Һәләк булғандарҙың ғаиләләренә генерал Шайморатов ордены тапшырылды

Башҡортостан Башлығы Радий Хәбиров Нефтекамалағы эш сәфәрендә махсус хәрби операцияла һәләк булғандарҙың ғаиләләренә генерал Шайморатов ордены тапшырҙы. Башҡортостан Башлығы Радий Хәбиров ҡаланың МХО-ла ҡатнашыусыларҙың һәм уларҙың ғаиләһенә ярҙам итеү үҙәгендә хәрби операцияла һәләк булған Денис Богданов, Валерий Фаршатов, Альберт Латипов, Артём Бурасов, Руслан Әхмәҙиев, Андрей Ташкинов, Тимур Стогов, Илмир Вилданов, Рөстәм Вәлиевтең ата-әсәләре һәм ҡатындары менән осрашты. Төбәк етәксеһе һәләк булған хәрбиҙәрҙең ғаиләләренә ихлас ҡайғы уртаҡлашыуын белдерҙе һәм яугирҙәр хәрби бурыстарҙы үтәгәндә күрһәткән батырлыҡтары һәм ҡаһарманлыҡтары өсөн үлгәндән һуң лайыҡ булған генерал Шайморатов орденын тапшырҙы. - Улдарығыҙ өсөн ҙур рәхмәт. Улар - ысын геройҙар, һеҙ улар менән ғорурлана алаһығыҙ. Беҙ һеҙҙең ҡайғығыҙҙы уртаҡлашабыҙ һәм һеҙҙең менән бергә ҡайғырабыҙ, -тине Радий Хәбиров. – Һәләк булған яугирҙәрҙең ата-әсәләре Республика кардиология үҙәгендә һауыҡтырыу һәм дауалау курстары үтә ала. Күптәр бындай мөмкинлекте файҙаланды. Һәләк булған хәрбирҙәрҙең ғаиләләре тураһында ҡайғыртыу – муниципалитет башлыҡтарының туранан-тура бурысы. Улар шулай уҡ һәләк булғандарҙың иҫтәлеген мәңгеләштереү сараларын да күрергә тейеш. Һис шикһеҙ, беҙ һәр ваҡыт хәстәрлек күрһәтәсәкбеҙ, һәләк булған яугирҙәрҙең ата-әсәләрен, уларҙың ғаиләләрен, балаларын иғтибар менән уратып аласаҡбыҙ. Ә уларҙың балаларын бар республика менән аяҡҡа баҫтырасаҡбыҙ. Башҡортостан Башлығы Өфөлә махсус хәрби операцияла һәләк булғандарҙың иҫтәлегенә бағышлап мемориал төҙөргә планлаштырылыуы хаҡында ла хәбәр итте. Фото: Башҡортостан Башлығы сайтынан.