Sizlarga taqdim etiladigan bugungi retsept tayyorlanishi oddiy, mazasi esa barcha uchun manzur bo'ladi. Kechki ovqatdan so'ng ushbu shirinlik mazali desert o'rnini bemalol egallay oladi. Yengil va nozik ushbu shirinlikni albatta tayyorlang !
Kerakli masalliqlar :
500 gramm olma
300 gramm shakar
1 dona tuxum oqi
1 dona vanilin tayoqchasi yoki 2 choy qoshiq vanilin shakari
Sirop uchun :
400 gramm shakar
150 ml suv
10 gramm agar-agar kukuni
Tayyorlash usullari :
1. Olmani tozalang va 4 qismga bo'ling.
2. Tayyorlangan olmalarni falga qog'oziga o'rang va pishirish qolipiga soling.
3. Tayyorlangan olmalarni 180 darajada qizdirilgan gaz pechida 25-30 daqiqa davomida pishiring. Sovuting.
4. Sovutilgan olmani blender yordamida olma pyuresini tayyorlang.
5. Agar-agar kukunini 30 daqiqaga suvda uyuting.
6. Vanilin tayoqchasini o'rtasidan ikki qismga bo'ling va ichki qismini ajrating.
7. Mikser idishida olma pyuresi, tuxum oqi, vanilin tayoqchasining ichki qismini birlashtiring. Ko'pirtiring.
8. Uyutilgan agar-agar kukunini qaynash darajasiga olib boring va shakarni birlashtiring.
9. Shakar solingandan so'ng, 5 daqiqa davomida past olovda qaynating.
10. Olma pyuresi aralashmasiga tayyorlangan siropni qaynoq holida qo'shing va yaxshilab ko'pirtiring. Natijada yengil va zich, shaklini ushlab tura oladigan massa hosil bo'lishi lozim.
11. Pergament qog'ozi yozilgan pishirish qolipiga tayyorlangan massadan choy qoshiq yoki maxsus konditer shpritsi yordamida shakllar chiqaring. Tayyor zefirlarni 3-4 soatga xona haroratida qoldiring.
12. Belgilangan vaqt o'tishi bilan tayyorlangan lazzatbaxsh shirinlikni yaqinlaringiz bilan baham ko'ring.
Yoqimli ishtaxa !