Служба Славней Владычице Нашей Пресвятей Богородице пред иконой Ея «БЛАГОДАТНОЕ НЕБО»
Месяца марта в 6-й день
На велицей вечерни
На Господи, воззвах: стихиры, глас 8
Подобен: О преславного чудесе:
Радуйся, всего мира Радосте,/ радуйся, Похвало и Отрада к тебе притекающих,/ радуйся, здравие болящим./ Радуйся, всех грешных Споручнице,/ радуйся, скорая Услышательнице Тебе молящихся,/ радуйся, Утешительнице скорбящих.// Радуйся, Благодатное Небо, Владычице.
Радуйся, Мати Света,/ радуйся, Стамна всезлатая,/ радуйся, Купино Неопалимая./ Радуйся, Трапеза, Хлебом жизни нас питающая,/ радуйся, Горо, радуйся, Лествице,/ радуйся, пророков исполнение.// Радуйся, Благодатное Небо, Владычице.
Радуйся, Мосте к Небесе всех приводящий,/ радуйся, Руно гедеоново, на него же Господь Наш сниди,/ радуйся, Заре, души наши благодатию просвещающая./ Радуйся, Росо, пламень страстей наших угашающая,/ радуйся, едина Надежда отчаянных,/ радуйся, Дево Мати.// Радуйся, Благодатное Небо, Владычице.
Радуйся, небесная Царице,/ радуйся, милостивая всех Помощнице,/ радуйся, мира умирение./ Радуйся, душ наших спасение,/ радуйся, Радость и Отрада,/ радуйся, Заступница усердная./ Радуйся, путешествующих наставнице,/ радуйся, всех сирых Мати.// Радуйся, Благодатное Небо, Владычице.
Слава, и ныне, глас 6.
Подобен: Все отложше:
Тебе вси роди человечестии/ хвалебные дары приносят, Владычице Богомати/ и яко Матери всех Царя и Бога поклоняются по долгу,/ милосердие твое воспоминающе/ и явление иконы Твоея прославляющее./ Молим Тя прилежно:/ о, Пресвятая,/ сохрани страну нашу от всякого зла,/ миру ниспосли умирение// и душам нашим спасение.
Вход. Прокимен дне и чтения три.
Бытия́ чте́ние (глава 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (главы 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
При́тчей чте́ние (глава 9):
Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному,и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На Литии стихиры, глас 5:
Подобен: Радуйся, Живоносный Кресте:
Днесь вернии ликовствуем,/ обстояще образ Пресвятыя Богородицы,/ Благодатное Небо именуемый,/ и в залог спасения нам дарованный./ Приидите вси христолюбивых людей множество,/ песни и хвалы воздадим Первообразней,/ милости и чудеса Ея воспоминающе,/ и к теплому покрову Ея притекающе,/ помощи просяще и грехов оставление,/ мира умирение// и душам нашим велия милости.
На стиховне стихиры, глас 2.
Подобен: Доме Евфрафов:
Радуйся, Пречистая,/ радуйся, всех радостей наших Радость,/ радуйся, Отрадо страждущих.// Радуйся, Небо Благодатное.
Стих: Слы́ши, Дщи, и виждь,/ и приклони́ у́хо Твое́.
Радуйся, скорбящих Радосте,/ радуйся, милости бездно,/ радуйся, Похвало наша и утверждение.// Радуйся, Небо Благодатное.
Стих: Приведу́тся Царю́ де́вы в след Ея́,/ и́скренняя Ея́ приведу́тся Тебе́.
Радуйся, Радость Ангелов,/ радуйся, монахов тайное веселие,/ радуйся, Надеждо вечнаго спасения.// Радуйся, Небо Благодатное.
Аще пост, сла́ва, и ны́не, глас 3.
Днесь возсия время подвигов начало,/ да не усладится гортань наша приниманием сластей,/ отвергнем всяку злобу и невоздержание,/ очистим ум и тело от всякого греха,/ да сподобимся чистым сердцем видеть воскресение Сына Твоего и Бога нашего/ и Тебе прославлять, Всенепорочная Владычице.
Аще нет поста, сла́ва, и ны́не, глас 2.
