Служба св.бл.кн.Василько Ростовскому
Служба святому благоверному великому князю Василию (Василько).
Месяца марта в 17-й день
На велицей вечерни
На Господи, воззвах: стихиры, глас 5.
Подобен: Радуйся, живоносный:
Днесь наста, богомудре княже Василько, / солнца светлейший твой праздник, / верные к веселию созывая / и лучами радости всех просвещая, / веселятся Небеса и сликовствует земля. / Срадуется же Христова Церковь, / светло творяще всепразднственную память твою, / благоверный княже Василие, // Ростову похвало и молитвенниче о душах наших.
Радуйся, богомудре княже Василько,/ российский светильниче!/ Радуйся, светом добрых дел твои́х / Отца Небеснаго прославивый, / радуйся, Земли Ростовской твердый упра́вителю,/ немощных душ окорми́телю, / река исцелений независтная, / грешником кроткий наказателю, // и всем притекающим к тебе пристанище.
Радуйся, гражданине райских селений, / печальных божественное радование, / града нашего све́тлая похвало, / веселие людей верных, / благочестия сеятелю, / больных целебниче, / помощниче безпомощным, / небурное и нелестное отишие сущим во гресех, / источниче неоскудный к тебе прибегающим, // имже почерпаем от Христа Бога велию милость.
Радуйся, благоверный княже Василько, / Це́ркве Русския преславное украшение, / прибежище скорбящих, / православия сто́лпе непоколебимый, / сирота́м и вдовицам заступниче, / и в бедах необоримый помощниче, / радуйся, новый наш молитвенниче пред Богом, / Емуже выну предстоя со всеми святыми, // молися о спасении душ наших.
Слава, глас 6:
Приидите, Христолюбивии людие, / песньми венчаем новаго страстотерпца пречуднаго, / преблаженнаго князя Василия./ Егоже дивный во святых Своих Христос Бог прослави/ и теплаго предстателя Земли Русстей дарова. / Скорого в ско́рбех наших уте́шителя, / болящих врача премилостиваго, / и всем по коемуждо я́же ко спасению у Господа испросити готоваго. / И ныне предстоя престолу Божию, / яко верный и добрый слуга Господень, / в радость Господа своего призванный, // молит о спасении душ наших.
И ныне, Богородичен:Кто Тебе не ублажит:
Таже вход. Прокимен дне. Чтения три.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чужди́й./ Вы Мне свиде́тели, и Аз Госпо́дь Бог./ И еще от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На литии стихиры, глас 2
Подобен: Егда от древа:
Приидите, святителие и священницы, / и благочестивых людей множество, / притецем к раце мощей святаго благоверного князя Василько, / и возопием любовию: / о, преблаженне княже, / непрестанно молися за ны ко Господу, / да утвердит страну нашу во православии, / Церковь от раскола соблюдет, / грады наша от глада, губительства и нашествия иноплеменик избавит, / от междоусобныя брани сохранит, / и подаст воинству нашему на враги победу, / Це́рквам соединение, миру умирение, // и душам нашим велию милость.
Слава, и ныне, Богородичен:
Приидите, Матерь Света, / песньми немолчными зовуще, вси прославим, / Та бо роди Спасение наше, / и радуйся принесем, яко Единой, рождшей всех Начальнейшаго, / Иже прежде век Бога; / радуйся, Яже Еву падшую паки наздавшая; / радуйся, Пречистая Дево, Неискусобрачная.
На стиховне стихиры, глас 8.
Подобен: О, преславнаго чудесе:
Богомудре княже Василие, / явился еси граду нашему / заступник крепок, / и православным на враги пособник, / и всем людем русским забрало нерушимо. / Темже почитаем тя священными песньми / и молимся прилежно: // Христу Богу молися о душах наших.
Стих: Возвеселится праведник о Господе, / и уповает на Него.
Благоверный княже Василько,/ отец и кормитель сирым был еси,/ печальным великое утешение,/ кровь свою за веру и люди твоя пролиял еси/ и ныне Престолу Божьему предстоиши/ и молишися воинству нашему на враги победу даровати,/ мир умирити и спастися душам нашим.
