Акафист преподобному Давиду Гареджийскомую
Тропарь общий, глас 8
Тропарь, гл.4
Слез твоих тече́ньми пустыни безплодное возделал еси,/ и иже из глубины воздыха́ньми во сто трудов уплодоноси́л еси,/ и был еси светильник вселенней,/ сияя чудесы, Давиде отче наш,/ моли Христа Бога/ спастися душам нашим.
Ин Тропарь, глас 4
Лику́ет днесь мно́жество ве́рных,/ пусты́ня Гариджи́йская весели́тся,/ в па́мяти отца́ на́шего Дави́да богому́дрого./ Прииди́те вси цели́теля на́шего и изря́дного чудотво́рца восхва́лим,/ и к нему́ с ве́рою и упова́нием возопие́м:/ моли́ся за ны ко Го́споду, преподо́бне,/ ниспосла́ти нам дух любве́ и смиреному́дрия,/ боля́щим исцеле́ние, Це́ркви утвержде́ние,/ мир и ве́лию ми́лость.
Кондак, глас 8
От сирийских источников возшел еси, звездо пресветлая,/ и пустыню Гареджийскую сиянием Духа озарил еси;/ яко пришествием своим иноческий рай соделал еси,/ произрастив в пустыне словесный вертоград./ Сего ради не оставляй хранити его,/ Давиде возлюбленный.
Ин Кондак, глас 2
Любо́вию ко Го́споду и бли́жним пламене́я,/ слеза́ми мно́гими бесстра́стия дости́гл еси́,/ боле́знуя се́рдцем о всех с ве́рою к тебе́ притека́ющих,/ чуде́с исто́чник незави́стный яви́лся еси́./ Сего́ ра́ди и мы, ча́да твоя, с р́адостью вопие́м ти:/ ра́дуйся, Дави́де, преподо́бне о́тче наш.
Кондак 1
Избранный Божий угодниче и предивный чудотворче,/ пустыни Гариджийской процветение,/ и за весь мир теплый к Богу молитвениче,/ преподобне отче наш Давиде./ Прославляем прославляющаго Тя Господа,/ толи́кую благодать даровавшего тебе исцелений,/ благодарственное возглашаем пение,/ и радостно зовем ти:/ радуйся, преподобне отче наш Давиде,/ преславный чудотворче и теплый о нас к Богу молитвениче.
Икос 1
Ангелом любезную чистоту от юности твоея возлюбив, преподобне отче наш Давиде, к добродетелей подвижнику, преподобному Иоанну, притекл еси́, с ним же непорочное житие совершил еси. Темже ныне со Бесплотными и всеми святыми во обителях райских водворя́ешися и от нас, чтущих тя, слышиши сия пе́сенныя похвалы:
Радуйся, Каппадоки́и святое прозябение;
Радуйся, Иверии многоплодное процветение.
Радуйся, на высоту духовную восше́дый;
Радуйся, во плоти, яко безплотен пожи́вый.
Радуйся, любве учителя твоего Иоанна ко братии подражателю;
Радуйся, заповедей Божиих ревностный исполнителю.
Радуйся, постом душетленныя страсти умертвивый;
Радуйся, молитвами усердными вся искушения диавольския отразивый.
Радуйся, силою Божию вражию гордыню низложивый;
Радуйся, узкий путь и тесныя врата ко спасению избравый.
Радуйся, яко нечестивыми служителями Зо́ры гонимый, венец неувядаемый от Господа восприявый;
Радуйся, яко на Небеси и на земли от Бога прославленный.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 2
Ви́дя, учитель твой преподобный Иоанн, яко ты сосуд Божий избра́нный бысть, зело́ дивя́щеся таково́му богоуго́дному житию твоему, благодаряще Бога и со умиле́нием поя́ Ему: Аллилуиа.
Икос 2
Разумом, от Духа Святаго просвященным, учитель твой, преподобне отче наш Давиде, провидя твою ревность о славе Божией, посла тя во град Тифли́с, неверием лю́те одержи́мый. Ты же слезы многие о людях во гресе́х погибающих проливая и словесы́ медоточными их напояя, многих ко Христу привел еси, сего ради вопием ти таковая:
Радуйся, светильниче многосветлый Земли Иверския;
Радуйся, силою свыше просвещенный.
