1 июндә Башҡортостан Республикаһы булышлығында Златоуст ҡалаһында һабантуй уҙҙы. Килгән ҡунаҡтарға бай мәҙәни-күңел асыу программаһы тәҡдим ителде, һәр кем милли уйындарҙа һәм ярыштарҙа, балалар конкурс-уйындарҙа ҡатнашты, күргәҙмәләрҙе һәм йәрминкәләрҙе ҡараны , милли аш-һыуҙан ауыҙ итте, оҫталыҡ дәрестәрендә иҫтәлеккә сувенир яһай алды. Башҡортостандан профессиональ коллективтар һәм яратҡан артистар байрамдың махсус ҡунаҡтары булды. Атап әйткәндә, тамашасылар Сибай концерт-театр берләшмәһе һәм Учалы филармонияһы артистарының сығыштарын ҡарай алды. Башҡортостан Республикаһы Башлығы Радий Хәбировтың ҡотлауын Башҡортостан Республикаһының Силәбе өлкәһендәге вәкиле Әлфир Байымов уҡып ишеттерҙе. Радий Хәбиров булышлығында быйыл һабантуйҙар Силәбе өлкәһендә дүрт майҙансыҡта уҙа. Уларҙың барыһында ла Башҡортостан делегацияһы ҡатнаша. Фото һәм сығанаҡ: Башҡортостан Республикаһының Силәбе өлкәһендәге вәкиллеге.