18-ші Қара пайым-сөз: Әр нәрсе туралы бір ауыз сөзбен айтайын...

2018 жылы бір ғылыми Жоба бойынша ұлты еврей – Питер Мейер деген Австралияның ғалымымен Алматыда 3-4 айдай бірге жұмыс жасадым. Питекең докторлық атағын Ұлыбританиядағы Дерби университетінде қорғап, сонда жұмыс жасаған атақты физик және информатик. Ол бүкіл ғұмырын ғылымға арнап, тіпті үйленбеген екен. Үйде қонақта болғанда, шұбырған бала-шағамды көріп «ғылыммен бірге бала-шағаңды бірге бағып қалайша өмір сүріп жатсың» деп таң қалды. Сол Питер арқылы еуропалықтардың қандай адамдар екенін ұққандай болдым. Олардан үйренетініміз де бар, жиренетініміз де бар...

Айналайын қазекем «екі қос уыс бір килә» деп әлі де алаңсыз өмір сүріп жатыр. Жаһанданудың (глоболизация) салдарынан мына бүгінгі «Тәжі-дерт» (Короновирус-COVID-19) біздерге дамыған Қытай, Еуропа, АҚШ елдерінен келіп жатыр. Бұл түр-түсін секунд сайын өзгертіп отыратын (мутация жасайтын) өте қауіпті тажал. Қазақ халқы санасын өзгертіп, абай болмаса, қарапайым санитарлық нормаларды сақтамаса, түгел қырылып қалуымыз мүмкін. Ағайын-туыс абай болыңдар, «екі қос уысты» ұмытып, бир килоны – бир кило деп айтуға үйреніңіздер...

10.07.2020 жылы түрік бауырларымыз «Қасиетті София соборын» (Айя-София) – мешітке айналдырып үлкен қателік жасады. Сонау 6-ғасырда (ислам діні пайда болмай тұрып) христиан халқы Иса ғ.с. деген шын сенімдерімен және ізгі сезімдерімен оны ғаламат етіп тұрғызды. Сондықтан ол собор мұсылмандікі емес, христиандардікі. Ал енді 14 ғасырдан соң оны мешітке айналдырған ерсі тірлік түрік мұсылмандарына бақыт емес, сор әкелмесе неғылсын. Бір Аллаға және Мұхаммед с.ғ.с.-ға имандай сеніп соққан мешіт қана мұсылмандарға бақыт әкеледі, халқымыз осыны жақсы түсінуі керек...

Мына ұзаққа созылып бара жатқан індеттің тағы бір әсері байқала бастады. Әсіресе көшеде жүйкесі жұқарған адамдарды көп кездестіресің. Жымия күліп, жөн сұрасаң «неменеңе жетісесің» дегендей ала көздерімен ата қарайды. Жайлап-жайлап, халқымыз да, күллі әлем де «жаппай жүйке жұқарушылығы» (массовый психоз) дертіне шалдығып жатыр. Бұл індеттен де жаман салдарларға апарары даусыз. Ағайын, Алланың пешенемізге жазғаны болады, сабыр сақтайық. Жүз жыл қырғын болса да, ажалды өледі, оған қарсы тұрар бізде қауқар жоқ...

Бүгін көршім Сергеймен (Каблуковадағы жындыхананың дәрігері) амандасайын десем, маған жолыма, мен «Тәжі-дерт» (Короновирус-COVID-19)* індетін жұқтырдым деп мені қасына жолатпады. Онысына рахмет енді. Мен сәл ойланып қалып, одан: «Егер дені сау сен індет жұқтырсаң, анау байғұс жындылар не істеп жатыр» деп сұрадым. Ол көзі шарасынан шығып бақырайып: «Коля, құрысын айтпа, сұмдық болып жатыр» деп жұмысына кетті. Ия, расында да, жынды байғұстарда ес жоқ қой, қауіпті түсінбейді. Бірақ бұл туралы ҚР Үкіметі біле ме екен?!...