Служба Славней Владычице Нашей Пресвятей Богородице пред иконой Ея «Целительница»
Месяца сентября в 18-й день
На велицей вечерни
На Господи, воззвах: стихиры, глас 1
Подобен: О дивное чудо:
О, ди́вное чу́до!/ Исто́чник исцеле́ний/ ико́на Богоро́дицы нам явля́ется,/ и благода́ть изоби́льно источа́ет./ Весели́ся, Русь правосла́вная,/ Богоро́дичен святы́й до́ме,/ и вопие́т ра́достно,/ Гаврии́ла иму́ще чинонача́льника:/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.
Ди́вны Твоя́ та́йны, Богоро́дице:/ Вы́шних Сил превысшая/ яви́лася eси́, Влады́чице,/ и о земных молитвеннице неусыпная./ Сла́ва Твоя́ боголе́пная,/ богоподо́бными сия́ющи чудесы́./ Де́вы с ли́ки а́нгельскими/ воспевают Тя и глаголют/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.
Твоя чудеса́ сла́вят Влады́чице/ Вла́сти и Престо́ли,/ Нача́ла и Госпо́дства,/ Си́лы и Херуви́ми и стра́шнии Серафи́ми,/ ра́дуются земноро́днии,/ о Твоих милостях крася́щеся,/ припа́дают лю́дие со Арха́нгелы и А́нгелы и воспева́ют:/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.
Слава, праздника
и ныне, глас 8.Подобен: О преславного чудесе:
Пречиста́я Твоя́ ико́на Цели́тельнице,/ Де́во Богоро́дице,/ врачевство́ духо́вное всего́ ми́ра яви́ся:/ к Не́йже прибега́юще,/любо́вию любе́зно лобыза́ем / и исцеле́ний благода́ть получити чаем,/ Твои́ми моли́твами Многопе́тая.
Вход. Прокимен дне и чтения три.
Бытия́ чте́ние (глава 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (главы 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
При́тчей чте́ние (глава 9):
Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному,и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На Литии стихиры, глас 6:
Тебе́ вси ро́ди челове́честии/ хва́льныя да́ры прино́сят, Влады́чице,/ и мо́лятся я́ко Цари́це и Ма́тери Бо́жии,/ проро́цы Тя прему́дро пропове́даша,/ леви́ти благослови́ша,/ апо́столи и му́ченицы испове́даша,/ вся сосло́вия покланя́ются,/ архиере́е пропове́дают,/ мона́си и прости́и благогове́ют,/ бога́тии и убо́зии, сироты́ и вдовы́,/ и всяк во́зраст, и вся́ко преспе́яние,/ ста́рческое и младе́нческое,/ под кров Твой держа́вный с ве́рою прибега́ем:/ покры́й и соблюди́, Госпоже́, моли́твами Твои́ми/ и спаси́ от бед ду́ши на́ша.
На стиховне стихиры, глас 2.
Всех скорбя́щих Ра́досте,/ и оби́димых Засту́пнице,/ и а́лчущих Пита́тельнице,/ стра́нных Утеше́ние,/ обурева́емых Приста́нище,/ больны́х посеще́ние,/ не́мощных покpо́в и засту́пнице,/ Же́зл ста́рости,/ Ма́ти Бо́га Вы́шняго Ты еси́, Пречи́стая: // потщи́ся, мо́лимся, спасти́ся рабо́м Твои́м.
Ко́е досто́йное благодаре́ние/ принесе́м Ти, Чи́стая?/ За мно́жество даро́в Твоего́ милосе́рдия,/ явля́емаго от иконы Тоея Цели́тельницы/ с ве́рою к Тебе́ прибега́ющим,/ неду́ги бо душ и теле́с врачу́еши/ и избавля́еши от всех бед,/ моля́щися Бо́гу при́сно о душа́х на́ших.
Ра́дуйся Мари́е, вели́кое всея́ тва́ри чу́до./ Ра́дуйся, а́нгелов украше́ние, му́чеников сла́во,/ра́дуйся, дщи́ у́бо Дави́дова, Госпо́дня же Ма́ти./ Ра́дуйся пе́ние Гаврии́лово. / Ра́дуйся прибе́жище и по́мощь,//и спасе́ние душ на́ших.
