Kulebyaka - rus oshxonasining mazali, yopiq usulda tayyorlanadigan piroglaridan biri hisoblanadi. Bekajonlar e'tiboringizga shunday pirog retseptini taqdim etishni lozim topdim. Tayyorlanishi biroz murakkab bo'lishiga qaramay natijada pirog juda ham mazali bo'lib tayyorlanadi. Aziz bekajonlar ushbu pirogni albatta sinab ko'ring!
Kerakli masalliqlar:
- 250 gramm javdari uni
- 7 gramm xamirturush
- 45 gramm shakar
- 2 dona tuxum
- 100 gramm saryog'
- 3 choy qoshiq tuz
- 3 dona sarimsoq tishchasi
- 3 osh qoshiq zaytun yog'i
- 3 dona pomidor
- 2 dona piyoz
- 1 osh qoshiq oregano
- 450 gramm ismaloq (qaynatilgan)
- 175 gramm rikotta
- 0,5 choy qoshiq muskat yong'og'i
- 1 dona baqlajon
- 100 gramm shampinon
- 225 gramm guruch
Tayyorlash usuli:
1. Birinchi navbatda xamirni tayyorlang. Buning uchun: xamirturushni 2 osh qoshiq issiq suv va bir chimdim shakar bilan uyuting. 30 daqiqaga issiq joyga qo'ying. Tog'orachaga javdari uni, 40 gramm shakar, 1-1,5 choy qoshiq tuzni birlashtiring. Chuqurcha hosil qiling, ko'pirtirilgan tuxum, eritilgan saryog', xamirturushli massani quying va yumshoq, cho'ziluvchan xamir qoring. Xamirni 1 soatga issiq joyga olib qo'ying.
2. Bu vaqt mobaynida asosni tayyorlang. Mayda to'rg'algan piyoz va sarimsoqni 1 osh qoshiq zaytun yog'ida qovuring. To'rg'algan pomidorni soling, ajralgan sharbat butunlay so'rilgunga qadar dimlang. Tuz va murch soling. Ushbu asos pirogning birinchi qavati hisoblanadi.
3. Ismaloqli qavat: ismaloq barglarini bir necha daqiqa suvda qaynating. Suzib oling, to'rg'ang va rikotta, muskat yong'og'i bilan aralashtiring.
4. Qo'ziqorinli qator: 1 dona piyozni mayda to'rg'ang va 2 osh qoshiq zaytun yog'i bilan qovurishni boshlang. Mayda to'rg'algan baqlajonni birlashtiring va sabzavotlar yumshoq holga kelgunga qadar qovuring. So'ng, sabzavotlarni blenderda pyurelang.
5. Sabzavotli pyureni tovaga soling, parrak shaklda to'rg'algan shampinonlarni soling va shampinon yumshoq holga kelguncha qovuring. Ta'bga ko'ra tuz va murch soling.
6. Guruchli qator: kastryulkada 50 gramm saryog'ni eriting, guruchni soling va 480 ml suv quyib, 15 daqiqa davomida qaynating.
7. Kulebyakani yig'ishga kirishing. Pechni 200 darajada qizdirishga qo'ying. Xamirni to'g'ri to'rtburchak shaklda yoying. Xamirni shunday yoyingki, qolipga solinganda qolip devorlaridan xamir chiqib turishi lozim. Guruchli asosning bir qismini soling.
8. Ustidan pomidorli asosni soling, ketidan ismaloqli va qo'ziqorinli asosni ketma-ket soling. Eng ustki qismga qolgan guruchli asos qismini soling.
9. Xamirning ikki chetini birlashtiring va sut bilan surtib, 15 daqiqaga qoldiring. So'ng, qizigan pechda 1 soat davomida pishiring.
10. Kulebyakani pechga qo'yganingizdan 30 daqiqa o'tgandan so'ng, kulebyaka ustini folga qog'ozi bilan yoping va pishirishda davom eting. Belgilangan vaqt o'tib, tayyor kulebyakani issiq yoki sovuq holda dasturxonga torting.
Yoqimli ishtaxa!
