29 апрелдә Шишмә районында Башҡортостан Башлығы Радий Хәбиров йыл һайын үткәрелгән “Хәтер баҡсаһы” тип исемләнгән халыҡ-ара акцияһына старт бирҙе. Быйыл ул махсус хәрби операция геройҙарына арнала. Республика биләмәләрендә барлығы 700 меңдән ашыу ағас ултыртыу өсөн 72 участка әҙерләнгән. Акцияның үҙәк майҙансығын Турахан кәшәнәһе эргәһендә ойошторҙолар. Бында 1,1 мең ҙур ҡайын үҫентеһен ултырттылар. Сарала Башҡортостан Хөкүмәте, республиканың Дәүләт Йыйылышы – Ҡоролтай депутаттары, министрлыҡтар, ведомстволар, ижтимағи ойошмалар етәкселәре, төбәктә йәшәүселәр, шулай уҡ Шишмә районынан махсус хәрби операцияла һәләк булғандарҙың ғаилә ағзалары ҡатнашты. Башҡортостан Башлығы сәләмләү һүҙендә сарала ҡатнашыусыларға рәхмәт белдерҙе һәм республиканың тораҡ, тәбиғәт биләмәләрен масштаблы йәшелләндереүҙе дауам итәсәге хаҡында һөйләне. - Бөгөн республикалағы, моғайын, төп һәм матур акцияларҙың береһе “Хәтер баҡсаһы” үткәрелә. Халыҡ-ара сараның маҡсаты – был йылдарҙа 27 миллион ағас ултыртыу. Уларҙың һәр береһе – Бөйөк Ватан һуғышында һәләк булған 27 миллион совет кешеһе тураһындағы хәтер, - тине Радий Фәрит улы. – Бынан тыш, беҙҙең өсөн мөһим мәсьәләне хәл итәбеҙ. Үҙебеҙҙән һуң беҙгә тиклем булғанға ҡарағанда күберәк ағас ҡалдырырға тейешбеҙ. Беҙ ҡыҙыҡлы, уникаль урында йыйылдыҡ. Уны үҫтерә башлайбыҙ ғына әле. Был – Турахан кәшәнәһе. Быйыл Евразия күсмә ҡәбиләләр музейы тип аталған ҙур проектты формалаштырыуҙы башлайбыҙ. Бер нисә йыл эсендә бында үҙгәрештәр буласаҡ. Быйыл “Хәтер баҡсаһы”ның тағы мөһимерәк сараға әйләнеүе хаҡында белдерҙе Радий Хәбиров. - Көнбайыш илдәр менән ауыр ҡапма-ҡаршылыҡ бара. Махсус хәрби операция дауам итә. Бер нисә көн элек Өфөләге Совет майҙанынан дүртенсе ирекле батальонды оҙаттыҡ. Хәрби хәрәкәттәр ветерандары ижтимағи ойошмалары тарафынан Башҡорт ирекле мотоуҡсылар батальоны формалаштырыла. Ә меңләгән яҡташыбыҙ үҙенең хәрби бурысын үтәй ҙә инде. Һәм беҙ уларға терәк булырға тейешбеҙ, - тине республика Башлығы. Бөгөн махсус хәрби операцияла ҡатнашҡандарҙы бер минутҡа тын ҡалып хәтергә алдылар. Фотолар, сығанаҡ: glavarb.ru/rus/press_serv/novosti/164715.html