Стих: Блажен муж, бояйся Господа, / в заповедех Его восхо́щет зело́.
Ра́дуйся и весели́ся гра́де Ростове,/ красу́йся и ра́дуйся це́рковь успения Божия Матере,/ имущи в се́бе исцеле́ния исто́чник/ мощи благоверного князя Василько,/ побо́рника на враги́ и побе́ды даю́щаго ве́рным,/ те́плого засту́пника душ и теле́с на́ших./ Темже днесь вси почита́ем память твою, сла́вне./ Христу́ помоли́ся дарова́ти душа́м на́шим/ мир и ве́лию ми́лость.
Слава, глас 6:
Русь православная днесь веселится,/ воспевая страдания твоя страстотерпче Василие,/ яже за веру и люди твоя претерпел еси,/ сего ради не престай покрывати Державу нашу Русскую,/ и вся верные люди от всякаго зла,/ твоими благоприятными к Богу молитвами.
И ныне, Богородичен:Творец и Избавитель:
Тропарь, глас 4:
Явился еси светильник благодатный, / богомудре княже Василько, / тихим светом смирения и любве сияяй / и нас любовию твоею озаряяй. / Темже и мы, любовию чтуще память твою, вопием ти: /радуйся, страстотерпче предивный,/ граду Ростову и всей Русстей Земли утверждение.
НА УТРЕНИ
По 1-м стихословии седален, глас 4:
Новый светильник Церкви Христовой явился еси, / преблаженне княже Василько, / и молитвенник теплый, / яко и по смерти неотступно духом нас посещаеши. / Темже и припадаем к тебе святый предстателю наш, / моли о нас, любовию память твою почитающих, / да избавимся от всех зол молитвами твоими.
Слава, и ныне, Богородичен, глас тойже:
Красоте девства Твоего и пресветлой чистоте Твоей, / Гавриил удивився, вопияше Ти Богородице: / кую Ти похвалу принесу достойную; / что же возименую Тя; / недоумеваю и ужасаюся. / Темже яко повелен бых, вопию Ти: // радуйся Благодатная.
По 2-м стихословии седален, глас 4:
Днесь светло красуеся славнейший град Ростов,/ имущи честыя мощи Твоя в себе,/ благоверный княже Василько,/ стецемся вернии и поклонимся,/ и возопием глаголюще./ О святый страстотерпче,/ молися Христа Бога,/ сохранити страну нашу в православии и благочестии,// и спасти души наша.
Слава, и ныне, Богородичен, глас тойже:
Многими прегрешении ум помрачен имуще, / вопием ко Твоему крепкому заступлению, Богородице Дево: / просвет́и очи душ наших, / и возсияй нам покаяния зарю, / молитвами угодника Твоего благовернаго князя Василия, / едина Чистая и Благословенная.
По полиелеи величание:
Величаем тя,/ святый страстотерпче благоверный княже Василько, / и чтим честная страдания твоя,/ яже за Христа / претерпел еси.
Псалом избранный:
Блажен муж, бояйся Господа. / В заповедех его восхочет зело. / Слава и богатство в дому его. / И правда его пребывает в век века. / В память вечную будет праведник. / Пра́ведник я́ко фи́никс процвете́т, / я́ко кедр, и́же в Лива́не, умно́жится.
Седален, глас 8:
Сиянии души твоея вся просвещаеши мира концы / яко звезда пресветлая, / и красно́ благоухаеши якоже другий рай, / и души веселиши, и уставляеши недуги: / темже тя, всеблаженне, по долгу поем, / и любовию почитаем честную память твою, / великий княже Василько: / моли Христа Бога, / согрешений оставление даровати // чтущим любовию святую память твою.
Слава, и ныне, Богородичен, глас тойже:
Ты мое утешение, Богомати,/ ты моя похвала и радосте,/ и заступница скорая,/ милости бездна./ Тебе пою,/ Тебе кланяюсь и величаю Тя, Богоневесто.
Степе́нна, 1-й антифо́н 4-го гла́са. Проки́мен, глас 4:Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 36.Евангелие от Матфея, зачало 43.
