Служба Славней Владычице Нашей Пресвятей Богородице пред иконой Ея «Ярославская-Печерская»
Месяца мая в 14-й день
На велицей вечерни
На Господи, воззвах: стихиры, глас 1
Подобен: О дивное чудо:
О, ди́ное чу́до, / ико́на Богома́тери, / преди́вно нам в оби́тели Преображе́нстей явля́ется / и чудесы́ всех просвеща́ет, / весели́ся Русь правосла́вная, / Богоро́дечен святы́й до́ме, / возопие́м ве́рнии, / Гаврии́ла иму́ще чинонача́льника: / Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
Ди́вны Твоя́ та́йны, Богоро́дице,/ я́ко зало́г любве́ к ро́ду христиа́нскому,/ да́руеши свяще́нную ико́ну Твою́,/ Небе́сной благода́ти испо́лнену,/ сла́ва Твоя́ Боголе́пная, Богоподо́бными сия́ющи чудесы́,/ свы́ше бо призирае́ши на нас, Влады́чице,/ и ми́лостию Свое́ю гре́шных покрыва́еши./ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
О, ве́лие чу́до,/ на ме́сте се́м бла́годать Бо́жия спаси́тельная излива́ется:/ че́стный о́браз Богома́тере/ мно́гими зна́мениями исцеле́ний/ ди́вно прославля́ется./ Весе́лися, оби́теле Преображе́нская,/ ра́дуйтеся, лю́дие христоимени́тии,/ возопии́м ве́рно Цари́це Богои́збранной Отрокови́це:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
Черто́г зрим укра́шенный, храм Твой, Богоро́дице,/ в не́мже непреста́нно покланя́ющеся живоно́сному о́бразу Твоему́,/ ра́дуемся, земноро́днии, / о Боже́ственней Твое́й сла́ве крася́щеся:/ те́мже лику́юще и прославля́юще Тя,/ ча́ем ми́лости Твое́й бога́тыя / и благода́рственная пе́ния воспева́ем./ Благода́тная, ра́дуйся, / с Тобо́ю Госпо́дь,/ подая́й ми́рови Тобо́ю ве́лию ми́лость.
Слава, и ныне, глас 8.
Подобен: О преславного чудесе:
Да ра́дуется днесь ве́рных мно́жество,/ обстоя́ще о́браз Пресвяты́я Богоро́дицы,/ Тоя́ бо от него́ источа́ет неисцерпа́емыя ми́лости,/ многовре́менне боля́щей, я́влься, исцели́ пресла́вно,/ и мужа́, подо́бне боле́знующаго, премени́ неду́га / и очесе́м боле́знующим здра́вие подава́ет,/ и разли́чная ина́я исцеле́ния,/ и ны́не мо́лит Сы́на своего́ и Бо́га на́шего,/ поми́ловатися душа́м на́шим.
Вход. Прокимен дне и чтения три.
Бытия́ чте́ние (глава 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (главы 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
При́тчей чте́ние (глава 9):
Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному,и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На Литии стихиры, глас 5:
Творе́ние Ге́рмана Патриа́рха:
Востру́бим трубо́ю пе́сней,/ прекло́ншися бо свы́ше Всецари́ца, Ма́ти Де́ва/ благослове́ньми венчава́ет воспева́ющия ю́./ Благове́рнии лю́дие да стеку́тся/ и Ца́рице да воспле́щут в пе́снех, Царя́ ро́ждшей,/ сме́ртию одержи́мыя пе́рвее/ разреши́ти человеколю́бно благоволи́вшаго./ Па́стырие и учи́телие,/ До́браго Па́стыря Пречи́стую Ма́терь, соше́дшеся, восхва́лим:/ све́щник светоза́рный,светоно́сный о́блак,/ Небе́с простра́ннейшую, одушевле́нный киво́т,/ огнезра́чный Влады́чень Престо́л,/ манноприе́мную злату́ю ста́мну,/ заключе́нную Сло́ва дверь./ Всех христиа́н прибе́жище/ пе́сньми Богоглаго́ливыми похваля́юще, си́це рцем:/ пала́то Сло́ва,/ сподо́би смире́нныя ны Небе́снаго Ца́рствия,/ ничто́же бо невозмо́жно хода́тайству Твоему́.
Сла́ва, и ны́не, глас 6.
Подобен: Все отложше:
Кто не удиви́тся и не просла́вит/ Засту́пницу ро́да на́шего,/ чуде́сно явля́ющую е́же о нас промышле́ние/ в ди́вном ли́ке Свое́м,/ изображе́нном на сте́не це́ркви Пече́рстей,/ е́же благогове́йно воспомина́юще,/ благода́рно вси воззове́м Обра́дованней:/ ра́дуйся, на́ша ми́лостивая Ма́ти,/ Яросла́вская похвало́.
На стиховне стихиры, глас 5.
Подобен: Радуйся, Живоносный Кресте:
Ра́дуйся, свята́я оби́теле Преображенская,/ в благознамени́тый день явле́ния в тебе́/ безме́рныя ми́лости Богоро́дицы,/ и благода́рственно воспева́юще Ма́терь Бо́га на́шего / и всемо́щную Храни́тельницу оби́тели сея́,/ из глубины́ души́ прося́ще пред чуде́сным Ея́ о́бразом, / ми́ра и спасе́ния душа́м на́шим.
Ра́дуйся, ту́чная горо́;/ радуйся, седа́лище Бо́жие;/ ра́дуйся, купино́ неопали́мая;/ ра́дуйся, глубино́ неубозри́мая;/ ра́дуйся, Богоро́дице Всепе́тая;/ ра́дуйся, ле́ствице небе́сная;/ ра́дуйся, хра́ме одушевле́нный; / ра́дуйся, ру́чко всезлата́я;/ ра́дуйся, не престаю́щая ми́ру ра́досте.
Ра́дуйся, престо́ле огнезра́чный;/ ра́дуйся, ски́ние Ду́хом Святы́м осене́нная;/ ра́дуйся, Боже́ственная трапе́зо;/ ра́дуйся, пала́то и черто́г небе́сный;/ ра́дуйся, ста́мно ма́нны;/ ра́дуйся, разреше́ние кля́твы;/ ра́дуйся, бла́гости пода́тельнице;/ ра́дуйся, покро́ве чистоты́ и де́вства;/ ра́дуйся, Не́весто Неневе́стная.
Слава, и ныне, глас тойже:
О, мно́гих Тво́их чуде́с, Богоблагода́тная,/ соде́ланных о́бразом Твои́м!/ Всяк бо, прите́кший к Тебе́ с ве́рою,/ не оты́де от ли́ка Твоего́ тощ и не услы́шан:/ слепи́и у святы́я Твоея́ ико́ны прозре́ша,/ хроми́и, разсла́блении и глуси́и исцели́шася,/ бед и неду́гов изба́вила еси́ призыва́ющих Тя,/ Ма́терь Всеще́драго Бо́га на́шего,/ подаю́щаго нам Тобо́ю ве́лию ми́лость.
Тропарь, глас 4.
Дне́сь Засту́пницы на́шей наста́ торжество́,/созыва́ет бо нас Богома́ти почерпа́ть благода́ть от исто́чника исцеле́ний,/ чудотво́рныя своея́ ико́ны,/ прииди́те ве́рнии наслади́мся / и возопии́м глаго́лаще:/ ра́дуйся, Благода́тная,/ Госпо́дь с Тобо́ю,// и Тобо́ю с на́ми.
На утрени
По 1-м стихословии седален, глас 8
Красоте́ де́вства Твоего́ и пресве́тлой чистоте́ Твое́й / Гаврии́л удиви́вся, вопия́ше Ти, Богоро́дице: / ку́ю Ти похвалу́ принесу́ досто́йную? / что же возымену́ю Тя? / недоумева́ю и ужаса́юся. / Те́мже, я́ко повеле́н бых, вопию́ Ти: / ра́дуйся, Благода́тная.
Слава, и ныне, тойже.
По 2-м стихословии седален, глас 5
Кий ум пости́гнути возмо́жет си́лу благода́тных исцеле́ний,/ исходя́щих от ли́ка Твоего́ свята́го,/ в Боже́ственнем сем хра́ме пребыва́ющаго,/ всем с ве́рою кре́пкою и моли́твою непрестаю́щею прибега́ющим к Тебе́,/ Многоми́лостивой Цели́тельницей явля́ещися,/ и исцеле́ния оби́льно подае́ши.
Слава, и ныне, тойже.
На полиелеи величание:
Велича́ем Тя, / Пресвята́я Де́во, / Богои́збранная Отрокови́це, / и чтим о́браз Твой святы́й, / и́мже то́чиши исцеле́ния / всем, с ве́рою притека́ющим.
Псалом избранный: Помяни́, Господи́, Дави́да и всю́ кро́тость его́. Пресла́вная глаго́лашая о тебе́ гра́де Бо́жий. Освяти́л есть селе́ние свое́ вы́шний. Помяну́ и́мя твое́ во вся́ком ро́де и ро́де.
По полиелеи седален, глас 6:
Егда́ жена́ Алекса́ндра лиши́ся здра́вия/ и неможа́ше идти́ в Це́рковь бо́жию,/ тогда благоволи́ла еси́ во сне яви́ти ей О́браз свой и́ рещи́,-/ вот смотри́!ты возобнови́!/ ты ищи́ и бу́дешь исцелена́,/ она же вня́т гла́су Твоему́, Пречи́стая,/ обре́те о́браз Твой в обители Преображе́нстей,/и получи́вши исцеле́ние, принесе́ Тебе́ благодаре́ние,/ пред свято́ю ико́ною Твое́ю,/ возвести́ же и про́чим людям града Яросла́вля,/ я́ко Ма́терь Бо́жия покро́в, и по́мощь, и держа́вное предста́тельство,/ и да прибега́ют к Ней вси во вся́кой ну́жде,/ и услы́шит всех со благогове́нием прибега́ющих к Ней правосла́вных христиа́н,/ я́ко Блага́я Помо́щница.
Канон, глас 4.
Песнь 1
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я,/ и воспою́, ра́дуяся, Тоя́ чуде́са.
Чуде́с Твои́х Боже́ственных мно́жество благохвали́ти предпринима́я,/ Тя молю́, Дево, от се́рдца, Благода́тную,/ благода́ть пода́ждь ми.
Кто не изуми́тся Твоего́ о́браза чудесе́м Де́во?/ Ты бо его́ не́кой боля́щей жене́ двукра́ты во сне яви́ла еси́ и рече́:/ты ищи́!/ ты возобнови́!/ и бу́дешь исцелена́.
Жена́ сея́, от духо́в зло́бы му́чима,/ обре́те ико́ну Твою́,/ моля́щи Тя приле́жно и получи́ соверше́нное исцеле́ние, / просла́ви Тя Безме́здную Цели́тельницу.
Осем ди́вном смотре́нии Твое́м / сла́ва и́де по всей земле́ на́шея /и потече́ к тебе́ я́ко исто́чнику приснотеку́щему исцеле́ний /боголюби́вый наро́д правосла́вный.
Песнь 3
Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Све́та разу́мнаго светле́йший сосу́де,/ тьму моего́ разреши́ се́рдца,/ страсте́й же тяжча́йшее бре́мя, молю́ся, облегчи́,/ наставля́ющи мя к покая́нию стезя́м/ и бу́дущему сподобля́ющи мя све́ту, Всеблаже́нная Влады́чице.
Я́ко любвеоби́льная Ма́ти я́вльшися, о́троку в разслабле́нии су́щу,/ здра́вие соверше́нное дарова́ла еси,/ та́ко и мы да обря́щем Тя Ма́терь любвеоби́льную.
Та́ко слы́ша о чудесе́х Твои́х Богома́ти,/ мона́хиня не́кая, горя́чкой жего́ма и зре́ния лиши́ся,/ от глубины́ серде́чныя со слеза́ми моля́щеся тебе́,/-да́руй ми прозре́ние,/ и пома́зашеся еле́ем от твоей ико́ны и прозре́,/ и узре́ чу́дный о́браз Твой, Пречи́стая.