Подобен: Егда от древа:
Якоже красная Палато/ явися храм Твой, Владычице,/ в нем же поклоняемся иконе Твоей, Благодатное Небо именуемой,/ яко Самей Ти сущей с нами./ Темже Едина Чистая и Нетленная,/ от всех родов славимая,/ христианский род вознеси// и моли спастися душам нашим.
Тропарь, глас 6.
Что Тя нарече́м, о, Благода́тная?/ Не́бо? – я́ко возсия́ла еси́ Со́лнце Пра́вды;/ рай? – я́ко прозябла́ еси́ Цвет нетле́ния;/ Де́ву? – я́ко пребыла́ еси́ нетле́нна;/ Чи́стую Ма́терь? – я́ко име́ла еси́ на святы́х Твои́х объя́тиях Сы́на, всех Бо́га.// Того́ моли́ спасти́ся душа́м на́шим.
На утрени
По 1-м стихословии седален, глас
Радуйся, обурева́емым ти́хое При́станище,/ радуйся, Ра́дость в печа́ль погруже́нным,/ радуйся, боля́щим Исцеле́ние,/ радуйся, Покро́в всем, к Тебе́ прибега́ющим, Влады́чице,/ Еди́на Чи́стая и Благослове́нная.
По 2-м стихословии седален, глас
Радуйся, возстание разсла́блении, /радуйся, неду́гующим исцеление,/ радуйся, слепым прозрение,/ радуйся, от бесо́в томи́м свобождение,/ радуйся, воинов Крепосте,/ ра́дуйся, исто́чниче дарова́ний, Богоблагода́тная.
На полиелеи величание:
Велича́ем Тя, / Пресвята́я Де́во, / Богои́збранная Отрокови́це, / и чтим о́браз Твой святы́й, / и́мже то́чиши исцеле́ния / всем, с ве́рою притека́ющим.
Псалом избранный: Помяни́, Господи́, Дави́да и всю́ кро́тость его́. Пресла́вная глаго́лашая о тебе́ гра́де Бо́жий. Освяти́л есть селе́ние свое́ вы́шний. Помяну́ и́мя твое́ во вся́ком ро́де и ро́де.
По полиелеи седален, глас 6:
Благоговея предстою пред образом Твоим честным,/ Небо Благодатное,/ и не смею возвести очес своих на Лик Твой девственный, Дево,/ грехми многими увязлен,/ что принесу Ти, Богоневесто,/ кия песни воспою, устне имущи нечисты,/ но Ты Сама очисти мя Твоим Милосердием/ и воздвигни к Твоему славословию,// Многопетая и Неискусобрачная.
Степе́нна, 1-й антифо́н 4-го гла́са.
Проки́мен, глас 4: Помяну́ и́мя Твое́/ во вся́ком ро́де и ро́де.
Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние да хва́лит Го́спода. Ева́нгелие от Луки́, зача́ло 4.
По 50-м псалме́ стихи́ра, глас 6:
Всех святых украшение,/ Радосте Ангелов,/ Отрада болящих,/ грешных Споручница,/ радости нашей Ходатаица.// Слава Тебе, Благодатное Небо, Владычице.
Канон, глас 4.
Песнь 1
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я,/ и воспою́, ра́дуяся, Тоя́ чуде́са.
Отверзи уста моя, Чистая, и наполни духа,/ да радостно воспою чудеса Твоя/ от иконы Твоея Благодатное Небо,/ по вере верным подаваемая.
Христа родившая, радость нам вечную,/ о радуйся, Всепетая,/ радуйся, Пренепорочная,/ икону свою на радость всего мира даровавшая.
Ликуют вси человецы и Ангелы,/ видевши икону красоты Твоея в Архангельском соборе днесь славиму,/ и паче луч солнечных сияющу и благодати струи испущающую.
Радуйся, Небо Благодатное,/ со страхом Ти вопием радостно./ Сподоби и нас,Владычице, Царствия Сына Твоего.
Песнь 3
Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Радуйся, пастыря кронштадтского Похвало и Радование,/ радуйся, обители вауловской украшение,/ радуйся, Тобою наш град сохраняется.