По 50-м псалме стихира, глас 6:
Граде Ростове радуйся,/ се бо святый благоверный княже Василько,/ с сонмом ростовских святых/ предстоит Святой Троице и молит непрестанно о нас Всещедрого Бога,/ Отечество наше в православии утвердити,/ грады от нашествия иноплеменных сохранити,/ домы миром оградити,/ болящим здравие подати / и всем чтущим его ниспослати велию милость.
Канон, глас 8.
Песнь 1
Ирмос: Воду прошед яко сушу, / и египетскаго зла избежaв,/ изрaильтянин вопияше: // избaвителю и Богу нашему поим.
Святый благоверный княже Василько моли Бога о нас.
Достойными похвалами воспети преславного чудотворца, / ум и смысл даруй ми, Христе, Боже, / яко да, радуяся, прославлю память его.
День торжества и праздник веселия наста, / стецемся, вернии, очистивше вкупе души и телеса: / се бо нас призывает Василий божественный.
Похвальныя цветы, яко царский венец / богомудрей твоей главе в память приносим, / юже Христос нетлением венча, / преблаженне Василько: / молися о стаде твоем, / избавитися граду твоему от всякия напасти.
Богоро́дичен: Пресветлая свеще Солнца славы, / души моея огнь угаше́нный присно унынием, возжзи, / божественных дел елеем, Пречистая, напаяющи, / да верою и любовию присно Тя славлю, Богородительнице.
Песнь 3
Ирмос: Небеснаго круга / Верхотворче, Господи, / и Церкве Зиждителю, / Ты мене утверди в любви Твоей, / желaний крaю, верных утверждение, // едине Человеколюбче.
От пречестнаго корене израсте ветвь преславная, / благочестивый княже Василько, / благочестно на земли пожив,/ и приятелище чисто Святому Духу был еси, / просвещая поющих память твою.
Моще́й твои́х ра́ка, страстотерпче всехва́льне Василие, источа́ет исцеле́ния,/ и свята́я твоя́ душа́ с ли́ки а́нгельскими досто́йно ра́дуется,/ с ни́миже моли́ спасти́ся душа́м на́шим.
Приими похвалу от раб недостойных, / и молитву о нас сотвори к Богу, / честно творящих память твою, / да от бед и печалей и грех лютых свободимся, / тя величающе.
Богоро́дичен: Жезл прозябший цвет нетления Христа, / и златую кадильницу вси Тя знаем, Чистая, / Божественное существо носящую на руку угль, / Дево Богоблаженная.
Седален, глас 5:
Па́мять блаже́ннаго и пра́веднаго страстоте́рпца,/ вели́каго кня́зя Василько, похва́льными пе́сньми возвели́чим:/ днесь бо предстои́т у Престо́ла всех Царя́, Христа́ Бо́га,/ и мо́лится непреста́нно Го́сподеви грехо́в оставле́ние и жития́ исправле́ние дарова́ти/ пра́зднующим духо́вно святу́ю его́ па́мять/ и ве́рно покланя́ющимся чудотво́рней ра́це моще́й его́.
Слава, и ныне, Богородичен:
Руно орошенное, Дево, / пламень грехов моих угаси, / Купино Неопалимая, страстей моих терние попали, / подающи ми на воде жити упокоения / и геенскаго мя огня свобождающи.
Песнь 4
Ирмос: Услышах, Господи, / смотрения Твоего тaинство, / разумех дела Твоя // и прослaвих Твое Божество.
Храм Царице Небесной во граде Ростове воздвигл еси, княже, / украшающий и освящающий град сей, / в немже и днесь безкровная Жертва о всех и за вся приносится Владыце.
Яко светолучное солнце осияет вселенную, / тако ты, благоверный княже Василие, / освяти и просвети град твой / и вся люди, живущия в нем, / и вся грады Земли Русския своими чудесы.
Незаходимое Солнце в себе стяжав / Христа Бога нашего, / преславный страстотерпце, / освяти ны, честную память твою почитающия.