Радуйся, множество неверных ко Христу обративый;
Радуйся, талант от Бога тебе данный преумноживый.
Радуйся, слез источники за люди, во гресе́х погибающих, непрестанно проливавый;
Радуйся, благоволением Владычицы мира, в Ея уделе неленостно трудивыйся.
Радуйся, яко сердце твое храм бысть Триипостасному Богу;
Радуйся, ближних твоих всем сердцем возлюбивый.
Радуйся, душу свою за чада положивый;
Радуйся, непрестанные молитвы ко Господу возносивый.
Радуйся, кающихся пред Господом Богом крепкое заступление;
Радуйся, благий ра́бе, верный и добрый делателю винограда Христова.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 3
Сила Вышняго осени тя, преподобне, егда́ нечестивые огнепоклонники оклевета́ху тя в прелюбодеянии. Ты же, явившись на суд, коснуся жезло́м чрева жены̂, воспросил еси: -"Чадо, скажи, я ли твой отец", отвеща́ше же из утробы младенец рече́: - "не ты, а кузнец". Видя таковое чудо, многие уверовавше во Христа, и возопи́ста Ему: Аллилуиа.
Икос 3
Имея велие произволение, е́же то́кмо Богу угодити, презре́л еси славу человеческую, богомудре, и, суету житейского града оставив, на ма́нтию, яко на ладию́, восше́д, с учеником твоим Лукиа́ном по волна́м достигл еси пустыню Гариджи́йскую. И та́мо всели́вся, житие́ твое́ богоуго́дное сконча́л еси́. Мы́ же, дивя́щеся таково́му о тебе́ Бо́жию промышле́нию, со умиле́нием вопие́м ти́:
Ра́дуйся, мирски́я суеты́ отреши́выйся;
Ра́дуйся, Небе́снаго Оте́чества пла́менне возжела́вый.
Ра́дуйся, Христа́ все́м се́рдцем возлюби́вый;
Ра́дуйся, благо́е и́го Христо́во на себе́ восприе́мый.
Радуйся, безмолвия любителю;
Радуйся, пустыню подвигами твоими освятивый.
Радуйся, мужественно скорби и клевету претерпевый;
Радуйся, все упование на Бога возложивый.
Радуйся, крепости и мужества тезоименитый подвижниче;
Радуйся, огнем молитв твоих силу вражию поразивый.
Радуйся, на высоту духовную возшедый;
Радуйся, во плоти, яко безплотен пожи́вый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 4
Бурю житейских попечений оставив, преподобне отче наш Давиде, со учеником твоим Лукианом в пустыне водворился еси. И многие труды и скорби подъемля, обитель новую создал еси во славу Господа и Богородицы. И ныне мо́лишися ко Господу, да пребудет благодать на месте сем и да неоскудеет обитель твоя, но да славится в ней Святая Троица хвалебной песней: Аллилуиа.
Икос 4
Слыша милосердый Господь многая твоя моления о ученице́, малоду́шием коле́блемом, восхоте́ воспо́лнити скудость вашу, посла еле́ни в пустыни, да вас питают млеко́м. Сие чудо зряще, вопием ти таковая:
Радуйся, кри́не благоуханный пустыннаго прозябе́ния;
Радуйся, иго Христово благое и легкое возлюбивый.
Радуйся, крест скорбей и лишений пустынных терпеливо носивый;
Радуйся, в пустыни Гариджийской сад духовный многоцветущий насадивый.
Радуйся, в худы́х многошве́нных ризах коленопреклоне́ния мно́гия совершивый;
Радуйся, воине Христов непобедимый.
Ра́дуйся, в пустыни пото́к водны́й тещи́ у Бо́га испроси́вый;
Ра́дуйся, я́ко та́яжде вода́, моли́твою твое́ю исцеля́ющи неду́ги, чудоде́йствует.