Радуйся, веси сей Покрове,/ радуйся, Утешение скорбящих,/ радуйся, болящих здравие,/ радуйся, инокиням Наставнице:// темже Ти, радуйся, поем по долгу, величающе.
Радуйся, Радость многопетая мирови,/ радуйся, успенския обители забрало и хваление,/ радостное Ти присносим пение,/ радости сподоби нас твоими молитвами к Сыну Твоему и Богу нашему.
Радуйся, злата́я Ста́мно, и Све́щник,/ радуйся, Жезл и Трапе́за, Чистая,/ призыва́ем Тя, Небо Благодатное,/ и глас, еже радуйся, Тебе при́сно приношаем Владычице.
Седален, глас 6
Оледенелое сердце мое, о Пресвятая, растопи твоим предстательством,/ и душу мою очисти от всякого греха,/ помысл облагодати,/ греховные язвы уврачуй,/ тело исцели и укрепи,/ и спасение вечное ниспосли.// Да во веки славлю Тя, Богоневестная.
Песнь 4
Ирмос: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.
Земля Нижегородская Тобою вельми хвалится,/ и глас Архангела приносит Ти радостно:/ радуйся, Благодатная, Господь с тобою.
Икона бо Твоя, Владычице,/ по водам прииде в обитель Твоего Благовещения,/ на радость людем нижегородским,/ и Твоего милосердия прославление.
Радуйся, вдова́м и всем си́рым утеше́ние,/ радуйся, всем источа́ющи ни́щим богатство,/ радуйся, Надеждо душ наших.
Радуйся, Христа Бога нашего Жили́ще,/ радуйся, Доме неизрече́нней и пребоже́ственней Его Славы./ О, радуйся, Пала́то преукраше́нная,/ радуйся, Гра́де одушевле́нный, присноца́рствующий.
Песнь 5
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во,/ име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Радуйся, граду Киеву Утешение,/ радуйся, миру умирение,/ радуйся, сердец злых умягчение./ Радуйся, всех христиан упование.
Радуйся, болящих посещение,/ радуйся, скорбящих веселие,/ радуйся, нищих питательнице,/ радуйся, вдов заступление./ Радуйся, Едина Всепетая.
Мати Христа Бога Нашего,/ когда скорбь на сердце наше найдет,/ тогда Сама радость нам возвести,/ яко Ты еси едина радости нашей Ходатаица.
Сытость твоих похвал, Дево,/ благочестивым отнюдь не бывает,/ к Тебе с любовью притекаем,/ и Тя, честнейшую Херувим и славнейшую без сравнения Серафим,/ величаем.
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те рука́ми воспле́щим, / от Нея́ ро́ждшагося Бо́га сла́вим.
Радуйся, благостыни бездно и щедрот пучино,/ радуйся, Небо Благодатное,/ радуйся, веси луховицкой Радосте,/ радуйся, сущих в беда́х храни́лище, и предгра́дие,// и на враги побежде́ние.
Радуйся, людей православных Помощнице,/ радуйся, христолюбивых пастырей Похвало./ Радуйся, Благодатное Небо, прибежище всем нам и утверждение.
Радуйся, в скорби сердца отраду подающая,/ радуйся, в лишении близких утешающая,/ радуйся, и о представшихся молитвеннице теплая./ Радуйся, Отрадо и Утешение.
Радуйся, Преосененная Горо,/ радуйся, Врата непроходимая,/ радуйся, божественная Стамно манны,/ радуйся, разрушение клятвы,/ радуйся, адамово воззвание,/ радуйся, яко с Тобою Господь, Многопетая.
Кондак, глас 6
Небо Благодатное, / Радость и умирение миру,/ всех родов Надеждо и Спасение,/ беспомощных Помощнице,/ воинству нашему Победа и Похвало,/ врагов одоление,/ градов утверждение,// Ты еси, Владычице, Всепетая.
Ин кондак, глас 6
Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,// да не постыди́мся.
Икос
Пение всеумиленое приносим Ти, Благодатная, / и колена преклоняем пред Пречистым Твоим образом,/ просяще грехов прощение,/ миру умирение./ Заступи и спаси нас молитвами Твоими, Дево./ Ты еси, Владычиче, Всепетая.