Богоро́дичен: Раздери, Пречистая, / греховное рукописание моих прегрешений Твоими молитвами, / яко имущи к Сыну Твоему дерзновение за ны молити прилежно: / Тя бо Едину имамы христиане Заступницу.
Песнь 5
Ирмос: Просвети нас повелении Твоими, Господи, / и мышцею Твоею высокою / Твой мир подaждь нам, // Человеколюбче.
Досточудная и преславная память твоя / возсия в Русстей Земли, блаженне, / и радостно веселит верных соборы.
Священный храм, княже, Божественнаго Духа верою быв, / создал еси Церковь Богоотроковице / и священными лепотами преукрасил еси ю, / в нейже тело твое положено́ бысть.
Яко по закону ходив,/ духовную крепость восприял еси, мученице всехвальне, / со святыми Троице предстоя, / молися очищение нам даровати, / тебе похваляющим.
Богоро́дичен: Яко яблоко в дубраве едину Тя обрет, / и чистейший крин, / и удольный цвет, о Богомати, / Жених мысленный в Тя вселися.
Песнь 6
Ирмос: Молитву пролию ко Господу, / и Тому возвещу печали моя, / яко зол душа моя исполнися, / и живот мой аду приближися,/ и молюся яко Иона: // от тли, Боже, возведи мя.
Наста всечестный праздник, / и священное торжество Василия славнаго, / носящаго нам радость вечную, // в нейже славим Господа прославльшаго его.
Добрые нравы имея,/ истине Христовой люди своя поучал еси, святе./ Темже и нас в добродетели утверди/ и на путь покаяния настави.
Един аз, грешный, ныне в лености предлежу, / и ум мой во грехи глубокия впаде, / но ты, благоверный княже Василько, / натави мя, на стезю правую / и не остави мя, погибающаго.
Богоро́дичен: Себе осуждаю прежде испытания, Богорадованная, / студная дела ношу един осужденный: / но предстани ми, яко Предстательница сущи всем, / и лютаго осуждения избави мя.
Кондак, глас8
Радуются днесь вси русстии собори,/ совершающе память страстотерпца Василько,/ за веру во Христа жизнь свою положившаго,/ и дерзновение велие к Нему стяжавшаго./ Того молитвами, Христе Боже наш,/ мир миру Твоему даруй/ и душам велию милость.
Икос:
Угодник Твой, Господи, святый благоверный княже Василько,/ дивное житие на земли показал еси,/ всяким бо образом волю Твою через всю свою жизнь исполнити потщался еси./ Всем благотворя, приял еси от Тебе нетленный венец./Того молитвами, Христе Боже наш,/ мир миру Твоему даруй/ и душам велию милость.
Песнь 7
Ирмос: От Иудеи дошедше отроцы, / в Вавилоне иногдa, / верою Троическою плaмень пещный попрaша, поюще: // отцев Боже, благословен еси.
Величие наше и похвала, ты еси, благоверный княже Василие: / тобою бо град наш утверждается. / И ныне моли за род твой и люди, вопиющия: / благословен еси, Боже, отец наших.
Прост, кроток, смирен был еси, княже,/ горькая страдания терпя вся презрел еси Христа ради,/ темже и венец приял от Владыки радуяся/ и воспевая: благословен еси, Боже, отец наших.
Христос, видя доброту души твоея,/ избра тя,страстотерпче, да за имя Его постраждеши люте,/ сего ради и нас в добродетели укрепи и на заповеди Божии настави.
Богоро́дичен: Ты моя надежда, Всечистая, / Ты мое и пение,/ Ты мое пристанище, / Ты мое исправление, / Яже Бога Слова Отча Воплощшагося несочтанно родила еси. / Темже Твоей несомненно покланяюся иконе, / крепостию Твоею укрепляем.
Песнь 8
Ирмос: Царя Небеснаго, / Егоже поют вои aнгельстии, // хвалите и превозносите во вся веки.
Блаженне страстотерпче, / како тя возможем воспети достойно?/ Не может бо язык изглаголати твоя различная деяния, / и многая дарования, / яже подаваеши наследию твоему.
Благоверный княже Василько,/ буди нам стена твердая, / буди нам заступник непрестанный, / буди нам, яко отец чадолюбив, / буди нам прибежище и утверждение.
