1. Башкорт халык җыры I
Кара да гынай урман, караңгы төн,
Яхшы атлар кирәк лә үтәргә;
Карурманны чыккан чакта
Кисеп алдым пар усак,
Ай, аерылмас дус булсак.
Заманалар авыр, еллар ябык,
Дус-иш кирәк гомер итәргә;
Карурманны чыккан чакта
Кисеп алдым пар каен,
Ай, аерылмаек, дускаем.
Кара да гына елан, ай, туз башлы,
Йөридер лә камыш буенча;
Карурманга кергән чакта
Кисеп алдым пар усак,
Ай, аерылмас дус булсак.
Ялгыз башым, юк юлдашым,
Йөримен лә язмыш буенча;
Карурманга кергән чакта
Кисеп алдым пар каен,
Ай, аерылмаек, дускаем.
Кара да гына урман, караңгы төн,
Нинди юллар белән лә үтәрбез;
Карурманны чыккан чакта
Кисеп алдым пар усак,
Ай, аерылмас дус булсак.
Дус-иш белән бергә эш иткәндә,
Теләкләргә тизрәк лә җитәрбез;
Карурманны чыккан чакта
Кисеп алдым пар каен,
Ай, аерылмаек, дускаем.
2. Татар халык җыры
Карурманны кичкән чакта
Менеп кичтем акбүз атка;
Карурман кергәч,
Карурман кергәч.
Юллар таш кына,
Күңелем ашкына.
Егет булсаң, дан югалтма
Куркакларга төзәп уклар атма!
Карурман кергәч,
Карурман кергәч,
Төннәр караңгы,
Зиһенем таралды.
Карурманның уртасында
Төлке уйный торган урлар бар;
Карурман кергәч.
Карурман кергәч.
Кошлар сайраша,
Хәйран тамаша.
Типсен йөрәк, сүнмәсен дәрт,
Дәртлеләргэ якты юллар бар.
Карурман кергәч,
Карурман кергәч,
Юллар таш кына.
Күңелем ашкына.
3. Салих Сәйдәшев көе, Кәрим Тинчурин сүзләре («Зәңгәр шәл» мелодрамасыннан)
Кара урман шаулый, ирек даулый,
Ирек даулый качкын егетләргә.
Кара урман төсле шаулый-шаулый
Дошманнарның көнен төн итәргә.
Кара урман шаулый,
Йөрәкләр ярсый,
Йөрәкләр ярсый,
Тоткын җәнлектәй;
Кара урман шаулый,
Эчтә ут кайный.
Эчтә ут кайный,
Кайда син, Бибкәй?
Кара урман кара күләгәсе
Яшерә алмый качкын эзләрен.
Кара йөрәк — патша күрәзәсе
Эттәй чаба качкын эзеннән.
Кара урман шаулый,
Йөрәкләр ярсый,
Йөрәкләр ярсый,
Тоткын җәнлектәй;
Кара урман шаулый,
Эчтә ут кайный.
Эчтә ут кайный,
Кайда син, Бибкәй?
4. Башкорт халык җыры II
Кара да гынай урман, караңгы төн,
Яхшы атлар кирәк лә үтәргә;
Карурманга кергән чакта,
Кошлар сайраган чакта,
Ай, бигърәк моңсу шул чакта.
Заманалар авыр, еллар ябык,
Дус-иш кирәк дөнъя көткәндә.
Карурманны чыккан чакта
Кисеп алдым пар каен,
Ай, аерылмаек, дускаем.