Нам, лю́бящим Тя, Бла́гая, / и любо́вию почита́ющим,/ и в хра́ме в твой пра́здник лику́ющим, / испроси́, моли́твами Твои́ми, исправле́ние жития́ и прегреше́ний проще́ние.
Седален, глас седален, глас 6
Воззре́вше на пресла́вный лик Богома́тери,/ чуде́сно явле́нный во оби́тели Преображе́нстей явля́ется,/ боголюби́вии лю́дии удиви́шася снизхожде́нию Присноде́вы/ и, зря́ще чудеса, исходя́ща от о́браза,/ сла́вляху Го́спода и Творца́ вся́ческих,/ кла́няющеся Обра́дованней Де́ве и Ма́тери на́шей.
Песнь 4
Ирмос: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.
Всновиде́нии му́жу разсла́блену яви́лася еси́, / и спи́сок с ико́ны Твоея́ сде́лать повеле́ла еси́./ Он же ве́рою и любо́вию окриля́ем,/ испроси́ воды́ и еле́я от ико́ны Твоея́,/ и воста́ от одра́ боле́зненнаго.
Чуде́с Твои́х ви́дяще мно́жество,/ разуме́ем незри́мый покро́в Влады́чицы над ме́стом сим благода́тным,/ устна́ми и се́рдцем прино́сим хвалу́ Тебе, Благода́тная.
Твои́м матери́нским покро́вом, Пречи́стая,/ да защища́еши и ны́не место сие / и ве́рою служа́щих Ти в нем.
Ты – весе́лие в оби́телех Твои́х живу́щих / и градо́в дре́вних утеше́ние и похвала́, Де́во Мари́е,/ Препе́тая и Превозноси́мая во ве́ки.
Песнь 5
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во,/ име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Муж не́кий боля́щий зело́,/ иму́щий ве́ру и любо́вь к Тебе́, Всеми́лостивой,/ спи́сок с ико́ны Твоея́ испроси/́ и облегче́ние боле́зни своея́ вско́ре получи́.
Уразуме́в по́мощь Твою́, Де́во,/ муж сей, еще́ боля́, восхоте́ первоо́бразу Твоему́ поклони́ться,/ притече́ в Яросла́вль, в оби́тель Преображе́нскую.
Вупова́нии на Тя, Богома́ти,/ сей раб Твой, моле́бное пе́ние Тебе́ соверши́в,/ та же и к Боже́ственной Трапе́зе приступи́в,/ и исцеле́ соверше́нно,/ просла́ви Тя, ми́лостивую Засту́пницу.
Ра́дуйся, Влады́чице,/ Хлеб Жи́зни вмести́вшая,/ в сей день нас к Боже́ственной Трапе́зе призыва́ющая/ и Небе́сного Хле́ба, Твои́ми моли́твами, вкуси́ти нас сподобля́ющая.
Песнь 6
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те рука́ми воспле́щим, / от Нея́ ро́ждшагося Бо́га сла́вим.
Ди́вные зна́мения ми́лости от ико́ны Твоея́ испуща́ещи Влады́чице,/ ду́хов зло́бы отгна́ла еси́ от отрокови́цы,/ и здра́вие дарова́ла еси́, сего́ ра́ди.
Ми́лости Твоея́ мя сподо́би, неми́лостиваго,/ и зло́бием одержи́ма, и страсте́м прилежа́ща,/ Пречи́стая Де́во Богоневе́стная.
Я́ко испра́вила еси́ пре́жде разсла́бленнаго,/ та́ко и нас душе́вно разсла́бленных, те́плым Твои́м предста́тельством испра́ви,/ да пое́м при́сно вели́чия Твоя́.
Вода́ еси́ неисчерпа́емая, Деви́це,/ Дщерь Царя́ Небе́снаго,/ от Нея́же вси ве́рнии, пию́ще,/ благода́ти исполня́емся, душе́ю и те́лом освяща́еми.
Кондак, глас 2
Притеце́м лю́дие к чу́дному о́бразу Пресвяты́я Богоро́дицы,/ пода́ет бо Богома́ти да́ры исцеле́ний,/ всем с ве́рою и любо́вию приходя́щим к Ней,/ та́ко и мою́ не́мощь посети́,/ и ду́шу мою́ поми́луй, Блага́я,/ и те́ло исцели́ благода́тию Твое́ю Пречи́стая.
Икос
Притеце́м к чу́дней ико́не Богородицы́/ и любе́зно сию́ обстоя́ще, ра́достно лобыза́юще, си́це рцем:/ ра́дуйся, сокро́вище неистощи́мое,/ ра́дуйся немы́х глаго́лание, / ра́дуйся, глухи́х слы́шание, / ра́дуйся, лиши́вшихся ума́, но́вый уме подаю́щая, / ра́дуйся младе́нцев исцеле́ние, / ра́дуйся хромы́х и опу́хлых врачева́ние,/ ра́дуйся, исто́чниче приснотеку́щий,/ ра́дуйся, ми́лости пучи́но,/ ра́дуйся, Ра́досте на́ша, Яросла́вская похвало́ и всего́ ми́ра утеше́ние.
Песнь 7
Ирмос: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше,/ радовахуся, пою́ще: / препе́тый отце́в Госпо́дь и Бог, благослове́н еси́.
По́честь и поклоне́ние вознося́щи Тебе́, де́вственная Похвало́,/ о Тебе́ ра́дуется, Благода́тная, вся́кая тварь,/ А́нгельский собо́р и челове́ческий род, досто́йно взыва́ющи:/ благослове́нна еси́ Ты, Влады́чице, Де́во Неискусобра́чная.
Немото́ю и разслабле́нием одержи́мь муж не́кий, / слы́шав о чудесе́х Твои́х, Де́во,/ от ико́ны Твоея́ Пече́рския бы́вших,/ приле́жно моля́ся Тебе́, на одре́ лежа́,/ и, ощути́в кре́пость теле́сную, со умиле́нием возопи́:/ сла́ва си́ле Твое́й Богома́ти.
Ты даро́ваний исто́чник / и благода́ти яви́лася еси́ пучи́на,/ от нея́ же ка́плю, Отрокови́це, и мне пода́ждь, пою́щему тя.
А́нгелов Сла́досте, скорбя́щих Ра́досте,/ христиа́н Предста́тельнице и ве́ры Правосла́вныя Утвержде́ние Ты еси́, Ма́ти Госпо́дня,/ заступи́ нас и изба́ви ве́чных мук.
Песнь 8
Ирмос: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет Пе́ти Тебе́: / Го́спода по́йте, дела́, / и превозноси́те Его́ во вся ве́ки.
Ста́мна дре́вле, иму́щая ма́нну, Чи́стая, образова́ше Тя,/ Христа́ бо, сла́дость на́шу, носи́ла еси́ во чре́ве / и пло́тию родила́ еси́, избавля́ющаго вся́кия го́рести безме́стных прегре́шений / превознося́щия Того́ во ве́ки.
Что́ принесе́м Тебе́, Влады́чице,/ а́ще не смире́ние, в лю́бви растворе́нное,/ е́же соверше́нное яви́ла еси́ нам.
Ми́лости Твое́й сподоби́ мя, благоми́лостивное Сло́во ро́ждши,/ и ны́не, Влады́чице, прибега́юща мя к Тебе́ спаси́.
Я́коже ло́жницу Бо́жию и кади́льницу разу́мнаго и светоно́снаго У́гля,/ Приснора́дованную воспое́м, зову́ще:/ ра́дуйся, вина́ спаси́тельнаго воззва́ния, Благослове́нная во ве́ки.
Песнь 9
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере,/ и да вопие́т: / ра́дуйся, Всеблаже́нная Богоро́дице, / Чи́стая Приноде́во.
А́нгел вопия́ше Тебе́, Де́во Чи́стая: ра́дуйся!/ Мы же, что Ти принесе́м, Блага́го Царя́ Блага́я Ма́ти,/ я́ко яви́ла еси́ нам сокро́вище неоску́дное –/ чудотво́рную ико́ну Твою́ на освяще́ние и исцеле́ние душ и теле́с на́ших.
Ми́лостива мне яви́ Судию́,Сы́на Твоего́, / Его́же родила́ еси́ без се́мени, / егда́ ся́дет на Престо́ле святе́м суди́ти,вся земна́я,/ о и́хже в житии́ безме́стных соде́яша.
