Служба Славной Владычице Нашей Пресвятой Богородице пред иконою Ея, именуемою «Ярославская»
Месяца июня в 8-й день
На велицей вечерни
На Господи, воззвах: стихиры, глас 1
Подобен: О дивное чудо:
О, великое утешение / икона Твоя, Чистая, / граду Ярославлю даровася / во утверждение и спасение, / милости пучина, / милосердия источниче; / воспоим, вернии, / Гавриила имуще чиноначальника: / Благодатная, радуйся, / с Тобою Господь, / подаяй мирови Тобою велию милость.
О, великое и пречудное верным дарование / Заступницы Нашея явися / пришествие чудотворного Ея образа, / всем убо бывает больным исцеление, / грешным спасение и к Богу дерзновение. / Веселятся благочестивых людей множество / и с любовию взывают: / Обрадованная, радуйся,/ с Тобою Господь, / подаяй мирови Тобою велию милость.
Скорая Помошнице / к Тебе притекающих / и ненадеющимся Надеждо,/ Ты еси, Богородице Владычице, / обидимых Покрове / и сопротивных нашествие отгнание; / воспоим, вернии, / теплой Заступнице рода нашего: / Благодатная, радуйся, / с Тобою Господь, / подаяй мирови Тобою велию милость.
Днесь торжество Твое, Дево, / благоговейно со Ангелы совершаем, / почитающе твой честный и священным образ./ Радуются ныне российстии народи / благоговейно почитающе богоподобнаго Твоего лика изображение, / и со умилением глаголют: / Благодатная, радуйся, / с Тобою Господь, / подаяй мирови Тобою велию милость.
Слава, и ныне, глас 6.
Ублажаются ныне князи ярославстии, / славный Василий с богомудрым Константином, / и прославляется явление Ярославской иконы Божия Матере. / Та бо нас предивными чудесы обогащает, / покров и ограждение от всех наветов вражиих являет, / струи исцелений милостивно источает, / всякие скорби и тугу утоляет.
Вход. Прокимен дне и чтения три.
Бытия чтение (глава 28):
Изыде Иаков от студенца клятвенного и иде в Харрань. / И обрете место, и спа тамо, зайде бо солнце, / и взят от камения места того, и положи возглавие себе, / и спа на месте оном, / и сон виде: / и се лествица утверждена на земли, еяже глава досязаше до Небес, / и Ангели Божии восхождаху и нисхождаху по ней, / Господь же утверждашеся на ней, и рече: / Аз Бог Авраамов, отца твоего, и Бог Исааков, не бойся: / земля, идеже ты спиши на ней, тебе дам ю, и семени твоему. / И будет семя твое яко песок земный, / и распространится на море и ливу, и север, и на востоки, / и возблагословятся о тебе вся колена земная, и о семени твоем. / И се Аз с тобою, сохраняяй тя на всяком пути, аможе аще пойдеши, / и возвращу тя в землю сию, яко не имам тебе оставити, / дондеже сотворити Ми вся, елика глаголах тебе. / И воста Иаков от сна своего, и рече: / яко есть Господь на месте сем, аз же не ведех. / И убояся, и рече: / яко страшно место сие: / несть сие, но дом Божий, и сия врата Небесная.
Пророчества Иезекиилева чтетие
(главы 43 и 44)
Тако глаголет Господь: / будет от дне осьмаго и прочее, / сотворят иереи на олтари всесожжения вашего, / и яже спасения вашего, / и прииму вы, глаголет Адонаи Господь. / И обрати мя на путь врат святых внешних, / зряших на востоки, и сия бяху затворена. / И рече Господь ко мне: / врата сия затворена будут, и не отверзутся, / и никтоже пройдет скозе их, /яко Господь Бог Израилев пройдет ими, и будут затворена. / Яко игумен сядет в них снести хлеб, / по пути Еламских врат внидет и по пути его изыдет. / И введе мя по пути врат святых, сущих к северу, прямо храму, и видех, / и се исполнь славы храм Господень.
Притчей чтение
(глава 9)
Премудрость созда Себе дом, и утверди столпов седмь. / Закла Своя жертвенная и раствори в чаши Своей вино, и уготова Свою трапезу. / Посла Своя рабы, созывающи с высоким проповеданием на чашу, глаголюще: / иже есть безумен, да уклонится ко Мне. / И требующим ума рече: / приидите, ядите Мой хлеб и пийте вино, еже растворих вам. / Оставите безумие, и живи будете, / и взыщите разума, да поживете, / и исправите разум в ведении. / Наказуяй злыя, приимет себе безчестие, / обличаяй же нечестиваго, опорочит себе, / обличения бо нечестивому, раны ему. / Не обличай злых, да не возненавидят тебе, / обличай премудра, и возлюбит тя. / Даждь премудрому вину, и премудрший будет; / сказуй праведному, и приложит приимати. / Начало премудрости - страх Господень, и совет святых - разум: / разумети бо закон, помысла есть благаго. / Сим бо образом многое поживеши время, / и приложатся тебе лета живота.
На Литии стихиры, глас 6:
Небесная Царице Богородице, / на святем Твоем образе, / емуже ныне празднуем благочестно, / зрим Тя мафорием Своим Христа Богомладенца укрывающую / и от всех зол ограждающую, / и ланиту Свою к Нему с любовию приклоняющую. / Темже во умилении взываем Ти: / приклонися с любовию к воздыханиям сердец наших / и соблюди под Твоим мафорием град Ярославль, / и вся грады и страны христианския от всякого зла, / и моли Сына Твоего и Бога нашего, / подати нам грехов оставление и велию милость.
Слава, и ныне, тойже:
Тебе вси роди человечестии / хвальные дары приносят, Владычице, / и молятся яко Царице Матери Божией, / пророцы Тя премудро проповедаша, / левити благословиша, / апостоли и мученицы исповедаша, / вся сословия покланяются, / архиереи проповедуют, / монаси и простии благоговеют, / богатии и убозии, сироты и вдовы, / и всяк возраст, и всяко преспеяние,/ старческое и младенческое, / под кров Твой державный с верою прибегаем: / покрый и соблюди, Госпоже, молитвами Твоими / и спаси от бед души наша.
На стиховне стихиры, глас 2.
Подобен: Доме Евфрафов:
Воспоим вернии / Взбранную Воеводу / града нашего / языки побеждающую / Пречудную Владычицу.
Стих: Помяну имя Твое / во всяком роде и роде.
Воспоим вернии / Теплую христианом Предстательницу, / скорбящих утешение, / печали утоление / Едину Богоматерь.
Стих: Слыши, Дщи, и виждь, / и приклони ухо Твое.
Икона всеславная / Матере Бога нашего / граду Ярославлю во утверждение даровася, / ею бо любовь Свою к нам Богомати являет, / и струи исцелений милостивно источает.
Слава, и ныне, глас и подобен тойже:
Упование христиан, / Пресвятая Дево, / благодатию Твоея иконы/ от всякаго вреда / Твоя рабы соблюдай.
Тропарь, глас 4
Заре благодатная Ярославския Земли, / древле явила еси икону Твою пречестную, / о, Мати, Заступнице рода христианского, / Еюже и ныне просвещаеши тьму века сего / и тугу людей Твоих утоляеши.
На утрени
По 1-м стихословии седален, глас 6
Возлюбила еси угодников Твоих, Владычице, / славного Василия с доблим Константином, / и во дни тяжские святыню Твою явити им милостивно изволила еси, / да будет людем ярославским в щит и ограждение, / печалей утоление, / в болезнех исцеление, / в скорбех утешение / и от всех нахождений вражиих избавление.
Слава, и ныне, тойже.
По 2-м стихословии седален, глас 5
Икону Свою Владычице, / в сарае небрежно хранимую, / мужу некоему явити изволила еси / и паки на место древнего явления возвратила еси./ Да будет граду нашему от мора и глада избавление, / от нашествия иноплеменных сохранение / и во всех нуждах скорое вспоможение.
Слава, и ныне, тойже.
На полиелеи величание:
Величаем Тя, / Пресвятая Дево, / Богоизбранная Отроковице, / и чтим образ Твой святый, / имже точиши исцеления / всем, с верою притекающим.
Достойно есть величати Тя, Честнейшую Херувим и славнейшую без сравнения Серафим
Псалом избранный:
Боже, суд Твой цареви даждь и правду твою Сыну цареву, / судите людем Твоим в правде и нищим Твоим в суде. / Судит нищим людским и спасет сыны убогих. / Благовестите день от дне спасение Бога нашего. / Господь даст глагол благовествующим силою многою.
По полиелеи седален, глас 6:
Днесь о всех чудесех Твоих, Владычице, / на Земле Ярославстей бывших, / благодарения Ти Церковь приносит. / Темже сошедшияся люди Твоя от Небес благослови, / разум наш уцеломудри, / житие наше исправити помози, / и моление к Богу вознеси о спасении душ наших.
Слава, и ныне, тойже.
По 50-м псалме стихира, глас 6:
Егда скорбь велия на землю Ярославскую нападоша, / тогда боголюбивые князие Василий с Константином, / принесоша икону Твою, Владычице, в град Ярославль, / и весь народ ярославский с трепетом обстояху Ю: / и ови убо взирающе на зрак Твой, / ужасом одержими бяху, / и со слезами вопияще Ти: / о Пресвятая, прииди и сохрани град сей, / знаем Тя Заступницу крепкую, / Надеждо и Упование наше, / но о Пречистая, / молися прилежно Сыну и Богу Твоему, / спастися стаду Твоему невредиму.
Канон, глас 4.
Песнь 1
Ирмос: Отверзу уста моя, / и наполнятся Духа, / и слово отрыгну Царице Матери, / и явлюся, светло торжествуя,/ и воспою, радуяся, Тоя чудеса.
Кую похвалу, Всехвальная Владычице, принесу Ти нечисты устне имущи, / кую достойную песнь, Всепетая, принесет Тебе мое неможение, / но яко Милостивая, очисти мя Твоим благоутробием / и даждь ми крепость воспети Твоя чудеса.
Приидите, соберитеся, ярославстии людие, / умы тайно очистившеся, / в пречестный храм Успения Всенепорочныя Владычицы / и возопийте, умильно молящеся, к честному образу взирающе: / Богородице Дево, хвалящия Тя спаси.
Благоговеют пред Тобою, Госпоже, Ангелов начальницы,/ и святых чини честно служат Ти, / праведнии красуются, князи же Василий и Константин молятся, / и град Ярославль похваляет светло. / Мы же, грешнии, припадая к Твоей святой иконе, Ярославския, / милости просим и воспеваем Твоя чудеса.
Обретши сокровище радуются, / темже и мы, имея икону красоты Твоея, Ярославскую, / милосердия сокровище Небесное и неиждиваемое, / воспеваем, радующеся, Твоя чудеса.
Песнь 3
Ирмос: Твоя песнословцы, Богородице, / живый и независтный Источниче, / лик себе совокупльшия, духовно утверди, / в Божественней Твоей славе / венцев славы сподоби.
Слава Тебе, Всенепорочная, / любящим Тя девам неотъемлемое сокровище, / целомудрия источниче, / Небесныя сладости откровение, / уныния и печали истребление, / смиренных и боголюбцев венчание, / и постников удобрение.
Нечистых помышлений моих множества / и безместных мыслей обуревания кто изрещи может, Пренепорочная? / Настояния же безплотных враг моих и сих злобу кто исповесть? / Но Твоею мольбою, Благая, сих ми всех избавление даруй.
Поют Тя, Богородице, Ангельские чини / и празднуют Патриархи со святители, / с ними же и Боголюбивые ярославстии народи, / притекающе во святую твою Церковь / молят Тя усердно/ помиловати град Твой и люди / в нем живущия и любовию Тя величающия.
Ныне чествующе Тя в цельбоноснем образе Твоем, Пречистая, / смиренно тому покланяемся, и любезно целуем / и, к Твоей безмерней любви возвышаеми, / благодать исцелений от Него почерпаем / и Тя, Всепетая, прославляем.
Ин Кондак, глас 3
Днесь светло ликует и веселится град Ярославль, / яко слава Твоя, Владычице, / на нем возсия честнаго образа Твоего принесением, / им же скорбь и тугу людей христоименитых утоляеши // и умилением души наша исполняеши.
Седален, глас 8
Древле Твою, Богомати, икону / боголюбивые князи Василий с Константином / верою и любовию во святый град Ярославль принесоша / и поставиша в новосозданнем храме Успения Твоего, / и множества людей тамо притекати абие навыкоша: / днесь же святыня сия пред очесы нашими зрится // и умиления сердца наша исполняет.
Песнь 4
Ирмос: Седяй в славе на Престоле Божества, / во облаце легце / прииде Иисус Пребожественный / Нетленною Дланию и спасе зовущия: / слава, Христе, силе Твоей.
Приидите, вернии, к пречестному образу Божия Матере, / и обимем сердцы и устнами, очесы и лицем чисто прикасающеся, / и почерпающе исцелений независтные дары от источника приснотекущаго.
Утверди сердце мое во уповании на Тя, Богомати, / изми всякую гордыню и превозношение из помраченнаго ума моего, / и, не яко дым, но яко благоухание принесу Ти хвалу Пречистая.
