Ошо көндәрҙә ҡыуаныслы яңылыҡ билдәле булды. 2024 йыл йомғаҡтары буйынса Башҡортостан йәшәү сифаты буйынса иң яҡшы ун төбәк иҫәбенә инде. Стратегик башланғыстар агентлығы рейтингы мәғлүмәттәре кисә баҫылды. Уның буйынса политолог, философия фәндәре докторы, Йәмәғәт палатаһы эксперты Сергей Семенов үҙ фекерен белдерҙе. – Был – Рәсәйҙә бойондороҡһоҙ тикшеренеүселәр тормошҡа ашырған һәм объектив, субъектив мәғлүмәттәрҙе берләштергән хәлгә комплекслы баһа. Әгәр 1990 йылдар башында Башҡортостан производство ҡеүәте буйынса алдынғы урынды биләһә һәм социаль күрһәткестәр буйынса артта ҡалһа, быуаттар рубежында беҙ үҙ потенциалыбыҙҙы һаҡлап ҡалып, социаль күрһәткестәрҙе яҡшырта алдыҡ. Әммә һуңынан йәнә артта ҡалыу күҙәтелә. Һәм бына 2020 йылда Башҡортостан тағы күтәрелеш осоро кисерә. Яңы производстволар асыла, социаль һәм мәҙәни объекттар төҙөлә һәм сафҡа индерелә. Республиканың прогресына булышлыҡ итеүсе халыҡ-ара һәм федераль кимәлдәге күләмле саралар уҙғарыла. Бының республиканың бөтә ҡалаларында һәм райондарында тиерлек эшләнеүе бик мөһим. Етәкселектең кешеләрҙең йәшәү шарттарын яҡшыртыуға иғтибары күренә. Шуға граждандарҙың кәйефе лә күтәренке. Иң мөһиме - ошо йылдар эсендә Башҡортостан үҫешенең ыңғай динамикаһы, – тип һөйләне Сергей Семенов. Хәтерегеҙгә төшөрәбеҙ, Стратегик башланғыстар агентлығы 2021 йылдан башлап йыл һайын йәшәү сифатының абруйлы рейтингын төҙөй. Рейтингта кеше һәм ғаилә өсөн мөһим факторҙар иҫәпкә алына. Улар – торлаҡ, эшкә урынлашыу, медицина, хәүефһеҙлек, экология һәм үҙ-үҙеңде күрһәтеү өсөн мөмкинлектәр менән бәйле мәсьәләләр. Бөтәһе 140 күрһәткес буйынса 10 йүнәлеште баһалайҙар. Һәр йүнәлеш граждандарҙан һорау алыу (быйыл 400 меңгә яҡын респонденттан һорау алынды), статистика һәм геоаналитика мәғлүмәттәре ярҙамында иҫәпләнә. Фото: "Башинформ".