Слава, и ныне, глас 6:
О, несказа́нныя бла́гости!/ Ико́на Твоя, Богороди́тельнице,/ сия́ет чудеса́ми и просвеща́ет благода́тию приходя́щих ве́рно,/ ю́же пред очесы́ на́шими ви́дяще,/ Чи́стую Богоотрокови́цу/ достодо́лжно пе́сньми почита́ем и ублажа́ем.
Тропарь, глас 1.
Любо́вию, Чи́стая Де́во,/ Твою́ святу́ю ико́ну почита́ющим,/ и Бо́жию Тя и́стинную Ма́теpь пpославля́ющим,/ и ве́pно поклоня́ющимтися/ Цели́тельница яви́ся,/ вся́кое зло и боле́зни от сих удаля́ющая, я́ко Всемогу́щая.
ин Тропарь, глас 4
Я́ко Пресве́тлая Звездо́, просия́ Боже́ственными чудесы́ святы́й Твой о́браз, Цели́тельнице. Пода́ждь у́бо и нам, Богоро́дице Мари́е, исцеле́ние неду́гов душе́вных и теле́сных, спасе́ние и ве́лию ми́лость.
На утрени
По 1-м стихословии седален, глас 1
Пресве́тлаго зра́ка Твоего явле́ние/ ра́дость прино́сит всем ве́рующим/ стране́ на́шей да́рует стра́жа неусы́пна/ и от бед избавле́ние./ Те́мже пое́м Ти, Пречи́стая:/ покрыва́й нас при́сно Покро́вом Твои́м.
По 2-м стихословии седален, глас 5
Утоли́ боле́зни/ многовоздыха́ющия души́ моея́,/ утоли́вшая вся́ку слезу́ от лица́ земли́,/ Ты бо челове́ком боле́зни отго́ниши/ и гре́шных ско́рби разруша́еши,/ Тебе́ бо вси стяжа́хом наде́жду и утвержде́ние,/ Пресвята́я Ма́ти Де́во.
На полиелеи величание:
Велича́ем Тя, / Пресвята́я Де́во, / Богои́збранная Отрокови́це, / и чтим о́браз Твой святы́й, / и́мже то́чиши исцеле́ния / всем, с ве́рою притека́ющим.
Псалом избранный: Помяни́, Господи́, Дави́да и всю́ кро́тость его́. Пресла́вная глаго́лашая о тебе́ гра́де Бо́жий. Освяти́л есть селе́ние свое́ вы́шний. Помяну́ и́мя твое́ во вся́ком ро́де и ро́де.
По полиелеи седален, глас 6:
Днесь любо́вию пра́зднующе,/ честно́му образу Богоро́дице Целительнице поклони́мся/ и те́пле возопии́м:/ Ма́тернее дерзнове́ние к Сы́ну Твоему́ и Бо́гу, Де́во, иму́щи,/ испроси́ нам у Него́ проще́ние грехо́в,/ мир и ве́лию ми́лость.
Степе́нна, 1-й антифо́н 4-го гла́са. Проки́мен, глас 4:
Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние да хва́лит Го́спода. Ева́нгелие от Луки́, зача́ло 4.
По 50-м псалме́ стихи́ра, глас 6:
О, несказа́нныя бла́гости!/ Ико́на Твоя́, Богороди́тельнице,/ сия́ет чудесы́ и просвеща́ет благода́тию приходя́щих ве́рно,/ ю́же пред очесы́ на́шими ви́дяще,/ Чи́стую Богоотрокови́цу/ достодо́лжно пе́сньми почита́ем и ублажа́ем.
Канон, глас 4.
Песнь 1
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я,/ и воспою́, ра́дуяся, Тоя́ чуде́са.
Краестрочие: Исцели́, Чи́стая, мою́ ду́шу и те́ло.
