Беҙ ҙә ата-бабаларыбыҙ васыятына тоғро булырға тейешбеҙ

Өс көн дауамында, 12 – 14 декабрҙә, Өфө ҡалаһы йәнә лә башҡорт халҡын туплаған үҙәккә әйләнде, сөнки унда Бөтә донъя башҡорттары ҡоролтайының VI съезы үтте. Ул ысынлап та халҡыбыҙ өсөн мөһим ваҡиға. Сарала төрлө һөнәрле, йәштәге, вазифалағы милләттәштәребеҙ ҡатнашты. Кемдер шунда уҡ фекерен белдерҙе, ҡайһы берәүҙәр сара үткәс, ҙур уйланыуҙарҙан һуң фекерен еткерҙе. Рәсәй Дәүләт Думаһы депутаты Зариф Закир улы Байғусҡаров та ошо сараға ҡарата төплө, тос фекере менән уртаҡлашты. – Башҡортостан, донъяла берҙән-бер башҡорт милләтен туплау урыны булараҡ, башҡорттарҙың мәҙәниәтен һәм телен һаҡлауға һәм үҫтереүгә булышлыҡ итергә тейеш. Ошо маҡсатта республиканың баш ҡалаһы Өфөлә “Бөтә донъя башҡорттары ҡоролтайы” халыҡ-ара йәмәғәт берекмәһенең VI съезы үтте. Башҡортостандың район һәм ҡалаларынан, Рәсәйҙең 31 төбәгенән һәм һигеҙ дәүләттән делегаттар ҡатнашты. Съезда ҡатнашыусыларҙы Милләттәр эштәре буйынса федераль агентлыҡ етәксеһе Игорь Баринов сәләмләне. Башҡортостан Башлығы Радий Хәбиров үҙенең сығышында биш йыл эсендә туған телде, мәҙәниәтте, тарихи хәтерҙе, йолаларҙы һаҡлау өсөн күп эштәр башҡарылыуын һыҙыҡ өҫтөнә алды. “Башҡорттар йәнә, биш быуат дауамында булғанса, ышаныслы, Ватанға тоғро, фиҙакәр, һәр ваҡыт уны яҡларға әҙер халыҡ икәнлегебеҙҙе иҫбатлай", – тине ул. Унда Свердловск өлкәһе губернаторы урынбаҫары, Башҡортостандан Азат Сәлихов ҡатнашты. Ул өлкәләге яҡташтарына, Мәләүез районының Муллағол ауылына ярҙам күрһәтә, бала сағын олатай-өләсәйендә үткәргән. Съезда 2019 йылдағы V cъездың ҡарарҙарын үтәүгә йомғаҡ яһалды. Секцияларҙа туған телде, мәҙәниәтте, йолаларҙы һаҡлау, республиканан ситтә йәшәгән башҡорттарҙың балаларын башҡорт телендә дәреслектәр һәм әсбаптар менән тәьмин итеү мәсьәләләре тикшерелде. Съезд эшенең йомғаҡтары буйынса секцияларҙа ҡабул ителгән тәҡдимдәрҙе иҫәпкә алып, башҡорт халҡын, уның йолаларын һәм телен үҫтереүгә йүнәлтелгән резолюция әҙерләнә. Делегаттар үҙҙәренең ҡалаларында, райондарында, субъекттарында һәм илдәрендә бергә эшләү кәйефе, киләсәккә пландар ҡуйып таралышты. Бөтә донъя башҡорттары ҡоролтайы етәкселегенә һәм аппаратына Съезды ойошторған өсөн рәхмәт. Сараны үткәреүҙә күрһәткән ярҙамы өсөн Башҡортостан Республикаһы Башлығы Хакимиәтенә, Хөкүмәтенә рәхмәт. Башҡорт халҡы борон замандан үҙенең берҙәмлеге, рух ныҡлығы, башҡа халыҡтарға йылы, ҡунаҡсыл мөнәсәбәте менән айырылып торған. Беҙ ҙә ата-бабаларыбыҙ васыятына тоғро булырға тейешбеҙ. Бергә һәм берҙәм булайыҡ! – тип белдерҙе Зариф Байғусҡаров. Фото сығанағы: vk.com/bayguskarov_z_z