Радуйся, постниче, коре́ньями пустыни пита́выйся;
Радуйся, еле́ни, Богом посланные тебе, в пустыни име́вый.
Радуйся, я́коже Христос в телеси, тамо же и ты пребываеши;
Радуйся, великий угодниче Божий, еще на земли благодатную силу чудес получивый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 5
Божественной силой дивная и преславная чудеса явил еси, преподобне отче наш Давиде, зверя лю́таго истребил еси и брата твоего Лукиана, прилоги вра́жиими умершле́нного, воскресил еси. Сего ради прославляем Бога, дивного во святых своих, и вопием Ему: Аллилуиа.
Икос5
Ви́дяще звероло́ви тя, преподобне, яко сокровище в пустыни сокровенное, со страхом и радостию стопам твоим припадо́ша и моли́ша, да прии́меши их в твою обитель, мы же таковому их произволению дивя́щеся, вопием ти:
Радуйся, обитель иноческую в пустныни основавый;
Радуйся, богоноснаго Иоанна правила и уставы в ней утвердивый.
Радуйся, со́браннаго тобою стада словесных овец, пастырю добрый;
Радуйся, за братию твою душу положивый.
Радуйся, отца твоего духовнаго совершенный подражателю;
Радуйся, обители твоея славо и удобрение.
Радуйся, отче милостивый и кроткий;
Радуйся, от Господа нетленный венец приявый.
Радуйся, пламенную любовь ко Господу показавый;
Радуйся, монахов премудрый наставниче.
Радуйся, алчущим и жаждущим правды словесы́ твоими насы́тивый;
Радуйся, и́щущим пути спасительнаго указателю.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 6
Пропове́дником святости жития твоего явился преподобне отче Додо́, той бо любовь велию к тебе имея, яко сын пред отцем, яко ученик пред учителем ше́ствовавый, по слову твоему новую обитель во славу Господа и Богородицы воздви́же, да воспевается в ней хвалебная песнь: Аллилуия.
Икос 6
Возсиял еси, яко богосветлое светило и яко источник приснотеку́щий благодати, в пустыни Гареджийской, преподобне отче наш Давиде, всех просвещая и напоя́я медоточными словесы твоими души и сердца челове́ков, и́щущих спасение. Темже и нас не остави, отче, твоими молитвами, да радостно зовем ти хвалебно:
Радуйся, смирением гордыню поправый;
Радуйся, кротостию ярость угасивый.
Радуйся, на мысленныя враги, пост, молитвы и коленопреклоне́ния употребивый;
Радуйся, крыла́ми богомыслия сети вра́жии сокрушивый.
Радуйся, в пустыне непроходимой вертогра́д духовный насадивый;
Радуйся, добрый де́лателю винограда Христова.
Радуйся, чудотворения даром обогаще́нный;
Радуйся, силою Божественною преиспо́лненный.
Радуйся, похвалами молитвенными до днесь в обители твоей почитаемый;
Радуйся, пустыни Гареджийской похваление.
Радуйся, венец неувядаемый от Господа восприявый;
Радуйся, помощь целебную всем ту́не подававый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак7
Хотя́ избавити от вечныя муки воево́ду, неве́рием лю́те одержимаго и мечь на тя просте́ршего, ру́ку его окамене́нную исцелил еси и сим ко истинней вере привел еси. Темже и мы твое милосердие воспомина́юще, прославляем Бога, не хотящаго смерти грешника, богокрасною песнею: Аллилуиа.
Икос 7
Новаго ви́дяще тя избранника Божия, преподобне отче Давиде, ты бо не то́кмо ва́рвара, но и сына его издале́ча су́ща исцелил еси. Сего ради воевода сей крещение восприим и в благодарность церковь велию во обители твоей устроил еси, иде́же ты мощами со учеником твоим досе́ле почиваеши и слышиши от нас поющих тебе сицевая:
Радуйся, любовь велию ко Господу и ближним стяжа́вый;
Радуйся, за сие́ от Христа зело́ возлюбленный.
Радуйся, за обидящих тя молитвенниче усердный;
Радуйся, иссо́хшую ру́ку воеводы, хотя́ща тя убити, милостивно исцеливый.