Ты еси похвала и венец святым всем,/ вси на Тя по Бозе надежду возложихом / и Тебе молимся, Всепетая Владычице, Божия Мати,/ Помощнице грешным и спасение рабом Твоим.
Радостно, вернии вси, грядите, восплещим руками, / зряще Превысшую всех ангельских горних чинов / Деву, Царицу Небес, во храме днесь сущую с нами, / всем источающую токи целебных даров.
Песнь 5
Ирмос: Ужасошася всяческая / о Божественней славе Твоей: / Ты бо, Неискусобрачная Дево,/ имела еси во утробе над всеми Бога / и родила еси Безлетнаго Сына, / всем воспевающим Тя / мир подавающая.
Огнь веры в людех Твоих возжже Твоя, Богородице, икона; / егда бо нашествие сопротивных на Землю нашу найде, / молящиися пред чудотворным образом Твоим победу получаху. / Мы же, тех правнуцы суще, / благодарную память о сем тепле сохраняем.
Пречестная Твоя икона, Богородице Дево, / врачевство всего мира духовное, / к нейже прибегаем и лобызаем Ю, / исцелений благодать почерпающе от Нея, / и недугов телесных и душевных страстей Твоими молитвами свобождаемся.
Не отрини мене до конца от лица Твоего, Мати незаходимого Света, / не попусти мне погрязнуть в пучине беззаконий, / но возведи мене от блата страстей, да взыдет из истления живот мой,/ и пожру Тебе со гласом хваления и исповедания.
Вышняго освященное Божественное селение, радуйся,/ Тобою бо дадеся радость, Богородице, зовущим: / Благословенна Ты в женах еси, Всенепорочная Владычице.
Песнь 6
Ирмос: Божественное сие и всечестное / совершающе празднество, / Богомудрии, Богоматере, / приидите руками восплещим, / от Нея рождшагося Бога славим.
Божественное сие и всечестное совершающе празднество,/ прославления Твоея, Богомати, иконы, / память творим всех чудес, яже Тобою от Нея содеяшася, / о нихже Тя благодаряще, / от Тебе рождшагося Бога славим.
Утоли, Владычице, молитвами Твоими, / церковные соблазны и разделения страны нашея, / отступльшия же от Православныя Церкви пастыри и мирския люди на путь истины обрати, / да вси едино пребывающе, согласно Господа славим.
Идолослужение в лихоимении и заблуждении от истинного благочестия и православныя веры потреби от мене, Владычице, / и не попусти мя пасти падением еретическим, / да восхваляю имя Твое благословенное до кончины живота моего в православии непорочно, / Едина Приснодево.
Призри, Святая, с Небес, к рабом Твоим и в помощь потщися, / всякую язву, болезнь, всякий недуг исцели. / Старцу согбенному жезл, Заступница сирым явися, / всем источающую токи целебных даров.
Кондак, глас 3.
Подобен: Дева днесь:
Дева днесь предстоит в Церкви / и с лики святых невидимо за ны молится Богу, / святые князие Василий с Константином радуются,/ и с ними вся Земля Ярославская торжествует, / нас бо ради молит Богородица / Превечного Бога.
Икос:
Огради моя помышления, Пречистая, / и Небесным Твоим благословением / подвигни мя достойно воспети славу Твою / да, надеяся на милость Твою, дерзну убогим языком воззвати к Тебе:/ радуйся, Ярославская похвало, от лет древних нас освящающая; / радуйся, Небесная наша Мати, присно с нами прибывающая любовию и милосердием; / радуйся упование и крепость рабов Твоих, присно чтущих Образ Твой честный; / радуйся, Молебнице наша неусыпающая, пред Сыном Твоим и Богом. / Радуйся Пречистая, Ты бо нас ради молиши Богородице Превечного Бога.
Песнь 7
Ирмос: Не послужиша твари Богомудрии / паче Создавшаго, / но, огненное прещение мужески поправше, / радовахуся, поюще:/ препетый отцев Господь и Бог, благословен еси.
Зависти в помысле моем не даждь вкоренятися, Рождшаяся от корене свята, Дево, / и братоненавидения избави мя, Чистая. / Да не злобою мрачною осквернен быв, лишуся Божия благодати и жизни вечныя, Всенепорочная Владычице.
Архангельскую песнь, еже радуйся, Тебе зовем, Богоневесто,/ Господь с Тобою, / радуйся, радосте Ангелов и всех человеков, / радуйся, Неискусобрачная, / славящих Тя, воистину веселие, / Еюже нам возсия хвалимый отцев Бог и препрославлен.
