Кисә, 9 декабрҙә, Рәсәйҙә Ватан Геройҙары көнө билдәләнде. Был иҫтәлекле датаға бәйле закон проекты Рәсәй Дәүләт Думаһы депутаттары тарафынан 2007 йылдың 26 ғинуарында беренсе уҡыуҙа ҡабул ителә. Шул уҡ йылдың 28 февралендә ил Президенты Владимир Путин ошо хаҡта Указға ҡул ҡуя. Был иҫтәлекле көн почетлы дәүләт наградаларына – Советтар Союзы, Рәсәй Геройы исемдәренә, Дан һәм Изге Георгий ордендарына лайыҡ булған шәхестәргә хөрмәт һәм ихтирам билдәһе һәм йәш быуынды улар өлгөһөндә тәрбиәләү маҡсатында булдырыла. Ошо айҡанлы уҡыусыларыбыҙҙы Ватан Геройҙары менән таныштырыуҙы дауам итәбеҙ. Рәсәй Геройы Игорь Нәсибуллин – Яңауыл районы егете. Хәрби офицер 2022 йылдың февралендә, махсус хәрби операция башланыу менән, ил именлеге һағына баҫа. Өлкән лейтенант, танк ротаһы командиры була. Ҡыҙғанысҡа ҡаршы, Игорҙың ғүмере бик иртә өҙөлдө – ул шул уҡ йылдың март айында махсус хәрби операцияла бурысын үтәгәндә һәләк булды. Уға 26 ғына йәш ине. Яңауылдың батыр егетенә, ҡыйыу офицерға үлгәндән һуң Рәсәй Геройы исеме бирелде. Быйыл Яңауыл ҡалаһының Хәрби һәм Хеҙмәт даны монументы эргәһендә Игорь Нәсибуллинға бюст асылды. “Беҙ улыбыҙҙың йөҙөбөҙгә ҡыҙыллыҡ килтермәҫен белә инек. Ул бәләкәйҙән ихтыярлы, ныҡ һәм батыр егет булып үҫте, дуҫтары күп ине. Үҙенең ғүмерен ҡорбан итеп, намыҫ, илһөйәрлек һәм Тыуған илгә тоғролоҡ өлгөһө булды. Ябай кешеләр араһында ла геройҙар булыуын раҫланы. Беҙҙең өсөн улыбыҙ һәр саҡ тере һәм йәшәйәсәк”, - тине бюст асыу тантанаһында геройҙың ата-әсәһе Роза Хәбибйән ҡыҙы һәм Леонид Ғилмиәр улы Нәсибуллиндар. Игорҙың атаһы ла, бер туған ағаһы ла – хәрбиҙәр. Ғаилә Яңауылға күсеп ҡайтҡас, буласаҡ Герой райондың Иҫке Варяш мәктәбендә уҡыған. 2017 йылда Ҡазан юғары танк команда училищеһын тамамлағас, Белгород өлкәһендә 3-сө мотоуҡсылар дивизияһының 237-се танк полкында хеҙмәт иткән. Игорь Нәсибуллин етәкселек иткән танк ротаһы Балаклея, Гусаровка, Изюмды азат итеүҙә ҡатнашҡан. Алыштарҙың береһендә офицер үҙенең танкы менән ауыр яраланған яугирҙәрҙе алып сығыуҙы ҡаплаған, үҙ броняһын дошман уты аҫтына ҡуйған. Бөтәһен дә ҡотҡара алғандар, ләкин Нәсибуллиндың танкы дүрт тапҡыр ут аҫтына эләккән, экипаж контузия алған. Дошмандың сираттағы атакаһы барышында был танкка ракета эләгә. Танктан сыҡҡанда экипаж миномет уты аҫтында ҡала. Янған машинанан тоҫҡаусы операторҙы алып сыҡҡада офицер үлемесле яралана. 2022 йылдың 15 авгусында Игорь Нәсибуллинға үлгәндән һуң Рәсәй Геройы исеме бирелде. Шулай уҡ Башҡортостан Башлығы Указы менән Яңауыл батыры үлгәндән һуң Шайморатов ордены менән наградланды. Фотоһүрәттән балаларса саф ҡараш менән баҡҡан егет һуңғы минутынаса Ватан алдында биргән антына тоғро ҡалып, үҙен ҡыйыу офицер, иптәштәре өсөн йәнен бирергә әҙер ысын дуҫ итеп таныта. Герой хаҡында яҡты иҫтәлек яҡташтары күңелендә мәңге-мәңге һаҡланыр. Фото: avatars.dzeninfra.ru