Исцеле́ний Исто́чник, Де́во,/ похвале́ния присноцвету́щий вене́ц/ недоуме́ю по достоя́нию приноси́ти Ти,/ скве́рны усты́ иму́ще,/ но ви́ждь души́ моея́ жела́ние, и сие́ приими́.
Слепы́м дарова́ла еси́ де́йствие очесе́м, Де́во, е́же ви́дети,/ но и на́ша зе́ницы души́ и телесе́ просвети́,/ да пое́м при́сно вели́чия Твоя́.
Цельбоно́сный исто́чник ве́мы Тя, Богома́ти,/ и бе́зду ми́лости и щедро́т Твои́х испове́м, / уще́дри мя Богороди́тельнице / и исцеле́ние пода́ждь стра́ждущей души́ мое́й.
Песнь 3
Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Егда́ приспе́ ко мне врач, Пресвята́я Богоро́дице,/ тогда́ воста́х от одра́ моего́, немощству́яй,/ тако веща́ще кли́рик Вике́нтий и прославля́ще Тя благу́ю Цели́тельницу.
Ле́ность лю́тую души́ моея́,/ и се́рдца моего́ неможение,/ Ма́ти Бо́жия, воззре́вши, исцели́ моли́твами Твои́ми,/ и спасе́нных мя́ ча́сти сподо́би,/ избавля́ющи мя́ тьмы́ и муче́ния,/ я́ко Еди́на упова́ние мое́ и утеше́ние.
И́же Тобо́ю изба́вльшеся от бе́д,/ и Тебе́ ра́ди ра́дость получи́вше, Ма́ти Безневе́стная,/ я́ко пода́тельницу благу́ю,/ и засту́пницу благохва́льну вси́ прославля́ем.
Песнь 4
Ирмос: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.
Чи́стая А́гнице,/ Де́во Ма́ти Отрокови́це,/ чи́ста мя́ сотвори́ от страсте́й теле́сных:/ я́ко да льсти́ваго изба́влюся се́тей,/ песносло́вя Тя́, Богора́дованная.
Исцеле́ний во́ды то́чиши при́сно, Де́во,/ все́м боля́щым я́ко о́блак одушевле́н сы́й Царя́ Христа́./ Те́мже молю́ Тя приле́жно:/ ро́су исцеле́ния мне́ боля́щему низпосли́.
Свяще́нная ико́на Твоя́/ друга́я показа́ся Силоа́мская купе́ль, Де́во,/ очища́ющая и целя́щая боле́зни души́ и телесе́.
Песнь 5
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во,/ име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Ты, о Богома́ти,/ немощству́ющия препоясу́еши си́лою,/ а́лчущия насыща́еши;/ посети́ и мою не́мощь/ и а́лчущаго и жа́ждущаго мене́ насы́ти Живо́тнаго Хле́ба,/ чрез Твою́ де́вственную утро́бу сше́дшаго с Небесе́ на зе́млю.
А́нгельстии си́лы досто́йно Твоя́ хвалы́ воспе́ти не мо́гут, Чи́стая:/ мы́ же ны́не ра́бски прино́сим Ти́ Гаврии́лово ра́дование:/ Ра́дуйся, Благода́тная, Госпо́дь с Тобо́ю.
Я́звы исцели́ души́ моея́, Пречи́стая,/ и смире́нное се́рдце мое́,/ огорче́нное я́дом змии́ным,/ де́йственною Твое́ю лечбо́ю уврачу́й.
Песнь 6
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те рука́ми воспле́щим, / от Нея́ ро́ждшагося Бо́га сла́вим.
Ми́лостивным и кро́тким Твои́м о́ком, Богороди́тельнице,/ зря́щи мя́ во обстоя́нии и ско́рби одержи́ма,/ вско́ре свободи́:/ Тя́ бо призыва́ю на по́мощь.
О Всенепоро́чная Отрокови́це,/ кре́пкая ве́рных по́мощь,/ и упова́ние христиа́н!/ Ты́ мя свободи́ плотски́х сласте́й же и страсте́й,/ борю́щихся со мно́ю.
Ю́нице Чи́стая,/ теле́сными страстьми́ мно́гими оскверни́в те́ло же и ду́шу,/ ка́ко Твою́ Дево, доброде́телей воспою́ красоту́?/ недоуме́ю и устраша́юся:/ но Сама́ мне́ бу́ди Твои́ми моли́твами по́мощь.
Кондак, глас 2
На одре́ боле́знени лежа́щаго / и сме́ртною ра́ною уя́звленного, / кропле́нием млека́ Твоего́ воздви́гла еси́ к Твоему́ славосло́вию, Влады́чице,/ та́ко и мою́ не́мощь посети́/ и ду́шу мою́ поми́луй, Блага́я,/ и те́ло исцели́ благода́тию Твое́ю Пречи́стая.
И́кос:
Иде́же осени́т благода́ть Твоя́, Влады́чице,/ та́мо неду́жнии здра́ви быва́ют, бе́дствующии во благополу́чие прихо́дят,/ и всяк скорбя́щий ра́дости исполня́ется./ Те́мже благода́тию Твое́ю осени́ и нас, сицева́я ра́достная Тебе́ глаго́лющих:/ ра́дуйся, Богоблагода́тная, Непристу́пнаго Божества́ селе́ние;/ ра́дуйся, свята́я трапе́зо, хле́бом жи́зни нас снабдева́ющая;/ ра́дуйся, ми́ро многоце́нное, облагоуха́ющее ве́рных;/ ра́дуйся, ма́слино, еле́ем милосе́рдия нас умаща́ющая;/ ра́дуйся, неистощи́мое сокро́вище даро́в;/ ра́дуйся, приснотеку́щий исто́чниче чуде́с;/ ра́дуйся, оби́димых заступле́ние;/ ра́дуйся, обурева́емых благоути́шное приста́нище;/ ра́дуйся, глухи́х слы́шание и све́те слепы́х;/ ра́дуйся, разсла́бленных укрепле́ние;/ ра́дуйся, свобожде́ние плене́нных;/ ра́дуйся, ми́ра всего́ упова́ние;/ ра́дуйся, Всеми́лостивая Цели́тельнице.
Песнь 7
Ирмос: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше,/ радовахуся, пою́ще: / препе́тый отце́в Госпо́дь и Бог, благослове́н еси́.
Души́ моея́ стра́сти всенеисце́льныя,/ Отрокови́це, исцели́,/ и уга́сший ле́ностию свети́льник мо́й возжзи́,/ и к покая́ния путе́м наста́ви, Де́во, / да ве́рою и любо́вию тя́ сла́влю.
Услы́шательнице ско́рая/ и кре́пость моя́, Пречи́стая,/ и прибе́жище, и необоримая стена́,/ и к Бо́гу моли́твенница су́щи,/ ве́чнующаго пла́мене и гее́нны свободи́ мя.
Ши́пок благово́нный/ и сокро́вище многоце́нное,/ иму́ще ико́ну Твою́ Цели́тельницу именну́емую,/ ра́дуемся гре́шнии и благодаре́ние по си́ле прино́сим.
Песнь 8
Ирмос: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет Пе́ти Тебе́: / Го́спода по́йте, дела́, / и превозноси́те Его́ во вся ве́ки.
Укра́шена ря́снами чистоты́,/ Пречи́стая Отрокови́це,/ ду́шу мою́ очисти от зло́бы скве́рныя/ и печа́ль мою на ра́дость преложи.
Исцеле́ний бе́здну,/ и благода́тем пучи́ну, Чи́стая,/ позна́хом Тя́ мы́ гре́шнии./ Те́мже Ти́ мо́лимся:/ от ну́жд все́х изми́, Еди́на Пречи́стая,/ притека́ющих к покро́ву Твоему́.
Твою́ по́мощь да обря́щу, Богоневе́сто,/ в ча́с, во́ньже изы́дет ду́х мо́й,/ вско́ре изъима́ющи,/ изба́ви мя́ бесо́вскаго мучи́тельства, Пренепоро́чная,/ и не оста́ви мене́, Блага́я, пре́дану бы́ти и́м.
Песнь 9
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере,/ и да вопие́т: / ра́дуйся, Всеблаже́нная Богоро́дице, / Чи́стая Приноде́во.
Еди́на Ты в жена́х благослове́нная,/ благодари́м Тя́ изба́вльшеся Тобо́ю грехо́в мно́гих,/ и не́мощей и боле́зней и неду́г лю́тых,/ Пречи́стая Влады́чице:/ наде́жда бо еси́ тверда́ Твои́м ве́рным рабо́м.
Ли́ки приими́ Арха́нгел же,/ и мно́жество вы́шних во́инств Зижди́теля моего́:/ апо́стол же и проро́к собо́ры,/ и му́ченики, и преподо́бныя, и священному́ченики:/ и моли́тву сотвори́, Чи́стая, за на́с к Бо́гу.
О́браз ви́да Твоего́ чту́,/ и не сме́ю воззре́ти к Тебе́, Пресвята́я:/ молю́ прия́ти долго́в проще́ние,/ и чи́сто ви́дети Твою́ пречи́стую ико́ну.
Свети́лен:
Ты́ мне́ просвеще́ние,/ Ты́ ми избавле́ние и ра́дование,/ Ты́ побо́рница моя́,/ Ты́ моя́ сла́ва, и похвала́, и наде́жда,/ и спасе́ние мое́ еси́, Пренепоро́чная,/ и Тебе́ ве́рно покланя́юся, и вопию́ Ти:/ спаси́ мя окая́ннаго раба́ Твоего́,/ и от а́довых вра́т исхити́ мя.
На хвалитех стихиры, глас 1.
Подобен: Небесных чинов:
Прииди́те, вси лю́дие,/ верою соше́дшеся,/ просла́вим Влады́чицу Богоро́дицу,/ Засту́пницу ро́да на́шего,/ и, обстоя́ще честну́ю ико́ну Ея́ Цели́тельницу,/ любе́зно облобыза́им ю, глаго́люще:/ ра́дуйся, Пречи́стая Де́во,/ ра́дуйся, Ма́ти Го́спода Вы́шняго,/ ра́дуйся, покро́ве и спасе́ние душ на́ших.
Храм Божества́ су́щая,/ вмести́лище простра́нное благода́ти и милосе́рдия/ яви́лася еси́, Богоневе́сто./ Услы́ши у́бо ско́ро рабо́в Твои́х, Всеблага́я Цели́тельнице,/ и пода́ждь скорбя́щим утеше́ние,/ бе́дствующим от бед избавле́ние,/ боля́щим здра́вие/ и всем ве́рным ве́лию ми́лость.
Радосте Ангелов, /Боля́щих Цели́тельницу,/ па́дших восста́ние,/ согреша́ющих очище́ние,/ ве́мы Тя Богоневе́стная,/ на по́мощь Тя призыва́ем,/ко ико́не Твоей притека́ем/ и все упова́ние на Тя возлага́ем, / Твои́ми моли́твами получи́ти ча́ем / ве́лию и бога́тую ми́лость.
В боле́знех и напа́стех одержи́мыя не пре́зри, Многопе́тая,/ но мольбу́ худу́ю услы́шавши,/ свободи́ на́с от неду́гов душе́вных и теле́сных страсте́й/ да ве́рно Чи́стая, Тя воспева́ем / и ми́лость Сы́на Твоего́ и Бо́га на́шего прославля́ем.
Слава, и ныне, глас 6.
Подобен: Все отложше:
О, мно́гих Тво́их чуде́с, Богоблагода́тная,/ соде́ланных о́бразом Твои́м, Целительницы!/ Всяк бо, прите́кший к Тебе́ с ве́рою,/ не оты́де от ли́ка Твоего́ тощ и не услы́шан:/ слепи́и у святы́я Твоея́ ико́ны прозре́ша,/ хроми́и, разсла́блении и глуси́и исцели́шася,/ безча́дия и ины́х бед и неду́гов/ изба́вила еси́ призыва́ющих Тя,/ Ма́терь Всеще́драго Бо́га на́шего,/ подаю́щаго нам Тобо́ю ве́лию ми́лость.