Башҡортостан Хөкүмәте хәбәр итеүенсә, тәҡдимдәге иҫәпләүҙәр буйынса, проект бюджеты 337,97 миллион һум тәшкил итә, 20 яңы эш урыны булдырыу мөмкинлеге бар. Милли проект сиктәрендә был идеяны тормошҡа ашырыу ваҡыты ике йыл тәшкил итәсәк, тип күҙаллана. - Башҡортостанда был бизнес-кейсты тормошҡа ашырыу тәҡдиме бер нисә шартҡа бәйле: агросәнәғәт комплексы төбәк иҡтисадының төп йүнәлештәренең береһе булып тора, республикала баҡсасылыҡ әүҙем үҫешә - бөгөн 1,5 миллион баҡсасы һәм 1500 баҡса ширҡәте иҫәпләнә. Әлбиттә, был өлкәне артабан үҫтереү өсөн етерлек күләмдә сәсеү материалы кәрәк. Проектты тормошҡа ашырыу өсөн белгестәребеҙ Кушнаренко районында 12 гектарлыҡ майҙан һайланы. Инвестор ҙур сауҙа селтәрҙәрендә продукция менән тәьмин итеү һәм һатыу мөмкинлеге булған орлоҡтарҙы тәжрибәле үҫтереү һәм етештереү менән шөғөлләнә аласаҡ, - тип билдәләне Башҡортостан Республикаһы Үҫеш корпорацияһының генераль директоры Наил Ғәббәсов. Бизнес-тәҡдим шулай уҡ проекттың һөҙөмтәлелеге тураһында мәғлүмәттәрҙе сағылдырған финанс-иҡтисади күрһәткестәрҙе үҙ эсенә ала. Был блокта инвесторҙар табыш алыу һәм кире ҡайтарыу ваҡыты тураһында мәғлүмәт менән танышыу мөмкинлегенә эйә. - Инвестор ил Президенты Владимир Путиндың указы нигеҙендә төбәктең "Хеҙмәт етештереүсәнлеге һәм мәшғүллеккә ярҙам итеү" (Производительность труда и поддержка занятости) өҫтөнлөклө милли проекттар исемлегенә индереүгә дәғүә итә ала. Унда ер участкаһын сауҙаһыҙ ҡуртымға алыу, табышҡа һалым буйынса инвестиция һалымын кәметеү һәм ойошма мөлкәтенә һалымдан азат итеү мөмкинлеге бар. Был инвестиция тәҡдиме менән ҡыҙыҡһынған инвесторҙар өсөн үҫеш Корпорацияһы белгестәре финанс моделен билдәләнгән параметрҙарға һәм технологик ҡарарҙарға ярашлы иҫәпләйәсәк, шулай уҡ предприятие тулыһынса эшләтеп ебәрелгәнгә тиклем бушлай оҙатып барасаҡ, - тип өҫтәне Наил Ғәббәсов. Башҡортостандың Үҫеш корпорацияһы белгестәре проекттарҙы концепцияны эшләүҙән алып объекттарҙы файҙаланыуға тапшырыуға тиклем бөтә стадияларында ла бушлай нигеҙҙә оҙатып йөрөй. Инвестиция проекттарын бушлай оҙатыуҙан тыш, Үҫеш корпорацияһы шулай уҡ бизнес-пландар һәм бизнес-кейстар потенциаль инвесторҙар өсөн әҙер инвестиция тәҡдимдәре әҙерләүҙе тормошҡа ашыра. Фото интернеттан. https://pravitelstvorb.ru/news/20854/