Радуйся, сим к истинной вере того обративый;
Радуйся, сына его издале́ча от одра́ боле́зненнаго именем Хрисовым воздвигнувый.
Радуйся, мирова́рнице на всяк недуг врачевания подающая;
Радуйся, безмездно паче естества врачу́ скороми́лостиве.
Радуйся, милости превеликия и скорбным сострадания сокровище;
Радуйся, увеселение и отрада к тебе прибегающих.
Радуйся, яко вторы́й Моисей, в пустыни горькую воду усладивый;
Радуйся, твоими стопами пустыню Гареджийскую освятивый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 8
Странное и чудное зрим о тебе, преподобне, яко ты божественною любовию ко Господу распала́ем, восхоте́ Святаго Гра́да Иерусалима достигнути. Со учеником своим Лукианом путь нелегкий проше́д, Землю обетова́нную издале́ча облабызал еси и, взяв три ка́́мня, всю благодать Святой Земли восприял еси, поя Богу: Аллилуиа.
Икос8
Весь ужасом одержи́м бысть Патриарх Илия́, егда́ проразуме́, яко ты еси всю благодать Иерусалима в трие́х ка́мнях унесе́, посла тя разыска́ти и возврати́ти. Ты же, смирением укра́шен, один камень сохрани, и в обитель свою принесе́. Мы же до сего дне во обители твоей сей иму́ще, тебе хвалебно взываем:
Радуйся, богоносе, дарами божественными свыше обогащенный;
Радуйся, ма́слина, елей милости Божией источающая.
Радуйся, преподобне, святостию и чистотою светло украше́нный.
Радуйся, сокровище великое, обители твоея присно дарова́ное.
Радуйся, Горняго Иерусалима блаженный обитателю;
Радуйся, к Небесному Иерусалиму всем нам путеводителю.
Радуйся, благодатный камень, яко бисер драги́й из Святаго Гра́да принесший;
Радуйся, чрез сей камень многая чудеса и до ныне содеваеши.
Радуйся, Христов немолчный проповедниче;
Радуйся, апостольких преданий ревностный хранителю.
Радуйся, православия догма́ты в душе твоей до́бре утвердивый;
Радуйся, велию благодать за смирение твое получивый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 9
Все естество Ангельское удивися великому твоему свыше дарованию, яко пачесте́ственное житие являя, показался еси равноангелен на земли, преподобне отче наш Давиде, оставив вся житейская, направил стопы́ своя к Небесным Обителем. И ныне со бесплотными Силами Пресвятей Троице предстоищи и нас, чад твоих, воспоминаеши, поя Ей хвалебную песнь: Аллилуиа.
Икос 9
Вити́и многовеща́нные не возмогут по достоянию восхвалити равноангельного жития твоего. Ты бо весь облеклся еси во всеору́жие Божие, яко воин Христов, препоя́сав чресла́ твоя истиною, обле́клся в броню́ правды, и обув но́зе твои во угото́вание благовествова́ния мира, восприял еси щит веры и шлем спасения, и меч духовный, иже есть глагол Божий, имже возмо́гл еси вся наветы лукаваго победити. Помози и нам, преблаженне отче, твоими молитвами противиться искушениям вра́жиим и подражати тебе в побеждении страстей наших, да зовем ти:
Радуйся, жесто́кое пустынное житие проводивый;
Радуйся, на скрижа́лех сердца своего Закон Христов написавый.
Радуйся, все твое блаженство и утешение в нищете и нестяжании полагавый;
Радуйся, всего себе Богу предавый.
Радуйся, иноческаго жития ревнителю;
Радуйся, священная главо́, благодатию Божиею осененная.
Радуйся, образе истинного смирения;
Радуйся, венец неувядаемый от Господа восприявый.
Радуйся, полка́ и́ноческаго воеводо искусный;
Радуйся, пустынножи́телей мудрый руководителю.