Яко зеницу ока и сокровище многоценное, / хранил еси веру православную, / в ней же утверди и нас/ славящих радостную память твою.
Богоро́дичен: Искапающи божественную сладость, / Яже всех сладость рождшая, / услади душу мою, огорченную ядом змия, / отчуждающи мя горькаго греха всегда ходатайством Твоим, / Предстательнице верных непостыдная.
Песнь 9
Ирмос: Воистинну Богородицу / Тя исповедуем, / спасеннии Тобою, Дево чистая, // с безплотными лики Тя величaюще.
Град свой и вся грады Земли Русския / благомилосердо пощади, и милостивно утверди, / и мир, и любовь, и здравие обильно, / во всем и во всех домех сотвори, / и всегда радостно нас посещай.
Приим блаженный покой, / не престай моляся, премудре, / святых блаженству причаститися нам, / чтущим память Твою, Василие, преславную.
Дерзнух многогрешный аз и недостойный / сию похвалу принести тебе, благоверный княже Василие, / приими с милостию / и покрый мя неистощимыми своими щедротами.
Богоро́дичен: Око сердца моего / воспущаю к Тебе, Владычице: / не презри малого моего воздыхания/ в час, егда судит Сын Твой миру, / буди ми покров и Помощница.
Светилен.
Подобен: Посетил ны:
Посети ны свыше днесь, страстотерпче всехвальне Василие, / и пребожественным светом озари сердца поющих тя, / ибо твое есмы присное стадо.
Слава, и ныне, Богородичен:
Прославим Матерь Бога нашего:/ прежде бо рождества пребыст Дева Мати Сына Божия / и по рождестве паки Дева явися. / Радуйся, Обрадованная, Господь с Тобою.
На хвалитех стихиры, глас 2
Подобен: Егда от древа:
Прехвальному и дивному Российскому светильнику, / града нашего великое утверждение, / благоверному князю Василию, / песненные принесем глаголы, / яко имущему дерзновение ко Святей Троице, / Юже и молит непрестанно, // от бед спастися нам.
Приидите, вси концы земнии, / просла́вим благоверного князя Василько, / предстоя́щаго на Небе́си́ Бо́гу / нас же духом не оставля́ющаго, / мирскаго благочестия правило, / добродетелей украшение, / благоутробия сокровище, / обидимых заступника / и молитвенника о душах наших.
Прииди́те, ве́рнии, / восхвалим великого заступника нашего, / благоверного князя Василько, / милости пучину неисчерпаему, / благочестия столпа непоколебима, / в повелениих доброразсyднаго,/ и всея российския земли прекрaсное удобрeние.
Слава, глас 6:
Днесь весна нам всем возсия: / приидем соберем цве́ты добродетелей, / яже изнесе́ нам Христов учени́к неложный Василько: / иже данный ему талант до́бре умно́живый, / и верен явися своему Владыце: / и иже яко древо при исхо́дищих вод, / плод свой даст во время свое: // и нам просит от Христа Бога велию милость.
И ныне, глас тойже:
Никтоже, притекаяй к Тебе, / посрамлен от Тебе исходит, / Пречистая Богородице Дево, / но просит благодати / и приемлет дарование к полезному прошению.
Славословие великое. И отпуст.
НА ЛИТУРГИИ
Блаже́нны свято́му кано́н песнь 3-я и песнь 6-я, на 8. Проки́мен, глас 7:Возвесели́тся пра́ведник о Го́споде/ и упова́ет на Него́.Стих:Услы́ши, Бо́же, глас мой, внегда́ моли́тимися к Тебе́.Апо́стол к Ри́мляном, зача́ло 99.Аллилу́ия,глас 4:Пра́ведник, я́ко фи́никс, процвете́т и, я́ко кедр, и́же в Лива́не, умно́жится.Стих:Насажде́ни в дому́ Госпо́дни во дво́рех Бо́га на́шего процвету́т.Ева́нгелие от Иоа́нна, зача́ло 52. или от Матфея, зачало 11.Прича́стен:В па́мять ве́чную: