Ақтоғайдың ақыны Айгүл Түсіпбекованың сып свежий айтысы
АЙГҮЛДЕН: Фейсбуктегі оқырмандарымыздың сұрауы бойынша Құдаш екеуміздің айтысымыздың толық нұсқасы:
Қазақстанның Халық әртісі, әнші Нұрғали Нүсіпжанов 82 жасында 82-ші жылғы келіншекке үйленді деп, фейсбуктегілер "қырылып" жатыр. Көкшетаудың перісі Құдаш екеуміз сол үшін қызылкеңірдек болып, айтысып қалдық!
Құдайберлі Мырзабеков:
Үйленген жақсы сексенде,
Тиым жоқ оған еш жерде.
Шалқадан түсіп жүрмеңдер,
Кіндігін ұлдың кескенде.
Айгүл Түсіпбекова:
Үйленген жаман сексенде,
Көрмесін мұны еш пенде!
Алжығаны-ай атамның
"Сүйем"-деп жас қыз бөскенде!
Құдайберлі Мырзабеков:
Айгүлжан, босқа өштенбе,
Кеш жақсы деген ештен де.
Темірді нанша илесе,
Құнды ғой балға төстен де.
Айгүл Түсіпбекова:
Босаған басы балғаның
Сала алмаса салмағын.
Темірдің иі қанбаса,
Шайнаумен өтер бармағын!
Құдайберлі Мырзабеков:
Ұғарсың бәрін өскенде,
Көрмеген затты тексерме.
Сенбейсің сонша, қызуың
Елуге жетпей өшкен бе?!
Арқада ару сен едің,
Айдында аққу деп едім.
Сексенге неге шүйліктің,
Ұға алмай қалдым себебін.
Айгүл Түсіпбекова:
Көкшедегі серісің,
Айтысқанда перісің.
Сексеннен асқан атам бар
Теріс киген кебісін.
Сол атама ұқсайды
Шалдың бәрі мен үшін.
Құдайберлі Мырзабеков:
Атаң - ата сен үшін,
Тексере алмайсың желісін.
Әркім жейді өзінше
Қолы жеткен жемісін.
Айгүл Түсіпбекова:
Тана көзін сүзіпті,
Буыршын бұйдасын үзіпті.
Бұл тақырып шынымен
Сиырлардан қызықты!
Ал, халайық, ендеше,
Нұрғалиұлын әкелер
Күтейік қос сызықты!
Құдайберлі Мырзабеков:
Қоймадың, құрбым, тек сен де,
Еркекті таптап өкшеңде.
Жаратқан жоқ қой әйелді
Еркекті билеп- төстеуге.
Кім айтты саған сексенде
Болмайды деп төс жеуге?
Айгүл Түсіпбекова:
Айтыстың керіп желкенін,
Қарық болды-ау ел тегін.
Есім шығып кетеді,
Есіме түссе ертеңім.
Сексенге жарым келгенде,
Мен қандай күйді шертемін?!
Тапқаны жөн-ау, әйтсе де,
Тезек - қабын, тең-теңін.
Құдайберлі Мырзабеков:
Мен сен болсам, байыма,
Тоқал әперем деуші едім!
Айгүл Түсіпбекова:
Жас тоқалдан әдемі
Барлық еркек дәмелі.
Бәйтеректей боп мәуелі,
Сексенге келсін әуелі.
Ал әзірше жетеді
Бір қатынның әлегі!
Құдайберлі Мырзабеков:
Кетірме, Айгүл, зәрені,
Байың қандай... "шал" еді!
Кебісін теріс киетін,
Шал етпексің, әне, оны.
Басымызға құдайым,
Бермесін ондай бәлені!)))
Айгүл Түсіпбекова:
Сексенде шалдар "қуады",
Белді өзінше буады.
Өгізге туған күн, Құдаш,
Бұзауға да туады!
Құдайберлі Мырзабеков:
Алланың түссе шуағы,
Дүниенің болмас дуалы.
Шалдың да шалы болады,
Қуа алса ғана "қуады".
Еңбегін шалдың еш етпей,
Туа алған қатын туады!
Абзал Қасенов:
Табылып жастан сыңары,
Біріне бірі ұнады.
Махаббат - үлкен құдырет,
Сүйгеннің қансын құмары.
Интернетте ел шулап,
"Ерсі" деп жатыр бұлары.
Жадыраны жар еткен,
Нұрғали - елдің қыраны!
(Абзалдың осы шумағына тоқтадым)
Айгүл Түсіпбекова:
Кері кеткен заманның
Сиқынан қайда қашасың?
Шал да болса, қатқан шал,
Шаң қаппасын шашасын!
Сексендегі серілер -
Нұрекеңдер жасасын!