Радуйся, безмолвия любителю;
Радуйся, все упование на Господа возложивый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 10
Спасение вечное унаследовал еси, преподобне отче, но и нас воспомина́еши: скорби облегча́еши, неду́ги врачу́еши, супру́гом неплодные узы разреша́еши, па́че же женских неду́г явился еси изрядный целитель. Сия вся воспоминающе, тебе благодарение приносим и Богу, тобою нам благоде́ющему, вопием немолчную песнь: Аллилуиа.
Икос 10
Стена еси тве́рдая и прибежище необоримое явился еси чадом твоим, угодниче Божий Давиде, ты бо грешныя на покаяние направил еси, кающихся уцеломудрил еси, подвизающихся в добродетели укрепил еси, всем путь спасительный ко Христу показал еси, сего ради взываем тебе сице:
Радуйся, безчадных родителей неплодия разрешение;
Радуйся, матерей детородя́щих скорое и безболезненое разрешение.
Радуйся, жен болящих исцеление;
Радуйся, молитвы и прошения наши во благо исполняющий.
Радуйся, смиренно мощами твоими в недрах земных почиваеши;
Радуйся, яко ра́ка твоя честная и благодатный камень, принесенный тобой, враче́бница явися недугом человеческим.
Радуйся, от них вси, с верою приходящие, дары целебныя приемлют;
Радуйся, чтущим тя скорый предстателю и всех прибегающих к тебе заступниче.
Радуйся, яко богомудрая пчела́, некта́р добродетелей трудолюбно в сердце своем собравый;
Радуйся, яко той на пользу ближним употребивый.
Радуйся, во смирении своем высокия дарования духовныя получивый;
Радуйся, реко́ чудес приснотеку́щая и исто́чниче исцелений, никогда́же оскудевающий.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 11
Пение умиленное приноша́ху ти бра́тия твоя, преподобне отче, егда́ святая твоя душа от земных преставля́щеся к Небесным, тогда у́бо ты со всеми проща́яся, всех благословляя и назида́я, Та́ин Христовых причасти́вся, в молитве усердной душу твою в ру́це Божии пре́дал еси, поя Ему: Аллилуиа.
Икос 11
Светозарное светило явился еси в земле́ И́верской, богомудре отче наш Давиде. Ты бо духовным сиянием подвигов и чудес твоих пустыню Гариджийскую просветил еси и та́мо стадо и́ноков собра́в, пресели́лся еси в Небесные обители. Иде́же ныне предстоя Престолу Святы́я Троицы, нас, чад твоих, воспомина́еши и слышиши возносимые тебе сия похвалы:
Радуйся, возше́дый на гору высокую добродетелей Божественных;
Радуйся, яко от обители земныя во обитель небесную водворился еси.
Радуйся, избра́нниче Христов, безболезненно и мирно преда́вый дух твой в ру́це Божии;
Радуйся, яко смерть твоя пред Го́сподем честна́.
Радуйся, яко успе́ние твое со святыми, и память твоя с похвалами;
Радуйся, яко со святыми блаженства вечнаго наслаждаешися.
Радуйся, со Ангельскими Во́и Творца Ангелов и челове́ков воспеваеши;
Радуйся, откровенным лице́м славу Трисия́тельнаго Божества созерцающий.
Радуйся, пересели́вшись в Небесныя обители и земных не оставляеши;
Радуйся, душе́ю безсмертною к Сио́ну горнему возлетевый.
Радуйся, великоименитый и многославный чудес подвижниче;
Радуйся, по кончине твоей слепорожде́нного и́нока преславно исцеливый.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 12
Благодать Божественную испроси нам, преподобне отче наш Давиде, почитающим любовию святую память твою и усердно притекающим к тебе, яко много может молитва твоя пред Всемилостивым Господом. Темже молим тя: исцели наши недуги душевныя и телесныя, помози́ нам, предста́тельством твоим, спасение вечное получити, да вку́пе с тобою воспои́м Дивному во Святых Своих Богу: Аллилуиа.
