Һауа температураһының плюс 40 градусҡа хәтлем күтәрелеүе тураһында Башгидрометеоүҙәк белгестәре алдан иҫкәрткәйне. Ысынлап та, синоптиктарҙың хәбәре дөрөҫкә сыҡты. Бөгөн урамда түҙеп торғоһоҙ эҫе. Табиптар ябай ғына ҡағиҙәләрҙе үтәргә кәңәш итә. Урамға, бигерәк тә, иртәнге 11-ҙән киске 17 сәғәткә хәтлем, сәбәпһеҙгә сыҡмаҫҡа кәрәк. Әгәр урамға сыҡҡанһығыҙ икән, оҙаҡ йөрөмәгеҙ, һәр саҡ янығыҙҙа һыу булырға тейеш. Хәл алыу урыны, һүҙ ҙә юҡ, күләгәле урын. Әлбиттә, башҡа эҫе теймәһен өсөн ниҙер кейергә кәрәк, шулай уҡ ҡояш нурҙарынан һаҡлай торған күҙлекте онотмағыҙ. Әйткәндәй, еңел һәм иркен кейемгә өҫтөнлөк бирегеҙ, ул аҡ төҫтә булһын. Тап ошондай ваҡытта көсөргәнешле эштәрҙе бүтән көндәргә күсерегеҙ, ти аҡ халатлылар. Өйгә ҡатҡас та йылымыс йәки һалҡынса душта торорға йәки мунсала сайынып сығырға кәрәк. – Әйтергә лә түгел, эҫе көндәр – һимеҙ кешеләргә айырыуса насар тәьҫир итә, улар бүтәндәргә ҡарағанда тиҙ арый, ныҡ тирләй, – ти табиптар. – Артыҡ күп ашауҙан тыйылһын, күберәк һыу эсһен һәм йәшелсә-емеш ашаһын улар. Ғөмүмән, газлы һыу, шәкәрле сәй эсергә тырышмағыҙ, спиртлы эсемлектәрҙе телгә алыу артыҡ. Башына эҫе тейгән кешегә иң беренсе ярҙам түбәндәгесә: ул кешене күләгәле урынға ятҡырырға кәрәк, сепрәкте һыуыҡ һыуға мансып, маңлайына һалыу зарур, күп итеп һыу эсерегеҙ. Уның хәл-торошона ҡарап, ашығыс ярҙам саҡырығыҙ. Фото: Илдар Аҡъюлов.