թուրքիայում արգելված Քրդստանի աշխատավորական կուսակցություն), այդ թվում՝ մի քանի բարձրաստիճան ղեկավարներ ոչնչացվել են: Սա դիտվել է որպես ցամաքային գործողությունների հնարավոր առաջին քայլ»,- գրում է թերթը։
Հաղորդվում է, որ ողջ երկրի վեց տարբեր բազաներից օդ բարձրացող ինքնաթիռները միաժամանակյա գործողություններ են իրականացրել Սիրիայի և Հյուսիսային Իրաքի թիրախների դեմ:
«Գործողության ընթացքում, որն իրականացվել է մարտական և աջակցության ինքնաթիռներով, ինչպես նաև անօդաչու թռչող սարքերով, ոչնչացվել են թիրախներ, այդ թվում՝ ահաբեկիչներին պատկանող ապաստարաններ, բունկերներ, քարանձավներ, թունելներ և պահեստներ», - նշվում է հրատարակության մեջ։
Նախօրեին Թուրքիայի պաշտպանության նախարարությունը հայտարարել էր Սիրիայի հյուսիսում և Իրաքում քրդական կազմավորումների դեմ «Ճանկ-սուր» օդային գործողության մեկնարկի մասին։ Գործակալության տվյալներով՝ ահաբեկիչներն օգտագործում են այդ երկրների հյուսիսային տարածքները՝ որպես հենակետեր Թուրքիայի վրա հարձակումներ իրականացնելու համար։
Միջոցառման պատճառը նոյեմբերի 13-ին Ստամբուլում տեղի ունեցած ահաբեկչությունն էր։ Իստիկլալ հետիոտնային փողոցում տեղի ունեցած պայթյունի հետևանքով զոհվել է վեց մարդ, վիրավորվել՝ ավելի քան 80-ը։ Կասկածյալը կալանավորվել է, նա խոստովանել է, որ կապ ունի ՔԱԿ-ի հետ։ Թուրքիայի ներքին գործերի նախարարությունը հայտարարել է, որ հարձակումն իրականացնելու հրամանը եկել է Քոբանիից, իսկ հանցագործը երկիր է մտել Աֆրինով։
Քրդստանի աշխատավորական կուսակցության զինյալների հետ զինված հակամարտությունը Թուրքիայում սկսվել է 1984 թվականին և վերսկսվել 2015 թվականին։ Իրաքի հյուսիսում կան քրդերի հենակետեր, որոնց դեմ Թուրքիայի զինված ուժերը օդային և ցամաքային գործողություններ են իրականացնում։