Баҡсасылыҡ ширҡәттәренә 500 мең һум күләмендә грант биреләсәк

Республика Башлығы Радий Хәбиров республиканың иң яҡшы баҡсасылыҡ ширҡәттәре өсөн Башҡортостан Башлығының йыллыҡ гранттарын булдырыу тураһындағы указға ҡул ҡуйҙы. Документ баҡсасылыҡ ширҡәттәре төҙөкләндереүҙе дәртләндереүгә, уларҙың биләмәләрендә йәмәғәт инфраструктураһын үҫтереүгә һәм хәүефһеҙлек сараларын тәьмин итеүгә йүнәлтелгән. Башҡортостан Хөкүмәте “Иң яҡшы баҡсасылыҡ ширҡәте”нә 500 мең һум күләмендә ун грант биреү тәртибен билдәләйәсәк. Ә республиканың Ауыл хужалығы министрлығы был конкурсты үткәреүҙе тәьмин итәсәк. Хәтерегеҙгә төшөрәбеҙ, Башҡортостан Башлығы 2023 йылдың февралендә “SMART-баҡсасы” республика баҡсасыларының икенсе форумының пленар ултырышында баҡсасыларға грант ярҙамын булдырыу тураһында башланғысты иғлан итте. “Ҡәҙерле баҡсасылар, белеүегеҙсә, икенсе йыл рәттән беҙ һеҙгә, һеҙҙең баҡсасылыҡ ширҡәттәренә ярҙам итеү өҫтөндә эшләйбеҙ. Юлдар төҙөйбөҙ, электр менән тәьмин итеү, сүп-сар йыйыу мәсьәләләрен хәл итәбеҙ. Былтыр ошо маҡсатҡа 116,6 миллион һум бүлдек, быйыл 250 миллион һум планлаштырабыҙ. Бынан тыш, беҙ бөтә республикала үҙ продукцияңдың артығын һата алырлыҡ майҙансыҡтар булдырабыҙ. Һеҙҙең хеҙмәтегеҙ беҙҙең өсөн, республика халҡы өсөн сикһеҙ ҡәҙерле. Проблемалар күп, улар тиҫтә йылдар дауамында тупланған, шуға күрә уларҙы эҙмә-эҙлекле киңәйтәсәкбеҙ. Ә был документ – минең иң яҡшы баҡсасылыҡ ширҡәттәренә гранттар бүлеү тураһындағы указым. Йыл һайын 500 мең һумдан 10 грант бүлеп бирәсәкбеҙ. Уларҙы ял итеү зоналарын төҙөкләндереүгә һәм ремонтлауға, йәмәғәт киңлектәрен үҫтереүгә, балалар майҙансыҡтарын, видеокүҙәтеү системаларын ҡуйыуға һәм башҡаларға тотонорға мөмкин. Барыһына ла уңыштар!” – тип яҙҙы Радий Хәбиров социаль селтәрҙәге сәхифәһендә. Фото: glavarb.ru.