27 февралдә Өфөлә ”Путин командаһы” премияһын тапшырыу тантанаһы үтте. Унда йәмғиәт алдындағы ҡаҙаныштары өсөн граждандарҙы, шулай уҡ МХО биләмәһендә яугирҙәребеҙгә ярҙам иткәндәрҙе билдәләп үттеләр. Башҡортостандан был хөрмәткә 13 кеше лайыҡ булды. ”Путин командаһы” премияһы Халыҡ фронты тарафынан тыуған ил мәнфәғәте өсөн көн һайын уңышлы эшләгәндәрҙең хеҙмәтен почетлы наградалар менән билдәләү маҡсатында булдырылған. Уларҙың һәр береһе иҡтисад, мәҙәниәт, мәғариф һәм медицина үҫешенә үҙ өлөштәрен индерә. Был кешеләр төрлө өлкәләрҙә эшләй, әммә уларҙың маҡсаты бер – илебеҙҙе үҫтереү. Награда 2022 йылда булдырылған. Ошо ваҡыт эсендә уға Рәсәйҙең 550 гражданы лайыҡ булған. – Ҡайһы берәүҙәр яугирҙәр өсөн йылы кейем тегә һәм бәйләй, башҡалары маскировка селтәрҙәре, окоп шәмдәре эшләй, дарыуҙар һәм башҡа гуманитар ярҙам йыя. Республика халҡы алғы һыҙыҡта йөрөгәндәргә техника һатып алыу өсөн аҡса ебәрә. Мәҫәлән, Зилә Фәттәхова 2022 йылдың октябрендә фекерҙәштәр төркөмөн ойошторған: улар яугирҙәрҙең ғүмерен ҡотҡарыусы маскировка селтәрҙәрен үрә башлаған. Бөгөн уларҙың хәрәкәтенә бөтә республика буйынса 100 цех инә. Андрей Спиридонов – табип анестезиолог-реаниматолог. Андрей Викторович МХО биләмәһенә ирекмән-медик сифатында ете тапҡыр барған. Шулай уҡ ул Оборона министрлығы контрактына ярашлы бер нисә ай госпиталдә эшләгән. Сергей Иванов – республиканың Авария-ҡотҡарыу хеҙмәтенең эҙләү-ҡотҡарыу бүлексәһе начальнигы. Былтыр Төркиәлә ер тетрәү эҙемтәләрен бөтөрөүҙә ҡатнашты. Заманыбыҙҙың ысын геройҙарының исемдәрен оҙаҡ һанарға була. Барығыҙға ла ҙур рәхмәтемде белдерәм. Һеҙҙең фиҙакәрлегегеҙ һәм ярҙамсыл булыуығыҙ һәр һынауҙы лайыҡлы үтеүебеҙгә ышанысты нығыта, – тип яҙған ошо турала Башҡортостан Республикаһы Башлығы Хакимиәте Етәксеһе Максим Забелин “Бәйләнештә” селтәрендәге сәхифәһендә. Фото: Максим Забелиндың сәхифәһе.