Башҡортостанда 339 меңдән ашыу йәш кеше «Пушкин картаһы»н файҙаланған

Башҡортостанда йәшәгән 339 меңдән ашыу йәш кеше «Ғаилә» (национальный проект «Семья») милли проектының «Пушкин картаһы» программаһын әүҙем ҡуллана. Был 14-22 йәштәге йәштәрҙең 80 процентын тәшкил итә. Был хаҡта республика Хөкүмәте хәбәр итә. Ваҡиғаларҙың юғары сифатын тәьмин итеү өсөн республикала ике эксперт советы эшләй. «Пушкин картаһы» майҙансығында иң яҡшы ваҡиғалар ғына теркәлә. Реестрға бөтәһе 42 меңдән ашыу мәҙәни ваҡиға: сәнғәт эшмәкәрҙәре менән ижади осрашыуҙар (36,8%), уҡытыу саралары (24,4%) һәм кино күрһәтеү (16%) индерелгән. Проектҡа 389 ойошма йәлеп ителгән, ә йыл аҙағына уларҙың һанын 411-гә тиклем арттырыу күҙаллана. Икенсе йыл рәттән «Пушкин картаһы. Премия» премияһы тапшырыла һәм быға Хөсәйен Әхмәтов исемендәге Башҡорт дәүләт филармонияһы лайыҡ була. Ағымдағы мөһим бурыстарҙың береһе - банк-операторҙы алмаштырыу. «Йыл аҙағына тиклем республика йәштәре ВТБ банкында карта сығарыуға йәки яңынан сығарыуға ғариза бирергә тейеш. Балаларыбыҙға ошо мәлде үткәрмәҫкә һәм илдең дөйөм мәҙәни киңлегендә ҡалырға ярҙам итеү бик мөһим». Яңы операторға күсеү 2026 йылдың 1 ғинуарына тамамланырға тейеш», - тине Башҡортостандың Мәҙәниәт министры Әминә Шафиҡова. Яңыртылған милли проекттар, Рәсәй Президенты Владимир Путиндың ҡарары буйынса, 2025 йылдан тормошҡа ашырыла. Фото: БР Мәҙәниәт министрлығы Беҙҙең МАХ каналына https://max.ru/gazetabashkortostan ҡушылығыҙ!