Өфө ҡалаһындағы Ленин районының ЗАГС бүлегендә 50 йыл бергә йәшәгән тормош парҙарын тәбрикләү тантанаһы ойошторолдо. Алтын туйҙарын Наталья һәм Борис Комаровтар, Рәмзиә һәм Фәнис Йәнгировтар, Татьяна һәм Александр Шабалиндар, Гәүһәриә һәм Дамир Хановтар, Ирина һәм Сергей Чуйкиндар билдәләне. Юбилярҙарҙың уртаҡлашыр тормош хәтирәләре, иҫтәлектәре етерлек. Улар ауырлыҡтарҙы нисек еңеүҙәре, уңыштарға ирешеүе хаҡында тулҡынланып һөйләне. Тантанаға килгән балалары һәм ейәндәре өлкәндәрҙең шатлығын уртаҡлашты. Тормош юбилярҙарына Башҡортостан Башлығы исеменән иҫтәлекле бүләктәр һәм ҡотлау адресы тапшырылды. Әҙеһәм Исҡужин исемендәге 9-сы балалар музыка мәктәбе уҡытыусыларының сығышы байрамды йәмләне, онотолмаҫлыҡ сараға әүерелдерҙе. Күркәм парҙарға һаулыҡ, имен тормош теләйбеҙ, йәштәргә матур өлгө булып, ҡыуандырып йәшәгеҙ! Фото: Башҡортостан дәүләт юстиция комитеты.