Европа Чемпионлар лигаси чорак финал жавоб баҳсидан ўрин олган «Реал» – «Ювентус» учрашуви ўз ниҳоясига етди. «Сантьяго Бернабеу» бўлиб ўтган баҳсда меҳмонлар 3:1 ҳисобдаги ғалабани қўлга киритдилар.
Биринчи бўлим 2-дақиқасидаёқ туринликлар ҳисобда олдинга чиқиб олишди. Сами Хедиранинг ўнг қанотдан узатиб берган тўпини Марио Манжукич боши билан Кейлор Навас дарвозасига жойлаб қўйди.
Ушбу голдан ўзига келган мадридликлар устунликни ўз қўлларига олишди ва бир нечта хавфли ҳужумлар уюштиришди, бироқ улардан фойдаланиш мезбонларга насиб қилмади.
Биринчи бўлим охирига яқин Стефан Лихтштайнер ўнг қанотдан жарима майдонига узатмани амалга оширди, бу ерда яна Манжукич Даниэль Карвахальдан устун келди ва боши билан тўпни дарвозага аниқ йўналтирди.
61-дақиқада мезбонлар дарвозабони Кейлор Навас тўпни тутиб олишда хатога йўл қўйди, бундан фойдаланган Блез Матьюди жамоасининг учинчи голини урди.
Ўйиннинг ҳакам томонидан қўшиб берилган сўнгги дақиқасида Бенатия ўз жарима майдони ичида Лукас Васкесни қўполлик билан йиқитди. Натижада ҳакам пенальти белгилади ва бу туринлик футболчиларини ғазабга келтирди. Натижада Буффон қизил карточка олиб майдонни тарк этди, 11 метрлик жарима жарбасини Криштиану Роналду аниқ бажариб жамоасини кейинги босқичга олиб чиқди.
Шу тариқа, «Реал» икки ўйин натижасига кўра туринликлардан устун келди ва ЕЧЛнинг ярим финалига йўлланмани қўлга киритди.
ЕЧЛ, Чорак финал
Реал Мадрид Испания – Ювентус Италия 1:3 (0:2, 1:1)
Голлар: 0:1 – 2 Манжукич, 0:2 – 37 Манджукич, 0:3 – 60 Матюиди, 1:3 – 90+7, пенальти Роналду.
Реал Мадрид – Навас, Варан, Марсело, Карвахаль, Вальехо, Иско, Каземиро (Васкес, 46), Кроос, Модрич (Ковачич, 75), Бэйл (Асенсио, 46), Роналду.
Ювентус – Буффон, Бенатия, Алекс Сандро, Де Шильо (Лихтштайнер, 17), Кьеллини, Пьянич, Хедира, Матюиди, Дуглас Коста, Манджукич, Игуаин (Шченсны, 90).
Огоҳлантиришлар: Пьянич (17), Карвахаль (22), Манджукич (29), Лихтштайнер (36), Алекс Сандро (67), Дуглас Коста (73), Марсело (81), Бенатия (90), Роналду (90+8).
Четлатиш: Буффон (90+3).
Илк ўйин: 3:0
Манба: www.uff.uz