Бөгөн Өфө тимер юл вокзалында Куйбышев тимер юлы проекты нигеҙендә булдырылған “Еңеү паровозы”н ҡаршы алыу тантанаһы уҙғарылды. Матур итеп буялған, платформаһына хәрби техника өлгөләре тейәгән паровоз гудоктарын ҡысҡырта-ҡысҡырта килеп туҡтағанда перронда халыҡ шығырым тулы ине – һуғыш һәм хеҙмәт ветерандары, йәштәр һәм мәктәп уҡыусылары, һәүәҫкәр артистар... Социаль селтәрҙәге иғланды күреп килгән баш ҡала халҡы ла байтаҡ. Составтың платформаһында ниндәй генә Бөйөк Ватан һуғышы иҫтәлектәре юҡ: танктар, бронемашиналар, пушкалар, зениткалар, ялан кухнялары, хәрби УАЗ-иктар һәм йөк автомашиналары... “Бөйөк Еңеү байрамы алдынан Өфөлә бөгөн ҙур ваҡиға бара – Еңеү паровозын ҡаршыланыҡ”, – тине Башҡортостан Хөкүмәте Премьер-министры урынбаҫары Рөстәм Ғәзизов үҙенең сығышында. – “Тап бына һеҙ әле күргән хәрби техника менән беҙҙең олатайҙар Бөйөк Еңеүҙе яулаған. Ул хәҙерге заман техникаһынан ныҡ айырыла, әлбиттә, ләкин беҙ шуны онотмаҫҡа тейеш – беҙҙең ҡеүәт ҡоралдан бигерәк Ватанды һөйөү рухының ғәйәт көслө булыуында”. Тантанала тәбрикләү һүҙҙәре менән шулай уҡ Куйбышев тимер юлы идаралығы етәксеһе урынбаҫары Дмитрий Новиков, Өфө ҡала хакимиәте башлығы урынбаҫары Владимир Жебровский һәм башҡалар сығыш яһаны. “Составты Һамар ҡалаһынан алып оҙатып йөрөйөм”, – тине ҡулына Шпагин автоматы тотҡан хәрби кейемдәге оло йәштәге ветеран Сергей Блохин. – “Беҙ, ирекмәндәр, Куйбышев тимер юлының һәр ҙур станцияһында туҡтап ошондай тантаналы митинг уҙғарабыҙ, Өфөнән һәң Стәрлетамаҡ яғына боролабыҙ, артабан кире Һамар яғына табан юл аласаҡбыҙ. Былар барыһы ла, күрәһегеҙ, Бөйөк Ватан һуғышының изге ҡомартҡылары, айырыуса йәштәрҙең һәм үҫмерҙәрҙең хәтерендә ҡаласаҡ улар – барыһын да ҡул менән тотоп ҡарарға мөмкин бит”. “Мин Еңеү паровозын ҡаршылауҙы көтөп алдым һәм ҙур теләк менән килдем, үҙем тимер юлсы булырға хыялланам, сөнки олатайым да, атайым да – тимер юлсылар”, – тине Өфө ҡалаһының 8-се мәктәбенең 9-сы класс уҡыусыһы Тимур. Айрат Нурмөхәмәтов фотолары.