Бәләбәй районында авария теркәлде: квадроциклда ике малай гаражға барып бәрелгән. Был турала республиканың Ғәҙәттән тыш хәлдәр буйынса дәүләт комитеты матбуғат хеҙмәте хәбәр итә. Кисә 112 системаһының Шылтыратыуҙарҙы эшкәртеү үҙәгенә Бәләбәй районының Знаменка ауылында квадроцикл менән ике малайҙың гаражға барып бәрелеүе тураһында хәбәр килә. “Ваҡиға һөҙөмтәһендә 12 һәм 13 йәшлек балалар зыян күргән. Ике малай ҙа Башҡортостандың Бәләбәй үҙәк район дауаханаһына оҙатылған. Иҫегеҙгә төшөрәбеҙ, квадроцикл менән 16 йәштән генә идара итергә мөмкин! Балаларығыҙҙы һаҡлағыҙ!” – тип мөрәжәғәт итә ведомствоның матбуғат хеҙмәте. Фото: "Башинформ".