ԱՄՆ իշխանությունները 85 մլն դոլար կհատկացնեն Թուրքիայում և Սիրիայում տեղի ունեցած երկրաշարժերից հետո մարդասիրական օգնություն ցուցաբերելու համար։ Այս մասին ասվում է ԱՄՆ Միջազգային զարգացման գործակալության (USAID) հայտարարության մեջ, որի միջոցով կհատկացվեն միջոցները։
Նշվում է, որ ԱՄՆ ՄԶԳ աղետների հետևանքով օգնող թիմը (DART) աշխատում է Ադիյամանում, Ադանայում և Անկարայում, խմբում ընդգրկված է մոտ 200 մարդ, որոնցից 159-ը որոնողափրկարարական անձնակազմ են։ Նրա առաջնահերթ խնդիրն է օգնել մարդկանց փլատակներից դուրս բերելուն:
Բացի այդ, Սիրիայի դեմ ԱՄՆ-ի գործող պատժամիջոցները չեն ազդի երկրաշարժի հետևանքների վերացման հետ կապված գործարքների վրա։ Այս մասին հայտնի է դառնում ԱՄՆ ֆինանսների նախարարության կողմից տրված ընդհանուր արտոնագրից։ Այն ուժի մեջ է մինչև 2023 թվականի օգոստոսի 8-ը։ Հստակեցվում է, որ նավթի հետ կապված գործարքները, պատժամիջոցների տակ գտնվող անձանց և Սիրիայի կառավարության հետ փոխգործակցությունը դեռևս արգելված են։
Հիշեցնենք, որ փետրվարի 6-ի առավոտյան 7,8 մագնիտուդով երկրաշարժը տեղի է ունեցել Թուրքիայի հարավ-արևելյան հատվածում և Սիրիայի հյուսիսում: Հաջորդ օրը Թուրքիայի կենտրոնական հատվածում 7 բալ ուժգնությամբ նոր հզոր երկրաշարժ է տեղի ունեցել։
ՀՀ վարչապետ Նիկոլ Փաշինյանը ցավակցական հեռագիր է հղել Թուրքիայում և Սիրիայում տեղի ունեցած երկրաշարժի կապակցությամբ և հայտնել, որ Հայաստանը պատրաստ է օգնություն ցուցաբերել: Հայաստանի ներքին գործերի նախարարությունը փետրվարի 7-ին հաղորդել է երկրաշարժից տուժած շրջաններում որոնողափրկարարական աշխատանքներին աջակցելու նպատակով Սիրիա և Թուրքիա փրկարարական ջոկատներ ուղարկելու մասին: