В’отэныӈӄо эв’лай омакальг’анма Инэллэиччетык крайик вэтатылг’о министерствак энналлагиӈэпыӈ гамгав’уйвык то энаплэпав’гиӈэпыӈ Корякский округ.
Государственный тайкыёлӄыл Камчатский крайик «Социальный то экономикакэн йиплэпав’гиӈын ваны яӈъя итылг’ын катгогиӈэн «Корякский округ» китыӈ, тит гамгавэтгиӈэпыӈ йиныплэпавык ымыльг’ыӈ ваны. В’утин тайкыёта накояныплэпав’ӈынав’ ёнатгиӈо округык: таяӈгиӈо, йиплэпав’гиӈо йиг’этэн, вэтгиӈо ЖКХ, энанмалав’гиӈо, энангыёлав’гиӈо, тапечгыӈгиӈо то ӄуччев’.
«Галалг’ы гэвэгиӈык эллай пылв’ынтыв’эннятгиӈо 9,6 миллиардав’ пылв’ынто. Ымыӈ тайкыёв’ ковэталаӈ тит йиплэпавык вагиӈо юнэтылг’ин округык. Ымыӈ тит ныг’итикынэв’ нымэлӄинэв’ транспортакенав’ лайвыгиӈо, нэв’иннетын пылв’ынта йиплэпав’гиӈын йиг’этэн В’анав’ӈай- Палана, то ынанъяноткэн аӄайпыӈын Корякский округэн- таяӈгиӈын. Галалг’ы гэвэгиӈык нантыванат ӈыччэк 12-пыкъялг’ыт яят В’эемлэк то Апигик. Гыммо тыкивыӈ, аму 2021 гэвэгиӈык яёг’ыӈгиӈо тайкыёв’ нымэлг’эв’ ягалалайкэ. Юнэтылг’э Корякский округык нэелыг’уӈнэв’, миӈкые нымэлг’эв’ ковэтатыӈ программан йингычголавык ёнатгиӈо Корякский округык»,-эвыӈ С. Лебедев.
Тайкыён наятаӈтэйкын гэтама, миӈкые яплэпавэкэ Камчатский край.
2014-2020 яёг’ыӈкы тайкыёлӄыло вэтатэ Инэллэиччет Корякский округкэн. Тайкыёлӄылэпыӈ инэллэиччетин крайик «Ватӄэначг’энаӈ тэйкык инэллэиччету Государственный энналлагиӈэпыӈ крайик» инэллэиччет Корякский округэн нэнумэкевын министерствак гамгамв’уйвыкинэв’ эналлагиӈо то йиплэпав’гиӈэпыӈ Корякский округ. Акметгиӈо яёӈгиӈэпыӈ тайкыёв’ 2020 гэвэгиӈыкэнав’ натвынав’ министерстваӈӄо миӈки пыӈлов’ эналлагиӈэпыӈ гамгав’уйвык накогэтаӈвоӈнав’ то йиплэпавык этгиӈо Корякский округык Камчатский крайик то мекив’ омакаӈ вэталлай яёӈкы в’уччин программан.
Энянньмев’нэн С. Тынанто.