Արցախի խորհրդարանի պատգամավոր Մետաքսե Հակոբյանը Armenia Today-ին այսօր հաստատեց, որ քրեական գործ է հարուցվել Լեռնային Ղարաբաղի Հանրապետության անվտանգության խորհրդի նախկին քարտուղար Վիտալի Բալասանյանի նկատմամբ։
Ավելի վաղ ԶԼՄ-ներում հայտնված տեղեկությունների համաձայն՝ քրեական գործը կապված է վերջինիս պաշտոնավարման ընթացքում արձանագրված չարաշահումների հետ։ Հնարավոր է, որ առաջիկայում գործը դատավարական կարգավիճակ ստանա։
Հակոբյանի խոսքով, գործի նյութերին ծանոթանալու համար անհրաժեշտ է, որ պատգամավորները համապատասխան հարցումներ ուղարկեն գլխավոր դատախազություն։
«Դա երկար ժամանակ կպահանջի։ Այդուհանդերձ, գործող իշխանության նման ձեւաչափը մեզ համար վաղուց նորություն չէ։ Ե՛վ Հայաստանի իշխանությունները՝ ի դեմս Նիկոլ Փաշինյանի, և՛ Լեռնային Ղարաբաղի իշխանությունները՝ Արայիկ Հարությունյանի գլխավորությամբ, պարզապես ցանկանում են վարկաբեկել Վիտալի Բալասանյանին։ Սակայն ոչ միայն նրան»,- ասաց խորհրդարանականը։
Այս պահին նյութեր են նախապատրաստվում ևս մի քանի գործերով, որոնց հիման վրա կարող են նոր քրեական գործեր հարուցվել։