Песнь 7
Ирмос: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше,/ радовахуся, пою́ще: / препе́тый отце́в Госпо́дь и Бог, благослове́н еси́.
Радуйся, спасской обители Похвало,/ радуйся, земли воронежской ограждение,/ радуйся, инокинь Отрада,/ радуйся, Невесто Неневестная.
Радуйся, громы и молнии от глав наших отражающая,/ радуйся на воздусе всеизрядная Помощнице воинам нашим,/ радуйся, мира умирение и заступление.
Радости вся испо́лнила еси,/ Вышняя и нижняя Ты совокупи́ла еси, Благодатное Небо,/ темже радостно и согла́сно ныне Небо и вся земля зове́т Ти.
Радуйся, Взбранная Воеводо воинства нашего,/ радуйся, от иноплеменных избавительнице,/ радуйся, единокровные от вражды миром и любовию ограждающая./ Радуйся, Радость всего мира.
Песнь 8
Ирмос: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет Пе́ти Тебе́: / Го́спода по́йте, дела́, / и превозноси́те Его́ во вся ве́ки.
Радуйся, града Липецка Сокровище,/ радуйся, Иванова необоримая Стено,/ радуйся, всея Руси Покрове, Преблагословенная.
Радуйся, земли псковской Диодима,/ радуйся, храма никольского всеизрядное Украшение,/ радуйся, молитвы благовонное Кадило./ Радуйся, наше упование, Всепетая.
Радуйся, града Москвы преславное величание,/ радуйся, троицкого храма Красото и освящение,/ радуйся, земли сербской ликование./ Радуйся, всего мира Утешение, Богоневесто.
Радуйся, хабаровская Слава,/ радуйся, града Малоярославца Отрада,/ радуйся, воинов крепосте./ Радуйся, всех родов веселие.
Песнь 9
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере,/ и да вопие́т: / ра́дуйся, Всеблаже́нная Богоро́дице, / Чи́стая Приноде́во.
Радуйся, Цвете неувядаемый,/ радуйся, девства Доброто,/ радуйся, целомудрия Наставнице,/ радуйся, всех родов Веселие./ Радуйся, Невесто Неневестная.
Егда дух мой от тела разлучатися будет,/ тогда Сама предстани мне, Благая,/ радость спасения мне подающе.
Град Твой сохраняй, Богородительнице,/ и страну нашу от нахождения иноплеменных защити,/ да зовем Ти радостно:/ ра́дуйся, Всеблаже́нная Богоро́дице, / Чи́стая Приноде́во.
Сие нехитростное принесох Тебе пение,/ яко милостивая Владычице приими/ и Сыну Твоему и Богу Нашему принеси,/ да спасет Тобою души наша.
Свети́лен:
Всех Ангел светлейшая и Небес пространейшая,/ умнаго Света Мати/ просвети нас светом Сына Твоего./ Едина радости нашей Ходатаице и спасение душ наших.
На хвалитех стихиры, глас 1.
Подобен: О дивное чудо:
Небо земное,/ облаче росоносный,/ мира благое украшение,/ Ангелов всех Радость,/ человеком предстательство,/ миру Покров и Надежда,/ Обрадованная, радуйся, с Тобой Господь,// и Тобою с нами.
Непроходимая врата,/ Лествице небесная,/ предстательство и забрало всех христиан,/ взбранная Воевода воинства нашего,/ Граде нерушимый,/ Гора святая.// Обрадованная, радуйся, с Тобой Господь,// и Тобою с нами.
Церкви непоколебимый Столпе,/ иноков Отрада,/ пастырем Похвало и Радование,/ грешных Заступнице,/ всех Даров духовных независтная Подательница,/ миру благое Украшение.// Обрадованная, радуйся, с Тобой Господь,// и Тобою с нами.
Слава, и ныне, глас 6.
Подобен: Все отложше:
Никто́же, притека́яй к Тебе́, / посра́млен от Тебе́ исхо́дит,/ Пречи́стая Богоро́дице Де́во, / но про́сит благода́ти и прие́млет дарова́ние / к поле́зному проше́нию.