Үрге Ҡыйғы ауылындағы балалар һәм үҫмерҙәр спорт мәктәбендә милиция генерал-майоры, республиканың элекке эске эштәр министры, Башҡортостандың атҡаҙанған юрисы Рауил Закирйән улы Фәйрүзовтың яҡты иҫтәлегенә арналған шахмат, көрәш, билбаулы көрәш буйынса турнирҙар үткәрелде. Сара Ҡыйғы районында тыуып үҫкән полиция подполковнигы Артур Шакиров башланғысы менән ойошторолдо. Ул турнирҙың бағыусыһы ла булды. Республиканың төньяҡ-көнсығыш төбәктәре һәм Силәбе өлкәһенең Златоуст ҡалаһы спортсыларын Ҡыйғы район советы секретары Алмас Ғәйфуллин тәбрикләне. Алмас Әдигәр улы, ошо саранан тыш, Ҡыйғы районынан тағы 736 проекттың “Атайсал” порталында теркәлеүе тураһында әйтте. Был көндә ошо районда тыуып үҫкән, әлеге ваҡытта Златоуст ҡалаһында йәшәгән Олег Сәмсетдинов балаларға 15 дана спорт формаһын бүләк итте. Айһылыу НИЗАМОВА