Pechda tillarangga kirgunicha pishiriladigan kartoshka va tunets balig’idan tayyorlangan sous. Mana bunday yegulik dasturxoningizga ko’rk berishi aniq. Paprika va rozmarindan taralgan ifor esa xonadoningizni bir pastda chulg’ab oladi, dasturxon davrasiga bir zumda barchani yig'adi.
Kerakli masalliqlar:
700-800 gramm kartoshka
1 osh qoshiq quritilgan qalampir (paprika)
1 osh qoshiq rozmarin
1 osh qoshiq o'simlik yog'i
1/2 choy qoshiq tuz
Sous uchun:
200 gramm konservalangan tunets balig'i
1 choy qoshiq xantal donachalari
1 dona sarimsoq tishchasi
1 osh qoshiq mayonez
ta'bga ko'ra tuz
Tayyorlash usuli:
1. Kartoshkani yuvib, bo'laklarga bo'lamiz. Kartoshkalarni idishga solib, ustidan ziravorlar sepamiz va o'simlik yog'ini quyib, aralashtirib olamiz.
2. Kartoshkalarni pergament qog'oz ustiga to'shaymiz. 180 C darajada qizigan pechda 30-40 daqiqa davomida pishirib olamiz. Pishganligini sanchiq yordamida tekshiramiz.
3. Sousni tayyorlaymiz. Barcha masalliqlarni bitta idishga solamiz. Blenderda ezib, silliq holatga keltiramiz. Kartoshka va tayyor sousni darhol dasturxonga torting. Mazali yegulik ham tayyor!
Yoqimli ishtaxa!