Սամվել Բաբայան. «Եկել եմ մեր երկրի պաշտպանվածությունն ուժեղացնելու»

2020թ. սեպտեմբերի 1-ին, Տիգրանակերտ արգելավայրի տարածքում, տեղի է ունեցել հանդիպում ԱՀ Անվտանգության խորհրդի քարտուղար Սամվել Բաբայանի ու Արցախի հասարակական կազմակերպությունների, կուսակցությունների երիտասարդական թևերի ներկայացուցիչների հետ: Նպատակը, ինչպես նշել է ԱԽ քարտուղարը, երիտասարդության կարծիքներին ու գաղափարներին ծանոթանալն էր:

Սամվել Բաբայանը ունի մեկ տեղակալ՝ ի դեմս Լեոնիդ Ծատրյանի: Նա նշեց, որ Անվտանգության խորհրդի կազմը շատ մեծ չէ: «Բայց մենք չենք հրապարակելու կազմը, որ դուք միշտ փորձեք փորփրեք, գտնեք, տեսնեք իրոք ինչքան հոգի է»:

Սամվել Բաբայանը նաև քննադատել է ՀՀ և Արցախի նախկին իշխանություններին, նշելով, որ վերջիններս քսան տարի թալանել են երկիրը: Հարցին, թե այդ դեպքում ինչու՞ է նա համագործակցում Արայիկ Հարությունյանի հետ, չէ՞ որ նա էլ եղել է նախկին իշխանության մաս, պատասխանեց. «Արայիկ Հարությունյանի հետ աշխատում եմ, աշխատում եմ օրենքով և կոնկրետ հուշագրի շրջանակներում: Առաջներում ինչ է եղել, ես չգիտեմ»:

Հնչել է նաև հարց այն մասին, թե արդյո՞ք նրա կողմնակիցները, որոնք եղել են Արայիկ Հարությունյանի վառ ընդդիմախոսները, չեն հիասթափվել վերջինիս հետ նրա համագործակցությունից:

«Ես չեմ եկել մտածելու, թե ով է հիասթափություն ապրում: Ես եկել եմ մեր երկրի պաշտպանվածությունը ուժեղացնելու, տնտեսությունը զարգացնելու»,-նշել է Սամվել Բաբայանը: Նա նշեց, որ արդյունքը կերևա հունվարին, երբ պարզ կլինի՝ առաջ ինչքան էին ստանում ու հետո՝ ինչքան:

Ալյոնա Հայրապետյան

http://www.artsakhnow.am/%d5%bd%d5%a1%d5%b4%d5%be%d5%a5%d5%ac-%d5%a2%d5%a1%d5%a2%d5%a1%d5%b5%d5%a1%d5%b6-%d5%a5%d5%af%d5%a5%d5%ac-%d5%a5%d5%b4-%d5%b4%d5%a5%d6%80-%d5%a5%d6%80%d5%af%d6%80%d5%ab-%d5%ba%d5%a1%d5%b7%d5%bf/