Воистину сокровище честно граду Твоему, икона Твоя, даровася, Пречистая, / Юже сами зряще, о чудеси удивляемся, Сыну Твоему вопиюще: / препетый отцев Господь и Бог, благословен еси.
Светильницы всезлатии, благовернии князие и чудотворцы Василий с Константином, / икону Твою Чистая с благоговением принесоша во святый град Ярославль / и все упование на Тя возлосше / велие утешение получивше и воспеша: / препетый отцев Господь и Бог, благословен еси.
Песнь 8
Ирмос: Отроки благочестивыя в пещи / Рождество Богородичо спасло есть; / тогда убо образуемое, / ныне же действуемое, / вселенную всю воздвизает Пети Тебе: / Господа пойте, дела, / и превозносите Его во вся веки.
Одержими радостию в сей светлый день праздника Богоматере, / все упование на Ню возложим в скорбех и печалех жизни нашея./ Не усыпает о нас в молитвах Пречистая Матерь Спасова/ и являет чудное Свое милосердие ко всем, / верно чтущим Ея образ святый.
Приими нашу слезную молитву, Всеблагая, / и испроси нам оставление грехов, мирное житие и благую кончину от Господа: / вемы бо, вемы воистину, Дево, яко вся возможна Тебе, аще токмо восхощещи. / Темже со упованием крепким поем во славу Твою / и превозносим Тя во вся веки.
Воистину бесценное сокровище, Владычице, икона Твоя Ярославская нам даровася, / струи исцелений верным источающая: / темже независтную благодать вземлюще, / воспеваем Рождество Твое, Чистая, и превозносим во вся веки.
Облистай мя светом Божественного лика Твоего, Отрада моя Пречистая, / егда душа моя от тела разлучатися будет и грехов моих испроси разрешение, / да радуйся, пою Тя, Владычице и вопию Сыну Твоему: / благословите, вся дела Господня, Господа.
Песнь 9
Ирмос: Всяк земнородный / да взыграется, Духом просвещаемь, / да торжествует же Безплотных умов естество, / почитающее священное торжество Богоматере,/ и да вопиет: / радуйся, Всеблаженная Богородице, / Чистая Принодево.
Боголюбивому житию наставницы, князи Василий и Константин, были есте / и молебно подвизалися есте пред пречудным образом Божия Матере: / светлейши бо солнца возсия пречестная икона Пресвятыя Богородицы, / Ейже молитеся спастися нам.
Необоримый покров Твой, Владычице, / и заступление ублажаемых нами ныне князей / да будет присно с нами, / спасающе нас от всякого навета враг видимых и невидимых.
Прибегаем к Твоей, Дево, благости, / и очи сердец наших воспущаем к Тебе, Чистая, / и с плачем колена преклоняюще, молим Тя: / не презри нашего воздыхания/ и буди нам Предстательнице и Помощнице в день судный.
Устнами смиренными принесох Ти препростое сие, Всепетая, пение: / понеже груб есмь, многогрешный, и недостоин по достоянию воспети Тя, / но от усердия на Твоя щедроты надеяся,/ яко Спасителя всего мира родила еси, / не возгнушайся, Царице, приими сие и спаси мя.
Светилен:
Пречистаго образа Твоего явление, Мати Божия, празднуем светло, / ибо в нем познаваем знамение Твоего к Земле Ярославской благоволения, / покрываеши и спасаеши на Тя уповающия, / Богородице Всепетая и Неискусобрачная.
На хвалитех стихиры, глас 1
Подобен: Небесных чинов
Небесных Чинов вышшая, / Херувим и Серафим славнейшая, / радосте Ангелов, / нерукотворенная Скиние, / Лествице и Ковчежец всезлатый / Ты еси Благословенная Владычице.
Светоносная Палата Духа Святаго, / роду христианскому державная Помощнице, / Зерцало Превечного Света, / приити к нам благоизволила еси, / и вся осветила еси, / пречистым зраком иконы Твоея, Владычице.
Василий и Константин радуются / о преславных благодеяниях Божия Матере / и к молитве сродников своих призывают / и икону Богородицы почитати научают, / чрез Нее любовь к Земле Ярославской явившую, / и тугу людей оной утолившую.
Слава, и ныне, глас 6.
Никтоже, притекаяй к Тебе, / посрамлен от Тебе исходит,/ Пречистая Богородице Дево, / но просит благодати / и приемлет дарование к полезному прошению.
На Литургии служба Богородице.