Үҙемде иҫләй башлағандан сәхнәләмен, яҡшылап һөйләшә белмәһәм дә, байрамдарҙа бейеп йөрөгән хәтерҙә... Тәүге башҡарған бейеүем "Бишбармаҡ" булды, беренсе класҡа барғанда ла, ҡалғандар шиғыр һөйләне, ә мин ниңәлер бейегәнем иҫтә. Мәктәп йылдарын бейеү түңәрәктәрендә, төрлө мәҙәни сараларҙа ҡатнашып үткәрҙем, иң иҫтәлеклеһе - "Һылыуҡай" республика бәйгеһе. Шуға күрә урта дөйөм белем алғас, һөнәр һайлауҙа икеләнеү булманы - сәнғәткә барырымды белә инем... Тик мәктәпте гел "бишле" менән миҙалға тамамлағас, әсәйем һәм туғандарым сәнғәт юлынан китеүемә ҡаршы төштө. Һаман иҫемдә, юридик факультетта имтихандар биреп йөрөгән арала, Өфө дәүләт сәнғәт академияһының абитуриенттарын барып ҡарап йөрөгәнем, тик был ситтән күҙәтеү генә булды, әсәйемдең һүҙен үтергә ҡыйманым. Шулай итеп, Өфө хоҡуҡ институтының юриспруденция факультетына бюджетҡа инеп киттем. Тик мәҙәниәт үҙенә әйҙәне, ике курстан һуң күтәреп һуғып тигәндәй ҡайтып, тыуған ауылым Матрайға эшкә төштөм. Бик күп ҡаршылыҡтар булды, әлбиттә: өйҙәгеләрҙең риза булмауы, уҡыу йортонан документтарҙы ала алмай йөрөүҙәр, әммә минең ныҡыш холҡом барыһын да еңеп сыҡты. Матур итеп эш башланым, тик белем кәрәк ине ошо өлкәлә. Шулай итеп, Сибай институтының хореография булеген тамамлап ҡайтып, үҙ эшемде яратып өлгөргән Матрай мәҙәниәт йортонда дауам иттем. Мәҙәниәт өлкәһендә хеҙмәт стажым - 15 йыл, шуның араһында ете йылға яҡын Балалар сәнғәт мәктәбендә бейеү класы уҡытыусыһы булып та эшләнем. Ғорурланырлыҡ уҡыусыларым бар, улар хәҙер үҙҙәре сәнғәт өлкәһендә ышаныслы тәүге аҙымдарын яһай, иң ҙур шатлығым - уларҙың уңыштары. Әлеге көндә "Таштүре" халыҡ бейеу коллективы етәксеһемен, эшем оҡшай, Аллаға шөкөр. Районыбыҙҙы данлап, республика кимәлендә сығыш яһайбыҙ, "Байыҡ" республика телевизион бәйгеһендә төрлө номинацияларҙа лауреат исемен алып ҡайтып торабыҙ, башҡа сараларҙан дә ситтә ҡалмайбыҙ. Коллективым да иң яҡшыларҙан: "халыҡ" исеме йөрөткән "Илһам" халыҡ театры (етәксеһе - Мәүлиҙә Заманова), "Түңгәүер" халыҡ фольклор ансамбле (етәксеһе - Гөлсимә Солтанова), өсөнсөһө - үҙем етәкләгән "Таштүре" халыҡ бейеү ансамбле. Үткән йылда ғына федераль программа буйынса мәҙәниәт йортона яҡшы ремонт яһалды, эш урыныбыҙ заманса йыһазландырылды. Был йәһәттән район етәкселегенең дә өлөшө ҙур, беҙгә инде шатланып эшләргә лә эшләргә. Хөрмәтле коллегалар, барығыҙҙы ла етеп килгән Мәҙәниәт хеҙмәткәрҙәре көнө менән ҡотлайым. Эшебеҙҙең еңел түгел икәнен тик үҙебеҙ генә беләбеҙ, сабырҙар, талантлылар, уны ысын күңелдән яратҡандар ғына был өлкәлә эшләй ала... Гөлназ Арыҫланова яҙмаһы. Фотолар: vk.com/nazikarsik