Икос 12
Пою́ще твоя чудеса, восхваляем тя, преподобне отче наш Давиде, твоими бо молитвами вся проше́ния наша во благо исполняются, болящие здравие получают, скорбящие утешаются, всякие страсти отгоняются. Темже молим тя, в час грозный, смертный, егда́ убо́гая душа наша к исходу своему прибли́жится, покажи нам многомо́щное твое заступление и исхити́ нас из руки́ лю́того мироде́ржца, сподобляя нас горних обителей, да зове́м ти благодарными гласы тако:
Радуйся, Пресвяты́я Троицы усердный служителю;
Радуйся, Пресвяты́я Владычицы Богородицы достойный избранниче.
Радуйся, Ангельских Сил светлый собеседниче;
Радуйся, Предте́че Госпо́дню пустынополю́бием подражателю.
Радуйся, Проро́ков Бо́жиих равностоя́телю;
Радуйся, Апостолов Христовых единонравный после́дователю.
Радуйся, мучеником уподобивыйся в по́двизех терпением;
Радуйся, святи́телем Богомудрым соревнова́вый душеспаси́тельным учением.
Радуйся, пустынножи́телей славо и похвало;
Радуйся, Иверския Це́ркви духовное украшение.
Радуйся, блаженный сожи́телю Праведных и всех Святых;
Радуйся, приходящих к тебе благи́й предста́телю.
Радуйся, преподобне отче наш Давиде,/ преславный чудотворче и теплый о нас к Богу молитвениче.
Кондак 13
О, великий уго́дниче Божий и великий чудотво́рче,/ преблаженне отче наш Давиде!/ Ты бо горе́ на Небеси́, мы, земли́ ни́зу,/ удалены́ от тебе не толи́ко ме́стом, ели́ко греха́ми нашими,/ оба́че дерза́ем приносити тебе малое похвальное пение,/ е́же милостиво прие́м,/ умоли милосерднаго Господа избавити нас гее́нны о́гненныя и мучений вечных,/ да сподобимся вку́пе с тобою во Ца́рствии Небе́сном/ пети Ему вечно радостную песнь:/ Аллилуиа, Аллилуиа, Аллилуиа.
Сей Кондак читается трижды, затем Икос 1 и Кондак 1.
Молитва первая преподобному Давиду Гареджийскому
О, священная главо́, преподобне отче наш Давиде, великий чудотворче! Припадаем к тебе с верою и любовию, и просим тя, небеснаго заступника нашего: яви велие милосердие твое нам, смиренным и грешным, и пролей теплыя молитвы твои о нас ко Господу Богу. Исхода́тайствуй нам здравие душевное и телесное, земли плодоно́сие, возду́ха благорастворение, мирное и безмятежное житие, и сохрани рабов, предстоящих и молящихся тебе, и осени небесным твоим благословением, и вся прошения их во благо исполни. Ей, отче, не пре́зри молитв наших, со умилением к тебе возносимых, но буди о нас теплый предстатель ко Господу Богу, да славословим великия щедроты и милости Отца и Сына и Святаго Духа, в Троице поклоняемаго Бога и твое отеческое заступление во веки веков. Аминь.
Молитва вторая преподобному Давиду Гареджийскому
О, всесветле, богохвальне авва Давиде, святче Божий! Ты силою благаго Законоположи́теля явился еси нам, кознями лукавого связанным и обуреваемым, яко наставник в покаянии и помощник в молитве. Того ради дано тебе много даров благодати и чудотворения, разрешения грехов наших и прегрешений оставление, болезней исцеление и диавольских наветов отгнание. Темже твоею отеческою милостию в богоца́рственном разумении, многотрудными молитвами и моленьми твоими, наипаче же непрестанным твоим заступлением о нас, да возставит Господь Бог ны, во грех впадшия, силою Своею непобедимою на всякаго видимаго и невидимаго врага, да́бы благодаряще совершая святую память твою, желанием возжелали мы покланятися Превечному Богу в Троице Единому, Отцу и Сыну и Святому Духу, ныне и присно и во веки веков. Аминь.
Ублажа́ем тя,/ преподо́бне о́тче наш Давиде,/ и чтим святу́ю па́мять твою́,/ наста́вниче мона́хов// и собесе́дниче А́нгелов.