Слюбо́вию просла́вляем Тя, Отроковице, / и с упованием вопие́м: /да не оскуде́ют милости Твоея на ме́сте сем / и сохрани́ нас, Блага́я Засту́пница, от вся́каго зла.
Я́ко Ма́ти всех нас, / милосе́рдно приими́, Преблагослове́нная,/ сие́ убо́гое сло́во Твоего́ после́дняго раба́/ и сохрани́ его́ и всех нас во ве́ки веко́в.
Свети́лен:
Све́том чудес озари́вшая це́рковь Пече́рскую от пречу́днаго ли́ка Твоего́, Богоро́дице,/ возсия́й ми свет спасе́ния огне́м покая́ния,/ да ве́рою и любо́вию сла́влю Тя, Приснопрославля́емую.
На хвалитех стихиры, глас 2.
Подобен: Егда от древа:
Ра́дуйся, ско́рая Помо́щнице,/ ра́дуйся, отча́янных Еди́на Наде́ждо,/ ра́дуйся, неча́янная гре́шных Ра́досте,/ ра́дуйся, в печа́лех Утеше́ние и Отра́до,/ ра́дуйся, Цели́тельнице немоществу́ющих,/ ра́дуйся, держа́вный Покро́ве,/ ра́дуйся, всех христиа́н Прибе́жище.
Ра́дуйся, неруши́мая Стено́,/ ра́дуйся, неопали́мая Купино́,/ ра́дуйся, живоно́сный Исто́чниче,/ ра́дуйся, неувяда́емый Цве́те,/ ра́дуйся, ума́ прибавле́ние,/ ра́дуйся, ми́лости Пучи́но,/ ра́дуйся, всех ра́достей на́ших,Ра́дость.
Ра́дуйся, Бла́гая Врата́рнице,/ ра́дуйся, неупива́емая Ча́ша,/ ра́дуйся, гре́шных Спору́чнице,/ ра́дуйся, в ро́дах Помо́щнице,/ ра́дуйся, взыска́ние поги́бших,/ ра́дуйся, умягче́ние серде́ц злых,/ ра́дуйся, всех скорбя́щих Ра́досте.
Ра́дуйся, неугаси́мая Лампа́до чистоты́,/ ра́дуйся, Изба́вительнице,/ ра́дуйся, хлебо́в Спори́тельнице,/ ра́дуйся, благода́тное Не́бо,/ра́дуйся, Млекопита́тельнице,/ ра́дуйся, Засту́пнице усе́рдная ро́да христиа́нского.
Слава, и ныне, глас 6.
Подобен: Все отложше:
Никто́же, притека́яй к Тебе́, / посра́млен от Тебе́ исхо́дит,/ Пречи́стая Богоро́дице Де́во, / но про́сит благода́ти и прие́млет дарова́ние / к поле́зному проше́нию.
Пресвятей Богородице пред иконой Ея «Ярославская-Печерская»
Тропарь, глас 4.
Дне́сь Засту́пницы на́шей наста́ торжество́,/ созыва́ет бо нас Богома́ти почерпа́ть благода́ть от исто́чника исцеле́ний,/ чудотво́рныя своея́ ико́ны,/ прииди́те ве́рнии наслади́мся / и возопии́м глаго́лаще:/ ра́дуйся, Благода́тная,/ Госпо́дь с Тобо́ю,// и Тобо́ю с на́ми.
Кондак, глас 2
Притеце́м лю́дие к чу́дному о́бразу Пресвяты́я Богоро́дицы,/ пода́ет бо Богома́ти да́ры исцеле́ний,/ всем с ве́рою и любо́вию приходя́щим к Ней,/ та́ко и мою́ не́мощь посети́,/ и ду́шу мою́ поми́луй, Блага́я,/ и те́ло исцели́ благода́тию Твое́ю Пречи́стая.
Велича́ем Тя, / Пресвята́я Де́во, / Богои́збранная Отрокови́це, / и чтим о́браз Твой святы́й, / и́мже то́чиши исцеле́ния/ всем, с ве́рою притека́ющим.