Մոսկվան Երևանին կոչ է արել քննադատության փոխարեն սկսել քննարկել իրադրությունը ՀԱՊԿ-ում, հայտնում է РИА Новости-ն՝ հղում անելով ՌԴ փոխարտգործնախարար Ալեքսանդր Պանկինին։ Նրա խոսքով՝ կազմակերպության հասցեին հրապարակային էմոցիոնալ հարձակումների և քննադատության փոխարեն անհրաժեշտ է սկսել հրատապ հարցերի քննարկում՝ քաղաքական և փորձագիտական մակարդակներում: «Մենք բոլորս շահագրգռված ենք ՀԱՊԿ-ի գործունեության հետագա բարելավմամբ և ռազմաքաղաքական միավորման արդյունավետությամբ։ Իհարկե, դրան կնպաստեր Հայաստանի շուտափույթ վերադարձը կազմակերպության ներսում բնականոն և լիարժեք աշխատանքի։ Ցավոք, մեր հայ դաշնակիցները մինչ այժմ իսկապես հեռու են մնում»,- նշել է դիվանագետը։ Պանկինը նշել է, որ Մոսկվան ելնում է նրանից, որ ՀԱՊԿ շրջանակներում Հայաստանի հետ փոխադարձ հարգալից երկխոսության շարունակումը համապատասխանում է անվտանգության ոլորտում Երևանի շահերին և ծառայում է խաղաղության ու կայունության պահպանմանը եվրասիական տարածքում, այդ թվում՝ Հարավային Կովկասի տարածաշրջանում։ Փետրվարի 1-ին ՀՀ վարչապետ Նիկոլ Փաշինյանը հայտարարել էր բանակի բարեփոխումների հայեցակարգում և Ազգային անվտանգության ռազմավարության մեջ փոփոխությունների մասին։ Նա նշել էր, որ Հայաստանը պետք է հասկանա, թե ինչպիսի անվտանգության հարաբերություններ կարող է ունենալ Հնդկաստանի, Իրանի, Վրաստանի, ԱՄՆ-ի, Ֆրանսիայի հետ, և արդյոք իր հարաբերություններն այս ոլորտում Ռուսաստանի հետ կփոխվե՞ն, և արդյոք Երևանը կմնա՞ ՀԱՊԿ-ի կազմում։ Հայաստանի Ազգային ժողովի նախագահ Ալեն Սիմոնյանը 2023 թվականի նոյեմբերի 22-ին լրագրողների հետ զրույցում ասել էր, որ ՀԱՊԿ-ի քաղաքական շահերը վերջին տարիներին հակասում են Հայաստանի և հայ ժողովրդի շահերին, ինչը, ըստ նրա, հաստատվում է այս կազմակերպության հայտարարություններով։